رواية ميمو الفصل الثامن عشر بقلم رانيا أبو خديجة
رواية ميمو بقلم رانيا ابو خديجه
روايه ميمو
الفصل الثامن عشر
#ميمو
#رانيا_أبو_خديجة
ميمو.....ميمو اصحى ....
_ همممم ....ايه....مين!!
_ مين ايه بس ...يا ميمو اصحى ..انا غدير
فتح عينه فاجأة لقانا معاه في الأوضة....اتعدل واتكلم بصوت كله نوم
_ في ايه يا غدير....هي الساعة كام دلوقتي...احنا امتى
_ احنا الصبح بس انا صحيت ملقتش هيثم وسندس اختفوا معرفش راحوا فين!!
_ بتقولي مين اللي اختفوا؟!!
_ هيثم وسندس مش موجودين مع الولاد
رد وهو قايم بسرعة من السرير وراح ناحية هدومه ... يسحب قميص يكمل لبسه ويخرج معانا
_ هيثم وسندس... يبقى أكيد هنا ولا هنا مع بعض يا غدير ما انتي عارفه انهم مع بعض علطول وبيعملوا كل حاجة سوا
_ غدير معاها حق تقلق يا ميمو ....احنا لفينا البيت كله وبصينا حوالينا مش لقينهم
رد وهو خارج بره الأوضه
_ طيب تعالوا .... أكيد هنلاقيهم ...هيثم مش من الولاد اللي ممكن تتوه ..متخافوش
...…..….…..….…........
هيكون اخد البت وراح فين المتخلف دة .... والله يا هيثم لما أشوفك بس ....
المصيبه أن التانية كمان هبلة زيه .... تعالي يا سندس نسيب التمرين ونروح نلعب ...يلا يا هيثم .... تعالي نعكنن على مستر ميمو ونرخم على ميس سلمى ...يلا يا هيثم ..مفيش شخصية خالص
هي علاقة توكسيك من أولها...
كنت ماشي في كل مكان بدور عليهم ... وطبعا سبت غدير وسلمى مع الولاد .... هيكونوا فين بس انا تقريبا لفيت كل الأماكن اللي حوالينا...
_ عم خميس.... !!!
لقيته جاي اتجاهي.... الراجل دة رغم ان حارس للبيوت اللي هنا لكن معظم الوقت أشوفه مشغول في شغل تاني وحاجات يجبها من بره ويعملها هنا
_ صباح الخير يا استاذ ميمو... أؤمر
_ مشفتش طفلين تبعنا...كانوا هنا بس صحينا ملقنهومش
بدأ يتلفت حواليه
_ طفلين معاكوا!!! ايوا ايوا....لمحتهم الصبح ماشيين الناحيه دي كدة
_ ماشيين كدة ازاي!!!....وكانوا رايحين فين أصلا؟!
_ معرفش والله...اني لما شفتهم وسألتهم.... لقيتهم ساهوني وسابوني وجريوا كدة وهما بيضحكوا ...افتكرتهم بيلعوا هنا يعني
مشيت نفس الاتجاه اللي قال عليه وحقيقي بدأت أقلق عليهم .... المكان حوالينا فراغ .... وممكن اي شئ يقابلهم يخوفهم...
كنت ماشي بسرعة لحد ما حقيقي تعبت .... وقفت اسند ايدي على ركبتي الاتنين من التعب ....بقالي ساعة تقريباً ماشي في الشمس.. وفاجأة سمعت صوت ضحك طفولي.... صوتهم ...
التفت حواليا في كل حته .... ملقتهومش .. بعدين تتبعت مكان الصوت
= الله ... شكله جميل قوي يا هيثم .... اول مرة أشوف قط كيوت وبودان كبيرة كدة ... تحفه بس هاخدة الأول افرجوا لمس سلمى ورشا صاحبتي وبعدين اوديه للقطة بتاعتي يبقوا أصحاب
_ شكلهم صغيرين قوي ...زي ما يكونوا اطفال مولودين...بصي عنده اخ شبهه بالظبط .. لأ احنا ناخد الاتنين انا واحد وانتي واحد ...اتفقنا
_ ماشي
_ايه الفرحة والبهجة اللي بتتكلموا بيها انتوا الاتنين دي....نهاركوااأ مش فايت معايااااا؟!!!!
لقيت الاتنين التفتوا على صوتي بخضه ... بعدين سندس بابتسامة وضحكة كبيرة جريت عليا وفي ايديها كائن شكله عجيب....ايه دة؟!
_ مستر ميمو....شوف لقينا ايه ....قط شكله كيوت وجديد قوي..
..……… ............
_ انا عايز اعرف دلوقتي...ايه اللي يخليك تاخد في وشك وتمشي كدة من غير ما تقول لحد .... وكمان واخد معاك زميلتك ....ايه يلا خلاص قلبك مااات
_ خلاص يا ميمو سيبه ....الولد ودنانه احمرت...هي ذنبها ايه ودانه يا ميمو دلوقتي ؟!
_ اوعي يا سلمى لو سمحتي...لازم يعرف ان اللي عمله دة غلط
سمعت صوت عياط وانا ماسك ودان الحيوان دة احاول اعرفه ان اللي عمله دة غلط....رفعت راسي هناك ....لقيت الست سندس بتعيط
_ بتعيطي ليه انتي كمان دلوقتي؟!
_ عشان انت بتضرب هيثم .... وانا السبب فأكيد هتضربني أكتر
_ اضربه !!! هو دة ضرب...دة لسه هيشوف الضرب دلوقتي... وبعدين انتي السبب ازاي ..... انتي اللي قولتله تعملوا كدة؟!
_ ايوا ...ط طلبت منه أشوف قط هنا يبقى صديق للقطة بتاعتي عشان كنا لمحناهم هنا اول ما جينا وكان شكلهم كيوت قوي ومش شبه القطة بتاعتي ...شكلهم جديد
_ ميمو ...هو في هنا قطط اصلا ؟!
_ اسأليهم .... لقيت كل واحد فيهم ماسكلي في ايده شئ غريب كدة ويقولي قطه كيوت
بعدين وجهتلهم الكلام
_ مفيش هنا قطط كيوت وبودان كبيرة يا سندس ...اللي كنتي مسكاه دة يا حبيبتي اسمه تعلب . .تعلب الصحرا
_ لأ ده قطه كيوت..
مسكته من ودانه تاني المتخلف اللي مصر يتخلف دة
_ ولا ... بقى بحاول افهم البت ان دة تعلب وكان ممكن يأذيكم والبعيد ايه مبيفهمش
_ يا ميمو سيب وداااني وجعتني ... وبعدين اشمعنى انت كنت بتتمشى مع مس سلمى امبارح بالليل ولا عادي انك تمشي صاحبتك ومش عادي اني امشي صاحبتي
بصتلة بعيون واسعة واندهاش بعدين رفعت عيني اتجاه سلمى لقيتها بتبص لغدير وغدير بتبصلها بطريقة واضح ان محدش فاهمها غيرهم ... بعدين سلمى هربت من وشها وعنيها لعيني ...لقيت وشها احمر من الكسوف منهم كلهم خصوصا من غدير المصوبة عنيها عليها بابتسامة غبيه كدة
_ وانت اش عرفك اني كنت بتمشى امبارح انا ومس سلمى بالليل؟!!
_ شفتكوا امبارح من الشباك وانا داخل الحمام.... فقولت لازم امشي سندس زي ما انت ما مشيت مس سلمى واجبلها القطة اللي هي عايزاها
يانهااار مش فايت ...بيقلد ميمو في اي حاجه...حتى في دي ...دة ايه الكسوف دة يا ربي اللي عالصبح
_.. طيب يا جماعة انا...هروح احضر الفطار عشان تاكلوا بقى وتبداوا اليوم ..
_ استني يا سلمى
بصيت ورايا للصوت المداعب اللي بيندة عليا دة...لقيتها غدير طبعا وعلى وشها ابتسامة غلسه كدة .... يادي النيله عالصبح تقول هي ايه دلوقتي
_ استني عشان هاجي احضر الفطار معاكي....ولا مش عايزاني اساعدك ...تحبي مستر ميمو هو اللي ييجي و يتمشى معاكي يساعدك
بصتلها وانا نفسي اروح اضربها على دماغها ... بعدين بصيت لميمو لقيته بسرعة بعد عينه يبص تحت ..... قومت سبتهم ودخلت بسرعة وطبعا هي ورايا
اول ما دخلوا سحبت الزفت دة من ودانه تاني عليا
_ ولا هو انا كل اما اعمل حاجه هتعمل زيي ...افرض انا اتجوزت الصبح ....هلاقيك واخد البت وكاتب عليها؟!!
...…....…............................
_ تاني ...تاني ...اعلى يا وليد .... ارفعي نفسك يا فيروز
كانوا بدأوا تمرين ... وانا وغدير كنا واقفين بنتفرج عليهم من بعيد.... مش عارفه حاسه الولاد نفسيتهم اختلفت كتير مع أجواء هنا .... رفعت عيني ابص للمكان حوالينا هدوء رهيب مع وجودنا معاهم اكيد مديهم أمان مع البهجة اللي بشوفها في وشهم دي.... قد ايه الواحد كان محتاج سفرية زي دي ويبعد عن كل حاجة هناك ممكن تضايقه
_ واضح ان في حاجات بتحصل من ورايا
التفت للي قاعدة جنبي دي ....
_ بتقولي ايه يا غدير ؟!
_ بقول ايه اللي يخليكي انتي والاستاذ تسيبينا نايمين كلنا وتخرجوا تتمشوا سوا الا إذا كان في اسرار
_ اسرار ايه يا حجة انتي .... مفيش ..انا بس مكانش جايلي نوم فخرجت اشم هوا ....لقيته قاعد هنا
لقيتها قربت عليا فاجأة
_ يا شيخة!!...عيني في عينك كدة
بعدين ابتسمت وكملت بهمس كأنها بتقول سر
_ عايزة اقولك يا سلمى انك انتي وميمو لايقين على بعض على فكرة.... وكمان بدأتوا تبقوا مكشوفين
سكت شوية اسمع كلامها... بعدين حسيت اني متضايقه من صيغة الكلام دي
_ خدي بالك يا غدير... اللي انتي بتقوليه دة كلام ميتقالش ... وحتى لو زي ما بتقولي فمن المفروض عليا اكون واخدة بالي اكتر من كدة.... مينفعش كدة ابدا
قربت وحطت دراعها على كتفي
_ وفيها ايه يا سلمى...هو عيب ولا حرام
_ عيب وحرام طول ما مفيش اي رابط رسمي ...يبقى منتهى الغلط...وهو طول الوقت ساكت ... يعني مفيش مبرر وواضح كدة مش هيبقى فيه
بعدين سبتها وقومت اتمشى اتجاههم .... ووقفت على بعد ربعت ايدي وانا بتفرج عليه وهو مندمج في تمرين الولاد.... بيشجعهم بصوته اللي مالي ودني وقل...
..اتنهدت بحيرة وتعب وانا شيفاه كدة قدام عيني طول الوقت...
..….….…..….......….........
_ خلاص...نقف كلنا صف واحد....بقول صف واحد يا ذياد ...
_طبعا احنا عرفنا خلاص ان المسابقة بدايتها بكرة ان شاء الله....
فهنكون صاحيين الصبح بدري نجهز وننزل هنا نتمرن كويس وهيكون في باص كبير مستنينا هياخدنا على مكان المسابقة....مش عايز غلط ..مش عايز هبل....مش عايز كسل ولا لخبطة ... اتفقنا
_ اتفقنااااا يا مستررررر
_ يلا بريك ربع ساعة....كله يدخل يرتاح شويه .. واللي عايز يشرب يشرب... بس محدش ياكل حاجة ....وبعد ربع ساعة بالظبط كله يكون واقف هنا كله في مكانه تاني...اتفقنا... يلاااا
..…..............………............
_ تعالي يا زوزو ....اتفضلي ...نورتي المكان كله
دخلت وأنا ببص في كل حته في المكان.... المكان فعلا مبهر. ... عبارة عن أوتيل كبير ....مطعم وطبعا المحل اللي انا جايه عشانه يبقى عبارة عن بار كبير ..... المكان هنا يختلف تماما عن محل كمال ....
الناس هنا من مظهرهم وشكلهم مفيش فيهم حد يبان قليل ...شكلهم كلهم ناس كبار قوي .... ابتسمت اول ما دخلت الصاله وشفت المكان اللي بقف عليه المملكة اللي بشعر فيها بكل سعادتي ...
_ ايه رأيك بقى في المكان؟
ابتسمت اول ما فريد سألني
_ هو حلو يا فريد مقولتش حاجة لكن ... لكن مش عارفه مش مرتاحه ليه ... خايفه الراجل اللي بتقول عليه دة ميوافقش على مواعيدي وظروفي
_ متخافيش انا قايله على كل ظروفك .... وهو موافقنا كمان ... تعالي بس ندخله مكتبه ... عشان هو عايز يقابلك بنفسه الأول
دخلنا فعلا مكتب كبير برضه غير مكتب كمال خالص ... لقيت واحد يبان من هيئته انه مش قليل بس ملامح وشه أول ما شافني ماريحتنيش ابدا .... معرفش ليه
= يا اهلا وسهلا بالجمال كله.... اهلا بيكي يا زوزو..
_ اهلا ....
_ اقعدي يا زوزو...اتفضلي
قعدت وانا ببصله باستغراب.... حالته كلها كدة غريبه عليا
_ هو انت تعرفني؟!
_ طبعا هو في حد في سوق السهر والليالي ميعرفش زوزو...
بصيت لفريد بخضه ... ماهو ياكلامه هو اللي أوفر يا اما انا اللي في مصيبه .... ايه كل الناس تعرفني دي
_ ااا ... زوزو يا باشا جاية تستلم الشغل ... وانا قولتلها انك حابب تتعرف عليها الأول
_ انا اعرفها كويس يا فريد لدرجة اني كنت اعرف ايام تواجدك من فريد واجي مخصوص عشان اشوفك وانتي بترقصي ...
بعدين بصلي وسند بدراعاته عالمكتب وكمل
= شوفي يا زوزو مواعيدك عند كمال هي هي مواعيدك هتبقى عندي هنا عشان خاطر ظروفك اللي قالي عنها فريد ...ومرتبك هيبقى خمس أضعاف اللي كنتي بتاخديه هناك ..
بصيت لفريد باندهاش من كل دة ...لقيته بصلي بابتسامة واسعة كدة مع غمزة من عنيه
_ بس .. بس انا ..يعني اكيد فريد قالك اني بخلص شغلي وبمشي ...يعني مفيش خلصي يا زوزو واقعدي مع الشخص دة عشان عزيز عليا ولا كل الكلام دة...و..
_ متقلقيش يا زوزو ...فريد قايلي على كل دة... وانا متفهم رغبتك
_ ..طيب.. طيب واللبس ...انا بلبس على مزاجي محدش بيجبرني البس زي حد او أكون شبه حد ...اه عشاان نكون على نور من أولها كدة
لقيته سكت وبص لفريد .... حسيته اتضايق شويه
_ دة اهم شرط ...ولو ظروف المكان متقبلش ظروفي يبقى خلاص مش هعطلك كتير
= اقعدي بس ...انتي وقفتي ليه ...هو انا لسه رديت عليكي
بعدين سكت شوية وكمل
= بصي انا مقدرش ادخلك الصاله والناس الكبار اللي عندي دول يتفرجوا عليكي بنفس اللبس اللي كنتي بتطلعي بيه عند كمال ..لكن..ممكن تلبسي زي ما انتي عايزة بس هيكون معاكي شادي دة استايلست مهم قوي بالنسبالي يكون معاكي ...وهو اللي هيعملك كل اللبس اللي انتي عايزاه والتكلفة كلها على المكان كمان ...قولتي ايه
_ شادي مين دة اللي هيلبسني على مزاجه.... انا بعرف البس كويس وبعدين هتفرق ايه بقى لما حضرته يدخل في اللي هلبسه فين بقى حريتي دي
_ اهدي بس واسمعي....انتي هتقوليله على التصميم اللي انتي عايزاه هو بقى هيتحكم في الالوان في الشكل كل دة هيفرق طبعا
...يا زوزو انتي هترقصي في مكان بيجيه كبار رجال الأعمال من كل مكان وعشان كدة مهم مظهرك
فكرت شويه لقيت انه معاه حق وعلى كل حال برضه انا مش هعمل حاجه غصب عني
_ خلاص يبقى اتفقنا....اقدر ابدء معاكو امتى
……..................……..…..
_ ومش عارفه بقى هو يقصد ايه بالكلام ده؟!
ردت عليا غدير النايمه جانبي عالسرير ...بعد ما خلصنا عشا كله راح على مكان نومه ...ميمو قال لازم كلنا ننام كويس عشان الولاد يكونوا فايقين وكويسين الصبح..ومن وقتها وكل واحد في أوضتة
_ هيكون يقصد ايه يعني يا سلمى...أكيد يقصدك انتي طبعا...مش بتقولي احساسك ونظراته...يبقى خلصانا..
رديت عليها وانا بلعب في شعر فيروز اللي اصرت تنام معانا هنا بحجة انها متعودة تنام في حضن مامتها
_ ايوا بس هو ماقلش حاجة وانا هموت واسمع اي حاجه منه
قاطعني صوت خبطة عالباب مش ممكن تكون خبطة اي حد تاني غيره.... قومت حطيت حجابي على شعري وفتحتله
كان لابس هدوم نومه بنطلون قطني وتيشيرت بنص كم
_ ايه يا ميمو...محتاج حاجه؟
_ معلش يا سلمى ...كنت شفت غدير بتاخد دوا كدة بعد العشا ولما الولاد سألوها قدامي قالت انه برشام بيساعدها على النوم
سمعت صوت غدير ورايا لما سمعتنا
_ ايوا يا ميمو معايا
_ طيب معلش يا غدير اديني حبايه اصل مش عارف النوم مش عايز يبجي ليه .... ولازم ننام كويس عشان اكون فايق مع الولاد بكرة
هزت راسها بمعنى حاضر وراحت فعلا تجبله .... بصيت في ملامحة لقيته غمض عينه ونزل راسه بتعب شكله وملامحه كلها أرق فعلا زي ما يكون ما بينامش ابدا
_ اتفضل يا ميمو ...بس ياريت تخليه نص او ربع زي ما انا ما أخدت لانه تقيل قوي... والحبايه كلها هتنيمك اليوم كله تقريبا
هزلها دماغه بمعنى تمام ... لقيتني بنادي عليه قبل ما يدخل أوضته
_ ميموو
التفت يبصلي بعيونه التعبانه دي
_ انت كويس ؟
بصلي شوية... بعدين حسيت حركة غدير دخلت الاوضة وسابتنا خرجت انا خطوة وسألته تاني بصوت يبان اهدى
_ ميمو...مالك ...شكلك تعبان قوي
رد بصوت كأن هم الدنيا كله مليه
_ لأ مفيش..ارهاق النوم بس اللي قولتلك عليه قبل كدة
بعدين ابتسم نص ابتسامة كدة واستأذن ودخل أوضته ...خرجت من الاوضة وانا بفكر ...ماله بس حقيقي شكله كدة بيضايقني قوي ...بجد الله يسامحها اللي مسبباله كل دة ... وقفت بخطواتي وبصيت قدامي بعيون واسعة وابتسمت غصب عني لما تفكيري جابني ان معقوله وممكن تكون اللي تعباه كدة دي انا....طب ليه بس ... دة لو يعرف اللي جوايا ليه ...
اتنهدت وانا بفتكر نظراته اللي انا حاسه فيها انه عارف انا كمان بفكر فيه ازاي ...يبقى ايه اللي تعبه كدة بس....
عديت من قدام أوضته وفي لحظة ادراك ان لو بابا او قصي حد منهم عرف بس اني في بيت واحد مع شاب غريب عني هيبقى ايه موقفهم دلوقتي.... يمكن اللي مخفف من حدة الموقف وجود الولاد وغدير ... كمان عدم فراغ ميمو... هو فعلا طول اليوم مشغول مع الولاد بشكل اظهر عليه التعب فعلا ...بس في نفس الوقت كنت بشوف على ملامحة سعادة بوجودة وسطهم وتعامله معاهم وسعادة بفرحتهم بوجوده هو معاهم ...لما بشوف تعامله مع الولاد وطريقته بحس اني بقع فيه أكتر ... استغفر الله العظيم يارب ... انا لازم اول ما نرجع احاول اتجنبه بقدر الامكان عشان حاسه ان كل اللي انا حاسه بيه دة غلط وعك ....
وصلت غرفة الولاد ...لقيت الحمد لله نايمين ... حكمت عليهم البطاطين كويس وطلعت على غرفة البنات .... وعملت نفس الكلام وفي لحظة متخلفه تخيلت بيتنا وانا بطمن كدة على ولادنا وهو معانا أمانه وحسه في البيت ... نفضت دماغي بسرعة من التفكير الغير مبرر دة ...
_ اموت واعرف جبتي الهبل والتخلف دة كله منين ...ايه الخيال الاوفر دة!!!
حطيت ايدي على بوقي اول ما حسيت اني فعلا بكلم نفسي وبصوت كمان وانا بعدي من قدام أوضته...عديت بسرعة اروح اوضتي انا وغدير وانا مش طيقاني ولا طايقه تفكيري دة .... ايه الغباوة دي!!
_ اااه....ايه يا زفته انتي حد يقفل الباب كدة...فزعتيني!!!
مشيت روحت للسرير افرد جسمي جنبها وانا على وشي تكشيرة وضيقه تخنق
_ معلش...غصب عني
لقيتها اتعدلت وسابت الموبايل من ايديها
_ مالك يا سلمى... على فكرة انا شبه متأكدة ان ميمو في في حياته حد وأكيد الحد دة انتي ....بس هو بس اللي بيعمل فيها تقيل شويه ومبيبينش
فكيت طرحتي حطتها جنبي وفردت الغطا عليا وانا مخنوقه من كتر التفكير في دة... حقيقي اول مرة مبقاش عارفه اسيطر على مشاعري كدة... وعشان كدة الصح اول ما نرجع ابعد علطول...دة الصح..
_ اللي في الخير يقدمه ربنا ...تصبحي على خير
ادتها ضهري وغمضت عيني احاول انام في الليله دي....بس فاجأة أخدت بالي من حاجة غدير فاتحه التليفون عليها...قومت واتعدلت تاني وحاولت ابص....ايه دة!!!!
_ قصي!!!!
التفتت تبصلي .... بعدين حطت الموبايل على جنب....المفتوح على صفحته وصورة
_ حاطت على صفحته على فيسبوك انه في طريقة لألمانيا....سافر النهاردة الصبح
_ ايوا ...مش انا قايلالك انه هيسافر في شغل مكان بابا
بعدين اتعدلت ابصلها بأهتمام
_ غدير....انا عارفه اعجابك بقصي من وقت ما شفتيه اول يوم جه الڤيلا عشاان يعيش معايا انا بابا...بس اتمنى يكون دة اعجاب بس وهيروح لحاله ...قصي أخويا خاطب وبابا قالي النهاردة وانا بكلمه انه لما يرجع هنروح كلنا عشان نتفق على تفاصيل جوازة.
لقيت وشها زعل.... لحظة.... بعدين مسكت التليفون وقدام عيني عملت بلوك لصفحته ورمت التليفون جنبها
_ تصبحي على خير يا سلمى
وادتني ضهرها ...ميلت عليها وحاول احرك ايدي بحنيه على دراعها ... غدير حقيقي صعبانه عليا خصوصا دلوقتي بعد كل اللي عيشته مع ميمو
_ غدير... انا عايزة أقولك متزعليش ابدا ...قصي دة لطخ كدة وعلطول كشري ...الا عمره ما ضحك في وشي حتى ...دة ربنا يعين خطيبته دي عليه...انتي تستاهلي حد افضل
سمعت همسها المخلوط بخنقة عياط
_ مايمكن دي أكتر حاجة شدتني ليه..... ببقى عندك... طول الوقت عمره ما رفع عينه فيا ...قصي يتحب... بكل ما فيه....يتحب قوي يا سلمى
..…..…........................
وطبعا ومن الساعة 6 الصبح سمعنا خبط على باب اوضتنا وكل الاوض يصحينا....وطبعا قالي انا وغدير انهم يشربوا لبن وممنوع يتقلوا في الأكل والافضل ما ياكلوش دلوقتي اصلا....وبعد التمرين السريع دة وتعليمات ميمو للولاد... جهزنا انا وغدير الولاد وخلاص الباص جه ... وطبعا انا وغدير معاهم ...بس ربنا يسهل بقى وكل المجهود دة ييجي بفايدة
ركبنا كلنا وبعد ساعة تقريباً كنا وصلنا عند الملعب الكبير اللي هتقام فيه المسابقة.... ملعب كبير وزحمة من الناس والأطفال غير طبيعيه بس واضح ان التنظيم في المكان كويس بدليل وقوف المدارس المتسابقة في صفوف وفي انتظار بداية المباريات.... الاطفال من مختلف المدارس شكلهم حلو قوي في لبسهم وتنظيمهم ...
روحنا انا وغدير بعد ما اطمنا على كل شئ داخل المكان ..لقينا ميمو موقفهم صفين قبل دخولهم الملعب وكالعادة بيأكد عليهم كل تعليمات اللعب اللي بيسمعهلهم من الصبح... وبعد لحظات كانت انطلقت صفارة البداية وبدأوا...
نزلوا الولاد ولاحظت انتباه ميمو لشئ ..قرب بسببه ....ايه دة ...
....خناقه!!!!!
#رانيا_أبو_خديجة
خلاص البارت الجاي هنشوف قرار ميمو بأنه مش هيسيب سلمى وهياخد الخطوة اللي للأسف هتقضي على علاقتهم قبل ما تبدأ بس هل ميمو هيسكت ولا هيبقى خلاص لقى نفسه وبدء يعمل اللي يريحه
وزوزو خلاص راحت لنهايتها برجليها بس مش زي ما انتوا متوقعين لأ ليها مصير اعتقد غير اللي بتفكروا فيه
وهيثم وسندس وفيروز ووليد هيعملوا اية البارت الجاي عشان يكسبوا المسابقة بالعافيه والقوة
رايكم وتوقعاتكوااا قراءة ممتعة ❤️🥰
#ميمو
#رانيا_أبو_خديجة
لقراءة الفصل التاسع عشر من رواية ميمو 👇👇
🔥 الفصل التاسع عشر 🔥
للانضمام لجروبنا على الفيسبوك 👇
👈 انضمام 👉
او للصفحة الرئيسية الخاصة بالروايات 👇👇
👈 انضمام 👉
إرسال تعليق