رواية ميمو الفصل الرابع عشر بقلم رانيا أبو خديجة
روايه ميمو بقلم رانيا ابو خديجه
رواية ميمو
الفصل الرابع عشر
#ميمو
#رانيا_أبو_خديجة
فاجأة سمعت صوت خبط في الشباك وكأن حد زقل حاجة..
_ ايه الصوت دة....مين بيزقل طوب في الشباك؟!
لقيتها قامت اتنفدت وبصتلي بخضه على وشها
_ فيه ايه مالك ...
لقيت صوت اكبر في الشباك...قومت اشوف فيه ايه
_ ميمووو
لقيتها قامت من السرير ووقفت قدامي
_ م ما متفتحش الشباك
_ فيه ايه يا بت مالك ...اوعي كدة اشوف ايه بيخبط في الشباك كدة
_ دة ..دة فاااار
_ نعم!!! فاار!! فار هيعمل الصوت دة في الشباك؟!
_ ماهو ..ماهو الولاد في الشارع اول ما بيلمحوا بيخافوا ويزقلوا عليه طوب
_ طب اوعي كدة اشوفه واموته ...افرض دخلك الاوضة هنا ...دة انتي بتترعبي ...ولا تصوتي وتلمي علينا الناس
_ لأ لأ يا ميموووووو...هو انت يا ميمووووو جاي تقعد معاياااا في أوضتيييي...ها في اوضتييييي.....تقوم تخوفني ...انا بترعب اما بشوفه
لقيته ضربني على قفايا
_ وبتزعقي ليه سرعتينييي... انتي هبله ...يعني عايزاني اسيبلك فار على شباك اوضتك ...اوعي هموتهولك احسن يدخلك هنا يا متخلفة
_ يا ميموووو
لقيته لفلي تاني
_ في ايه يا زفته؟!!!
_ ما قولتلك بخااااف....بخاااف اشوفه يا ميموووو
_ قولتلك هدي صوتك...وبتزعقي في ميمووو ليه
ونزل بايدة تاني على قفايا
_ ....بتزعقي ليه ...انا عارف انك بتخافي من الحاجات دي ... وعشان كدة سبيني انضفلك الشباك
حطيت ايدي على بوقي من الخوف والرعب وخلاص مبقاش فيه مفر تاني ....بس يارب الغبي التاني دة يكون سمع ان ميمو هنا ومشي
لقيته فتح الشباك.... يا لهوووي دة فريد لسه وااااقف... خلاص انا كدة اتوفيت..
لقيته واقف قدام الشباك بالموتوسيكل بتاعه
المشكله ان الشارع اللي شباكي مطل عليه دة زقه ضيقه ومحدش بيمشي منه قوي لان في شارع جنبه رئيسي ويمكن دة اللي جرء الغبي دة بوقفته دي
لقيتة اتخض اول ما شاف ميمو وبمنتهى الهدوء لف وحط ايدة الاتنين في جيوبه ساند عالموتوسيكل بتاعه
ميمو بص للشباك بعدين اخد باله منه وبصله ....
لقيته اتوتر اكتر بعدين بص في ساعته بتعمد وبص لميمو تاني
= بقولك يا اخ الله يخليك ... مش دة شارع المعوض الرئيسي ...اصل صاحبي قالي اقف استناه هنا
_ لأ الشارع الرئيسي هتلاقيه بعد ما تلف للزقه اللي جنبنا
= اتاريني واقف بقالي مدة ومجاش ...تشكر ...بالاذن
_ بقولك ...مشوفتش مين كان بيخبط في الشباك دة
= اا..اه دة دة ... الشباك دة!!
كنت لبست حاجة عليا ووقفت جنبه
_ ماقولتلك يا ميمو تلاقي عيال الحته بيزقلوا عالفار
= اه وانا اقول العيال دي بتزقل طوب هنا ليه لحد ما كانوا هيوقعوني بالموتوسيكل.... بس انا شخط فيهم وجريوا كدة
كان بيتكلم وهو بيركب الموتوسيكل وكان هيمشي أخيرا لولا ميمو وقفه تااني ..عديها بخير يااارب
_ بقولك يا أستاذ
لقيته التفت لميمو
_ خير يا غالي... معلش همشي اصل متأخر على صاحبي
_ روح لصاحبك براحتك ...بس استأذنك تبقى تقف بعيد عن هنا بعد كدة
_ م ماشي يا باشا وبعدين ما قولتلك انا جيت غلط
بعدين اخد الموتوسيكل بتاعه واختفى
لف بصلي
_ اقفل الشباك بقى يا ميمو لحسن لحسن الفار يدخل ومنشوفوش
لقيته بص هنا وهنا
_ فين يا بت الفار....مفيش حاجه....
_ باينه مشي .... انا اصلا مش بفتح الشباك دة كتير ...ومش هفتحه تاني اصلا
_ ميمووو ... بت يا زززينب
حسيت ان دة نداء انقاذ ... يا حبيبتي يا خالتي
_ ايوا يا خااالتي يا حبيبتي ..نعم ...انا جايه اهوو
وخرجت من الاوضة اشوفها عايزة ايه ...
_ يلا يا ضنايا ادخلي اغسلي وشك وتعالي نفطر مع اخوكي
قعدنا عالفطار كلنا سوا...يااه بقالنا كتير مشوفنااش ميمو...بقاله اكتر من اسبوعين ولا تلاته مجاش
_ امممم... تسلم ايدك يا هند...احلى فول باكله من ايدك
_ بالهنا يا حبيبي ...متبقاش تغيب علينا انت بس وانا اشبعك من عمايل ايدي
_ قوليله يا خالتي ....حكم هو بيروح ويقول عدولي
لقيته بصلي انا وخالتي ومردش بعدين بطل أكل وفضل يبص لحيطان البيت ...انا عارفه ان ذكريات المنطقة كلها هنا مش الطف حاجة لميمو وعارفه كمان بييجي على نفسه ازاي في الشوية اللي بييجي يطمن علينا فيهم هنا ولولا كدة مكنش عتبها أصلا
_ احم...خير يا ميمو كنت بتقول عايزني في حاجة مهمه وانت بتصحيني ...ولا كنت بتضحك عليا عشان أصحى
_ انا جاي أشوفكوا واطمن عليكوا يا زينب ...
بعدين أخد الكوباية يشرب
_ واديكوا فلوس عشان لو غبت شويه ولا حاجة متحتاجوش لحد
_ عايزينك طيب يا ضنايا.... ربنا يكتبلك في كل خطوة سلامة وخير
...……...…...…....................
_ معلش يا قصي انا لو هقدر أسافر يا ابني كنت سافرت انا ... لكن دلوقتي انا اعتمادي كله على ربنا وعليك
_ ولا يهم حضرتك .... هسافر أنا واخلص كل حاجة...متقلقش
_ عموما انت مش هتتأخر ....خلص امضاء العقود والاتفاقات وارجع وهما لو حابين اي اضافات بعد كدة تبقى في زيارتهم بقى لما ينزلوا مصر ان شاء الله
_ للاسف يا بابا ...الايميل اللي بعتوه بيقول ان الموضوع هياخد شوية وقت .... يعني غصب عني هتأخر
_ مساء الخير
_ مساء الخير يا سلمى....حماتك شكلها كدة هتحبك تعالى اتغدي معايا انا واخوكي يلا
_ ميرسي يا بابا انا مش جعانه .... هبقى أكل بعدين لما أجوع
لقيت قصي بصلي بطريقة تعبر عن ضيقته....ايوا انا فعلا مش عايزة اقعد عشان هو قاعد
_ اغسلي ايدك يا سلمى وتعالي ...اقعدي معايا على الاقل انا واخوكي....احنا بقالنا كتير متجمعناش على سفرة واحدة
اتنهدت ونفذت اللي بابا قال عليه ...مش عايزاه يتضايق مني بسبب اي حد
بدأنا ناكل فعلا ....رفعت عيني صدفه اتجاه قصي ...لقيته بيبصلي
_ عاملة ايه في شغلك....يارب يكون كله كويس
_ الحمد لله... كله كويس
_ مش ناويه تسيبك من شغلت التدريس دي وتيجي تشتغلي معانا
_ لا...انا مبسوطة بشغلي وبحبه جدا كمان
_ ربنا يوفقك
_ شكرااا.... صحيح يا بابا ....المدرسة طالعة مسابقة كدة وطالبيني أسافر معاهم ....ياريت ميكونش عند حضرتك مانع
_ مينفعش
بصيت للبني أدم المستفذ دة اللي بيرد قبل حتى ما اكمل كلامي ولا بابا يرد عليا
_ انا مسافر كمان يومين واحتمال اطول.... ومش عايزين نسيب بابا لواحدة كل الوقت دة
بصيت لبابا
_ حقيقي يا بابا....
_ أخوكي هيسافر شغل مكاني واحتمال يطول شويه فعلا
بصيت لبابا بحيرة...بس مفكرتش كتير
_ خلاص يا حبيبي انا مش هسافر...مش لازم
_ انتي هتسافري امتى؟
_ المفروض بعد بكرة ...وعلى حسب مواعيد المسابقة هنرجع بعد أيام مكناش هنطول قوي بس خلاص مش مشكلة
_ طيب سافري انتي براحتك وانا كدة مش هلحق اقعد لواحدي كتير... على ما أخوكي ييجي يسافر هتكوني انتي هترجعي....هو لسه قدامه كام يوم عالسفر
_ مينفعش يا بابا خليني مع حضرتك احسن
_ اسمعي الكلام وروحي معاهم وغيري جو ....انتي بقالك كتير روتينك زي ما هو من البيت للشغل ومن الشغل للبيت....وانا عموما هبقى مكان اخوكي في الشغل يعني مش هتلاقيني في البيت هنا كتير
......….……….....................
كنت واقفة في الفصل بلف على الولاد أشوف واجباتهم سمعت خبطة على باب الفصل وميمو دخل ... بعدين لقيته جاي ناحيتي في نص الفصل بدون كلام ...ماله؟!
_ ايه اللي انتي عملتيه دة!
_ عملت ايه ؟
_ انتي اللي قولتي للمديرة انك مش عايزة تسافري مع الولاد
اخدت كشكول تاني من الولاد واتكلمت وانا بشتغل
_ ايوا لاني مش عايزة اسافر وكمان مش فاضيه يا ميمو ...ممكن تاخد اي حد تاني
_ مش فاضيه ليه بقى ...عندك ايه غير الشغل
لفيت ابصله بتنهيدة ... صراحة انا فعلا كان نفسي اسافر معاه
_ قصي اخويا مسافر كمان كام يوم وكدة بابا هيبقى لواحدة ...اينعم معظم وقته بيبقى في شغله ..بس قصي كان عندة حق لما قالي افضل معاه
_ أولا احنا مش هنطول يا سلمى ...انتي عارفه كدة كويس.... كمان انتي بتقولي هيسافر بعد كام يوم يعني هنبقى احنا هنرجع
_ بابا قالي كدة برضه...لكن ..انا يعني...
_ انا ملاحظ الولاد بيحبوكي انتي اكتر واكيد هيكونوا مبسوطين لو انتي اللي كنتي معاهم .... دة انا حتى قولت لغدير عشان عارف انها لو مجتش معانا يبقى انتي مش هتيجي... والعكس طبعا
= صباح الخير يا مستر ميمو... صباح الخير يا سلمى
التفتنا على صوت وفاء اللي دخلت الفصل... المفروض انها ليها حصة بعدي هنا ...بس انا مسمعتش الجرس ايه اللي جابها دلوقتي
لقيتها قربت مننا مكان ماحنا واقفين وسط الولاد
_ صحيح يا مستر ميمو سمعت عن المسابقة اللي المدرسة مشاركه فيها... بقالنا كتير قوي مشتركناش في مسابقات وفرصة كويسه الولاد يغيروا مود برضة
_ أكيد يا مس وفاء وعشان كدة الولاد متحمسين جدا الحمد لله
= والله يا مستر ميمو كلنا محتاجين تغيير المود دة ... المدرسة بقالها فتره معملتش رحلات ابدا
طب وبعدين في الحوار الشيق دة .... رميت الكشكول اللي كان في ايدي واخيرا سمعت جرس انتهاء الحصة
روحت لميت حاجتي واستاذنت وكنت هخرج لولا سمعت جمله وقفتني
_ لو يعني معندكوش مانع ولا هكون ضيفة تقيله عليكوا ..اههههه
_ لأ ازاي تنوري طبعا...
بعدين سكت وبصلي
_ دة انا حتى لسه محتار لان الناس اللي كنت مرشحها رفضت السفر للاسف
لقيتها بصتلي وكأنها عارفه انه قصده عليا
.....…............
خرجت من الفصل وانا بفكر يعني هيسافروا مع بعض .... يعني هو هيبقى هناك معاها وانا هبقى هنا
وفاء حقيقي مش مريحة في نظراتها لميمو...كتير ببقى خارجة من الفصول القيها واقفه هنا تبص عليه وهو بيشتغل في الحوش والولاد قالوا قدامي انها بتسألهم عنه ....والاستاذ كمان مديها علطول الابتسامه والوش الحلو.. يعني ليها حق ...اهم بقالهم ساعة بيرغوا جوة ... ياريتني ما كنت خرجت كان زماني عرفت بيقولوا ايه
_ سلمى
اخيرا خلص رغي معاها وخرج....كنت واقفه ببص عالحوش وحقيقي متضايقه...يعني هيسافروا مع بعض؟!
_ نعم ....اتفقتوا على ايه
_ وفاء عايزة تيجي بما ان ليها مكان وانتي مش عايزة
بعدين بصلي شوية ورجع اتكلم بصوت اهدى
_ ما تفكري تاني يا سلمى.... عشان خاطر الولاد .... ومش هنتأخر ....ولو لقيتك هتتأخري ممكن نعمل استثناء وتبقي ترجعي في اي وقت
_ واشمعنا وفاء بقى .... ماتاخد اي حد تاني معاك ..اشمعنى دي
_ هو ايه اللي اشمعنا دي....شفتيني انا اللي روحت اتحايلت عليها وقولتلها تعالي ...ماهي اللي ...
_ كنت تقدر تقولها لأ
_ واقولها لأ ازاي هي كانت مدرسة أبويا ... وبعدين مانتي لو كنتي وافقتي....
_ بالشكل دة لأ.... والله يا ميمو لو وفاء دي راحت معاك مأنا رايحة
بصلي شويه بعدين قرب
_ افهم من كلامك انك هتيجي لو هي مجتش
_ ايوا بس دة لو هي مجتش
بعدين رجعت كملت
_ بس على شرط..منتأخرش زي ما قولت والا هسيبكوا لو اتأخرتوا وانزل لواحدي
..............................
_ انت عارف لو جتلي البيت تاني ..انا هعمل فيك ايه... والله هيبقى نهارك معايا مش هيعدي
سمعت ضحكته في التليفون
_ مكنتيش خايفه لاعمل انا واقول لاخوكي اني كنت جايلك انتي وبالمرة كنت اقوله عايزك في ايه
_ فريد ...بلاش الكلام دة عشان انت عارف كويس لاهو في مصلحتي ولا في مصلحتك ...اخويا ميمو مبيهزرش ولو كنت ناوي تعمل الحركات القذرة دي وتهددني بيه فاحب اقولك انك زي ما هتقوله انا كمان هقوله انك انت اللي مشغلني وموديني المكان دة.... هو انا هعرف الاماكن دي فين ....وقتها بقى هيبدء بيك انت على الاقل انا اخته الوحيدة لكن انت مش هيسمي عليك يا حبيبي
مسمعتش اي حاجه غير صمت ....انا عارفه دماغ فريد واكيد بعد اللي حصل دة اول حاجة هيعملها انه يهددني يقول لميمو خصوصا عشاان اسمع كلامه وانفذ اللي بيطلبه.... لانه اكتر واحد عارف رعبي من ميمو في الموضوع دة بالذات وكنت عارفه انه هييجي الوقت ويستغله
_ كنت جاي عايز ايه؟!
سألته بنبره جديه لما طال صمته كدة
_ بكلمك مبترديش.... عايزاني اعمل ايه يعني...وكمال واكل دماغي هيجنن على غيابك اليومين دول
بعدين سكت. واتنهد وكمل بنبرة اهدى في الكلام
_ مكنتش اعرف ان زعلك وحش كدة يا زوزو....طب ما تقولي مش عايزة وخلاص هو انا يعني هجبرك على حاجة...ارجعي الشغل يا ستي ...ارجعي ووعد مني مش هكلمك في الموضوع دة تاني
_ فريد....انا راجعه بس مش عشان مجيك ولا مكالمتك ولا تهديدك الاهبل دة...انا راجعة بمزاجي وخليك عارف ان وقت ما احب امشي همشي برضه بمزاجي...ماشي
..…..…........................
_ واخيرا هسافر واغير جو طب والله انا حبيت المسابقة دي فاجأة كدة
_ انا حاسس يا غدير انك متحمسه ومبسوطة أكتر من الولاد نفسهم
ميمو عنده حق ...غدير متحمسه اكتر من الولاد نفسهم.. صاحبتي وعارفاها تتمنى السفر والانزحه ..
وفاجأة واحنا التلاته ماشيين داخلين لغرفة المديرة قابلتنا وفاء وباين عليها زعلانه قوي
_ مستررر ميمووو
التفت ميمو يبصلها بعدين بصلي ومعرفش ليه ابتسم ابتسامة مفهمتهاش كدة
_ عرفت ان مس سلمى وغدير هما اللي مسافرين مع حضرتك...بس الغريبة انهم قالولي انك عايز معاك اتنين بس
_ للاسف يا مس وفاء مش انا اللي محدد العدد ... المديرة هي اللي قايله المشرفين معايا ميزيدوش عن اتنين عشان التكاليف متبقاش زيادة على المدرسه
_ طيب.. طيب مانا كنت هدفع اشتراك والله
_ كلنا دافعين والله يا وفاء ماانتي عارفه المديرة دة حتى كابتن ميمو دافع
لقيتها بصت لغدير وكأنها مش مصدقاها مع ان دي الحقيقه فعلا ...وبصتلنا بعدين استأذنت ومشيت
دخلنا للمديرة وبعد كلام وتحذيرات بمسئوليتنا اتجاه الولاد بدأت تكلمنا في حاجات غريبه ....انا اول مرة أسافر مع المدرسة في حاجة وشكلها هتبقى أخر مرة
_ طيب نقول تكلفة الباص + تكلفة الاقامة في اوتيل هناك ليكم وللولاد+ تكلفة اكلكم وشربكم يبقى الحساب
كانت فعلا ماسكة في ايديها ورقه وقلم وبتحاول تحسب التكلفة واحنا قاعدين .... بعدين رفعت راسها عن الورقه بضيقه
_ لأ التكلفة كدة عاليه جدا ....مش كانوا عملوا المسابقه دي في القاهرة هنا كان يبقى أحسن
بعدين فكرت شويه وبصت للورقه وبصتلنا
_ الباص لواحدة رايح جاي مكلف جدا ولو اضطر يستنى معاكوا بقى ...لا لا دة يبقى خراب بيوت
_ ايوا يعني حضرتك هتسفرينا على حصان ولا ايه
ابتسمت غصب عني على تريقة ميمو اللي قاعد مذبهل وبيبصلها باندهاش من وقت ما فتحت موضوع التكلفة دة
لقيناها بصت في الورقة تاني ورفعت وشها تنفخ بضيق اكبر
_ الحصان مكلف هو كمان ؟!
قرصت غدير في دراعها عشان تسكت ماهي مش نقصاها هي كمان ... كفاية ميمو اللي متنح للمديرة وريأكشنات وشه لواحدها مشكله
_ أنا بقول مش لازم ...
_ مش لازم نسافر اصلا صح ... بقول لحضرتك ايه هما مش الولاد دافعين اشتراك المسابقه والسفر وكل دة
بعدين شاور عليا انا وغدير
_ وانا والاساتذة دافعين برضه ...يبقى ليه بقى الحيرة دي كلها مش فاهم
_ يا استاذ ميمو التكلفة فعلا عاليه جدا والمدرسة متتحملش كل دة .... وبعدين هما الأهالي بيدفعوا قد ايه يعنى لكل دة...
_ دة والله السؤال اللي انا بسأله ...هما ايه اللي مخليهم يجيبوا عيالهم هنا اصلا؟!
_ يا ميمووو
همستله وانا بحاول اكتم ضحكتي ياخد باله من كلامه معاها
_ بقولكم ايه ...اتفضلوا انتوا يا اساتذة على شغلكم وانا هتصرف ... اتفضلوا اتفضلوا
_ حضرتك هتتصرفي في ايه بقى
_ متقلقش يا استاذ ميمو انا هحلها
..…............................
_اخيرا وصلنا الحمد لله.....الواحد كان بدء يجيلوا كساح من قعدة المكروباص دي
_ طيب يلا بقى ننزل يا غدير ...لان انا حرفيا تعبت
نزلنا فعلا من الميكروباص ....بديل الباص اللي المديرة أصرت تبدله بمكروباصين عشان التكلفة برضه
نزلنا انا وغدير...لقينا ميمو نزل وبدء ينزل الولاد واحد واحد ويطمن على عددهم .... بعدين بص عالمكان اللي المكروباصات وقفت فيه وراح للسواق يكلمة ....فضلت انا وغدير نتلفت حوالينا....انا مش شايفه اي اوتيلات هنا....يمكن لسه هنمشي تاني....بصيت على ميمو اللي طول قوي في كلامه مع السواق
_ لأ معلش مش فاهم برضه...براحه عليا كدة وفهمني يا غالي... انت منزلنا هنا ليه
_ انا معرفش يا استاذ كل اللي اعرفه واتفقت عليه مع الست اللي هناك اني انزلكوا هنا
_ ايوا هنا فين يا عمنا .....انت واخد بالك انت منزلنا فين؟!
= يا اسااااتذة ...يا اسااااتذة
التفتنا نشوف مين بينادي ...لقينا راجل شكله غلبان جاي من بعيد
_ حمدالله على سلامتكم يا أساتذة
ميمو قلع نضارته وبصله باستغراب
_ ايوا...نعم ...
_ مش حضراتكوا اللي جايين عشان المسابقة برضك؟
لقيت ميمو بصلنا بعدين هز راسه بمعنى ايوا
_ يبقى نورتوا مكانكوا
#رانيا_أبو_خديجة
توقعاتكوا يا ترا المديرة العجيبه دي مخبيلهم ايه تاني وهتقعدهم فين بقى؟!😂
وايه اللي مخلي واحدة زي سلمى بتشتغل وصابرة عالوليه دي😂؟!
وميمو هيفضل صابرمعاهم لحد فين؟
وايه الاحداااث اللي مستنيانا في السفريه دي ...اكيد مش عااادي خااالص
استنوني البارت الجاااي في احداااث مشوقه باذن الله ومختلفه جدااا
قراءة ممتعة ♥️🥰
#رانيا_أبو_خديجة
#ميمو
لقراءة الفصل الخامس عشر من رواية ميمو 👇👇
🔥🔥 الفصل الخامس عشر 🔥🔥
للانضمام لصفحتنا على الفيس بوك 👇
🔥🔥 انضمام 🔥🔥
للانضمام لجروبنا 👇👇
👈 انضمام 👉
إرسال تعليق