رواية ميمو الفصل الحادي عشر بقلم رانيا أبو خديجة
رواية ميمو بقلم رانيا ابو خديجه
رواية ميمو
أولا طبعااا بعتذر عن تأخيري كل الفترة دي كان عندي امتحانات والله والدنيا يعني كانت ملخبطة معايا أخر حاجة...فمعلش بقى باذن الله نرجع نلتزم تاني... قراءة ممتعة ♥️♥️🥰
الفصل الحادي عشر
#ميمو
#رانيا_أبو_خديجة
_ مين!!! انت!!!
اول ما التفت ليها وشفتها ...لقيتها قالت الجمله دي باندهاش وذهول على وشها ..قربت منها خطوة...والله وحشتني قوي أشوف ملامحها عن قرب كدة ...ابتسمت اكتر لما شفت زهولها اللي على وشها دة ..ياااااه...كان نفسي تكون مش لابسه النضارة دي ..مخبيه عينيها..اللي انا متأكد ان فيها لامعه دلوقتي
هو ....هو بنفس وقفته وهيئته وابتسامته المتوجه ليا دي ...انت عارف بقالي قد ايه بتخيل اني أشوفك تاني ...بس برضه بيعمل ايه هنا...
كنت واقفة مش فاهمه...ايه اللي جابه هنا ..هنا في اوضة المديرة ومدرس ايه اللي افرجه عالمدرسة...هي قالت مدرس؟!
لقيت المديرة جاية من ورايا وبتبصلنا باستغراب...وركزت عليها هي وهي رافعة وشها ومتنحالي كدة
= ...ايه يا سلمى....انتي تعرفي الاستاذ ؟!!
لقيتها لسه متنحه ليا بنفس بصتها وكأنها مش سامعاها اصلا...
بصيت للست وبصتلها ... وشاورت بوشي حركة وغمزت بعيني بجديه ...تاخد بالها....جمعت حواجبها باستغراب وشكلها مش فاهم حاجه خالص ...لو تعرف شكلها لطيف ازاي وهي مذبهله كدة...
= سلمى ...بقولك تعرفي المستر؟!!
_ ها...لأ ..قصدي اه اعر..
_ الحقيقة انا معرفهاش....اول مرة اشوفها
لقيتها التفتت بحدة تبصلي .... غصب عني ابتسمت اكتر من نظرتها اللي حقيقي تضحك دي....لفيت ادي ضهري للمديره اللي اكيد بالمنظر دة هتشك فينا أكتر وبصتلها هي
= طيب ...اتفضل حضرتك مع مس سلمى ...هي هتعرفك نظام المدرسة وجدول شغلك ... وفين مكان التدريب في المدرسه...
كانت لسه بصاالي ومبتتحركش من مكانها
_ طيب يلا يا استاذة ولا ايه
ضيقت عنيها وبصتلي بصه عمري ما هنساها وحقيقي في اللحظة دي كنت هضحك بجد من ردود افعالها المتتاليه اللي على وشها...
_ يلا
قولت كدة ومشيت اتجاه خروجي من المكتب وحسيت بيها بعد لحظة جاية ورايا
= اه...لحظة يا سلمى
التفت انا وهي مرة واحدة نبص للمديره
لقيتها بتمد ايديها ليها بالملف اللي انا قدمتهولها
= خدي ده ابقي نزليه في طريقك للشئون تحت يحفظوا في مكتب حفظ البيانات
التفتت تبصلي بعدين مشيت بهدوء واخدته منها ...تفتحة تبص فيه... لحظة والتانيه
_ نعم!!!!!!!!
قالت كدة بصوت يخرم الودان اول ما رفعت وشها من الملف
_ ايه يا استاذة سلمى..في حاجة حضرتك معترضه عليها في السي في بتاعي؟
لقيتها قفلت الملف بعصبيه
_ لأ مفيش اتفضل معايا حضررررتك
_ اتفضلي
قولت كدة وانا بمد ايدي علامة ان تمشي قدامي وفعلا خرجت بنرفزة
………..........................
اول ما خرجنا من اوضة المديرة...حصل اللي كنت متوقعة ...كنا في طرقة المدرسة الفاضيه كله في الفصول الا انا وهي.... لقيتها اول ما بعدنا عن المكتب التفتت بحدة
_ انا عايزة افهم دلوقتي حالا...ايه اللي بيحصل ده....بقى انت مدرس التربية الرياضية الجديد...ازاي يعني..مش فاهمه؟!
التفت بهدوء ابص قدامي....لعل وعسى هدوئي دة يهديها ويخليها تهدي صوتها العالي من وقت ما شافتني هنا...وسندت ايدي الاتنين على سور مطل على حوش المدرسة
_ براحة كدة وقوليلي ايه اللي انتي مش فهماه وانا افهمهولك...ولا اقولك السي في بتاعي معاكي تقدري.....
_ ال ايه!! بقى انت معاك كل الشهادات اللي في البتاع دة.... انت معاك خبره في كل الالعاب والرياضات دي...ازاي وامتى ان شاء الله ؟
فتحت الملف بصت فيه تاني وقفلته بنرفزة
_ وحضرتك بتشتغل مدرس تربيه رياضيه بقالك خمس سنين...ازاااي!!! انا عارفه من هيثم يمكن من قبل ما أعرفك كمان انك بتشتغل في الخشب من زمان.
بصيت للحوش الواسع من فوق كدة ورديت عليها
_ شوفي... بقى الست اللي جوه دي يهمها قوي الشهادات والملف اللي في ايدك دة...لكن انتوا بقى والولاد عايزين الخبره وانا بقى مش هتكلم عن نفسي ....هخلي شغلي هو اللي يتكلم عني
بصتله وانا مش مستوعبه البرود والتناكه اللي بيتكلم بيها دي
وفوق كل الهدوء والبرود ده لقيته مطلع علبة السجاير اللي مفيش مرة اشوفه الا لما أشوفها معاه ....
برقت بعيني وانا هموت من الزهول من البني ادم دة لما لقيته ولعها وبدء يطلع دخان من بوقه ...اتعميت من الدخان دى
لقيت نفسي بسحب السيجارة من بين شفايفه
_ في كابتن رياضي ...هيدرب اطفال يشرب سجاير...ثم ان دي ممنوعه هنا...اكيد مش محتاجه اقول لحضرتك
بصلي بعدين لقيته دخل العلبه الجاكت
_ في دي معاكي حق ...
_ انت عارف انت عملت ايه...انت مزور وفوق كدة كمان مش مستوعب انت عملت ايه ولا ايه المصيبه اللي لو اتكشفت هتسببها لنفسك
بصلي بنفس برودة دة بعدين لقيته التفتلي كله
_ انا عملت كدة عشان....
سكت ليه دة؟!
_ عشان هيثم ...الولد خايف ومتعقد ولا امشي انا بقى وخليهم يجيبولكوا متحرش جديد
_ استنى هنا ....
قالت كدة وبصتلي شويه بعدين اتنهدت واتكلمت بهدوء
_ ميمو...انا خايفه فعلا...خ.. خايفه عليك ...الست اللي جوه دي لو عرفت ان فيه حاجة واحدة بس في السي ڤي ده مش صحيحة مش هتسكت...صدقني
ابتسمت اول ما قالت كلامها دة وبصوتها الهادي اللي افتقدته من وقت ما فتحت بوقها النهاردة...بس عينيها...لو اشوف عنيها وهي بتتكلم كدة
هو ماله دة متنحلي وهو مبتسم كدة ليه ...انا بقول ايه وهو بيعمل ايه....لقيته قرب خطوة واتكلم وهو بيمد ايده يسحب النضاره من على عيني... إيه دة في ايه... بعدين قرب تاني وهو بيقفل النضارة واتكلم وعينه الجريئه دي في عيني
_ متخافيش عليا...ميمو نفسه ما بيخافش عشان انتي تخافي...اطمني
بعدين لقيته اتعدل في وقفته وحط ايدة في جيوب الجاكت اللي لابسه
_ ايه ..مش هتوريني المدرسة زي ما مديرتك قالتلك ولا اقولها تجيبلي حد تاني ؟!
_ ميمو...
_ نعم
_ امشي لو سمحت ....انا قلقانه فعلا
_ بقولك ايه... هي المدرسة دي فيها مدرسين رجاله كتير ....يعني بلاحظ ان معظمكم ستات
_ اوف ...انا بكلمك في ايه وانت بتقول ايه... يا ميمو اسمعني..
_ بس انا عرفت ليه مفيش فيها مدرسين رجاله كتير....ماهي مرتبات الست اللي جوا دي مفيش رجالة تعمر هنا بيها.. انتوا بقى صابرين عليها ليه؟
_ ليه...هي قالتلك مرتبك كام؟
_ مش مهم بقى.... والله لما قالتلي كنت عايز اقولها خليهوملك ولو محتاجة عليهم اديكي
بصتله...وغصب عني ضحكت على كلامه عن المديرة اللي هو لسه مقابلها من دقايق بس....
لقيته بصلي تاني وهو كمان بيضحك ... سحبت نضارتي من ايدة البسها من عينه الصعبه دي
_ ي يلا اوريك شغلك هيكون فين ..و..واعرفك عالولاد
…..…..…….....................
كنت قاعده عالسرير ومشغوله بالفساتين اللي جبتها جديده للشغل...اصراري ان انا اللي اجيب كل هدومي رغم كلام كمال الجديد دة....خلاني احس اني لازم ابقى افضل من كدة واشيك كمان
_ ماشي يا كمال ....انا بقى هفرجك الشياكة والاناقه من زوزو عامله ازاي
كنت قصيت فستان نبيتي لسه شرياه ...وناويه احطله تطريز في كل حته....انا بقى هوريهم الشياكة والاناقه بتاعة زوزو شكلها ايه
= زوزووو...بت يا زوزوو
_ تعالي يا هند انا هنا
استر يارب ومتعملش تحقيق كل مرة
= انت يا بت انتي بتعملي ايه...ما تيجي نشوف هناكل ايه النهارده انا بفكر اعمل قلقاس ولا اعمل بطاطس؟!
رديت عليهاوانا بكمل قص الفستان ومن جوايا بدعي انها تعديها ومش لازم تسأل زي كل مرة
_ عادي يا هند اهي كلها نشويات تطخن ...اطبخي انتي وانا ابقلظ
اه سكتت ...اضطريت ارفع وشي عن الفستان وابصلها واستعد لكوم الاسئله بتاع كل مرة تشوفني قاعده القاعدة دي
= ايه يا بت اللي انتي بتهببيه ده؟!
_ ده فستان قديم ...ناويه اعمله بنطلون
= بنطلون!! ودة من قلة بناطيلك.... وبعدين يا بت انتي مش لسه امبارح داخله عليا بشنط قد كدة ... والاسم شاريه هدوم جديده وانتي قاعده تصلحيلي في القديم
_ يا خالتي ...يا خالتي متركزيش كدة الله يسترك.... أخاف تتعبي مني ولا يجرالك حاجة
= ان مكنتش هركز معاكي يا بنت سهير ...اركز انا مع مين...دة اخوكي رايح جاي يسألني ويوصيني أخد بالي منك في غيابه
اخيرا خلصت قص الطول الغريب دة .... نبدء نحط التطريز اليدوي بقى
_ متخافيش يا خالتي.... وبعدين انا قولتلك انا بحب اصلح حاجاتي كدة مع نفسي
بعدين حاولت اغير الموضوع عالله تقبل بالتغيير
_ قوليلي بقى هتعملي قلقاس وبطاطس وايه تاني؟
…….........................
اخيرا اتخلت عن كلامها ..بلاش وقلقانه وامشي... وبدأت فعلا توريني كل جزئية في المدرسة....كانت ماشيه قدامي وانا معاها بتشرحلي كل حاجة فعلا
وانا جاي النهاردة مكنش في بالي ابدا ان الجوله والوقت دة هيبقى معاها هي....كنت مبسوط وهي معايا شويه تندمج وتتكلم بجدية وشويه تبصلي وتتنهد بيأس وقلق يبان على وشها
دخلنا الفصول عشان تعرفني عالولاد وتوريني ليهم....دخلنا فصل فصل.... الفصول هنا منظمة جدا والأطفال شكلهم صغير قوي في براءة غريبه على وش كل واحد فيهم .... كنت ببتسم تلقائي اول ما عيني تيجي في عنيهم
خرجنا من فصل ودخلنا فصل دخلته قبل كدة وعارفه كويس...الفصل اللي فيه هيثم
اول ما دخلت الفصل لقيت الاطفال بصولي كلهم الا هيثم كان قاعد بيتكلم مع بنت في الصف اللي جنبه .... بس لحظة ولقيت زميله اللي جنبه نبه بايده وشاورله اتجاهنا ...اول ما بصلي ...لقيت حماس وبهجة
_ ميم....
كان لسه هيصرخ باسمي كالعادة....شاورتله يهدا كمان عشان المدرسة اللي واقفه ...ابتسملي بحماس وقرب يوشوش زمايله اللي جانبه وهو بيشاور عليا
_ اعرفكم يا ولاد دة مستر ميمو مدرس التربية الرياضية الجديد ... هيبقى معاكم وهيختار مع كل واحد فيكم هو ميال يتدرب ايه بالظبط من اول وجديد بعيدا عن المستر اللي كان معاكم قبل كدة
_ ميمووو....بجد انت المستر الجديد؟!!
لقيت سلمى بصتلي بعدين بصتله
_ ايوا يا هيثم...مستررر ميمو هو المدرب الجديد
قولت كدة وبضغط على مستر دي يمكن اصدقها وانا بتكلم كدة ...لحد دلوقتي مش قادرة استوعب اللي بيعمله...لاحظت نظرة هيثم ليه واشارة ما بينهم لقيته هو كمان بيغمز للولد وحماس على وشهم يخوف ميطمنش
اتنهدت وانا من جوايا بقول استر يارب...انا مش قد حركات المجانين دول ...وبدأت انجز بسرعة عايزة اخرج من الفصل دة حالا....انا اصلا عايزة اراوح
_ حد يا ولاد عنده اي سؤال او استفسار حاليا لمستر ميمو ولا نمشي؟
_ انا يا مس
_ اتفضلي يا سندس
_ ينفع حضرتك تبقى تعلمني اركب الموتوسيكل زي هيثم؟!
التفت ليه بحده...ماهو دة اللي ناقص يفسدلي باقي المدرسة مش كفايه عليا هيثم
لقيته ابتسم كدة نفس ابتسامته اللي بحسها بتطلع بدل ضحكته دي
_ ان شاء الله يا حبيبتي هعلمك كل حاجة انتي عايزاها
_ طب ينفع كمان تعلمني.....
_ سندس!!! اقعدي يا حبيبتي اقعدي وربنا يستر...
بعدين التفت ابصله
_ اتفضل حضرتك...نكمل..
خرج بنفس هدوئه وبرودة ولا كأنه هينقطني من الصبح....
…………..........….
بعد مرور أسبوع
صحيت من النوم ...اتعدلت وبصيت في التليفون جنبي ..مديت دراعاتي واتمطعت وانا ببتسم ....هشوفه كمان النهاردة مش مصدقه ان بعد الغياب دة كله بقيت بشوفه كل يوم
قومت وروحت افتح دولابي ...يا ترى هلبس ايه النهارده..مش عارفه بقالي اسبوع تقريبا بقف واحتار نفس الحيره ... فضلت ادور في الهدوم لحد ما طلعت طقم ملبستوش في المدرسة قبل كدة...مكون من بنطلون واسع ابيض وعليه كارديجان طويل وردي وتيشيرت ابيض وكوفيه وردي على أبيض وحجاب أبيض ....
اخيرا خلصت لبس ... ولبست كوتشي ابيض واخدت شنطتي ونزلت
_ سلمى
التفت على صوت بابا ...خارج من أوضته
_ صباح الخير يا حبيبي
_ صباح الخير...انتي نازله ؟
_ رايحة الشغل ومتأخره جدا ... حضرتك عايز مني حاجة
_ ايوا...قصي اخوكي دايما يسأل عنك يا بره...يا اما في الشغل...ايه رايك تظبطوا يوم مع بعض ونخرج سوا.
انا وقصي مع بعض....اتنهدت وانا بسمع بابا...محاولات بابا من واحنا قد كدة انه يقرب ما بينا ويجمعنا في اماكن سوا...لكن انا منكرش اتربيت على انه مينفعش يكون في حياتي بالسماحة دي ...غصب عني
_ بابا...انا حاليا اتأخرت جدا ..اول ما ارجع نكمل كلامنا في الموضوع دة اوعدك ..بعد اذنك
سيبتوا وانا عارفه على وشه خيبة امل جديدة...بس أكيد كان متوقعها.
اخيرا...ربع ساعة بالظبط وكنت عند المدرسة واول ما وصلت ولسه هدخل ...سمعت صوت موتوسيكل قوي جاي من بعيد...وقفت ولفيت ابص ...ابتسمت وانا عارفه اني هشوفه واليوم كله هيبقى معاه زي باقي الايام اللي فاتت... بعدين ابتسامتي اختفت اول ما شفته....
#رانيا_أبو_خديجة
يا ترى ليه ابتسامتها اختفت اول ما شافته...؟؟...عامل كارثه جديده ولا ايه😂♥️
ويا ترى ميمو هيبقى حاله ايه في المدرسه والدنيا هتمشي ازاي لسه مشوفناش حالته مع الولاد والمدرسة ايه؟
احداث كتير جايه واخيرا هندخل في الفصول اللي انا مستنياها من اول الروايه ♥️♥️🙈
رأيكوااا وتوقعاتكوااا ودايماااا يااارب قراءة ممتعة ❤️🥰 وتفاعل عالفصل با بشرررررر
#ميمو
#رانيا_أبو_خديجة
لقراءة الفصل الثاني عشر من رواية ميمو 👇👇
👈👈 الفصل الثاني عشر 👉👉
للانضمام لصفحتنا على الفيس بوك 👇
👈👈 الانضمام 👉👉
او جروبنا على الفيس بوك 👇👇
👈 الانضمام 👉
إرسال تعليق