رواية ميمو الفصل الثاني عشر بقلم رانيا أبو خديجة
روايه ميمو بقلم رانيا ابو خديجه
رواية ميمو
الفصل الثاني عشر
#ميمو
#رانيا_أبو_خديجة
سمعت صوت موتوسيكل قوي جاي من بعيد...وقفت ولفيت ابص ...ابتسمت وانا عارفه اني هشوفه واليوم كله هيبقى معاه زي باقي الأيام اللي فاتت... بعدين ابتسامتي اختفت اول ما شفته....واتحولت تدريجي لعيون بتلمع مركزة معاه وبس
كان جاي من بعيد ... لابس نضارة تخفف من اندفاع الهوى على عنيه وجاكت اسود مفتوح بيطير عكس اندفاع الهوى.... ملامحه تبان من بعيد جديه جدا..شكله من بعيد كدة يسحر .... اتنهدت من احساسي اللي بيلاحقني كل مرة بشوفه فيها وكأنها اول مرة ... كأني مراهقه واقفة قدام المدرسة مستنيه حبيبها المراهق اللي جايلها بالموتوسيكل... حبيبها المراهق!!! هي وصلت لكدة؟!!!
عنفت نفسي من تفكيري دة ووقفتي وبصتي عليه كدة ودخلت من باب البوابه ... كان الحوش فاضي بعد ما كل الولاد طلعوا ...اتعمدت اتمشى براحة وانا طالعه...وفعلا من غير ما التفت ورايا كان دخل من باب المدرسة وسمعته هو بيركن الموتوسيكل بتاعه
_ سلمى
وقفت أول ما سمعت صوته ولحظة والتفت ليه .... لقيته خلص ركنة الموتوسيكل وقرب
قربت منها وحمدت ربنا اني لحقتها ...بحب أشوفها الصبح وابدء اليوم بيها... شكلها حلو النهاردة....
هنستهبل!! هي أصلا حلوة كل يوم ....
_ صباح الخير
رديت عليه وانا ببص في ساعة ايدي
_ صباح النور...ايه اللي أخرك كدة....انت عارف الساعه كام؟
لقيته ابتسم ابتسامته الجانبية دي
_ هو انا لواحدي متأخر...انا شايفك وانتي لسه داخله قدامي
_ النهاردة استثناء ..انا مش من عادتي التأخير ...لكن انت ...انا ملاحظة تاخيرك كل يوم
اتكلم واحنا ماشيين مع بعض طالعين سوا
_معلش كان لازم اعدي الأول على...
بعدين سكت و وقف وبصلي
_ وبعدين دة اذا كان عاجبكوا يعني...مش كفايه اني سايب شغل بألوفات وجاي اشتغل معاكوا هنا بمرتباتكوا التعبانه دي
وقفت وبصتله بعيون واسعة مندهشه من رخامته...لقيته بيبصلي بتسليه ونفس الابتسامه اللي انا مش بحبها دي عشان بحسها بتغيظني
_ لأ ثواني كدة....ايه التضحية اللي في صوتك دي!! انت ليه محسسني إنك بتضحي عشانا .... !!
_ ولو مضحتش عشانكوا هضحي عشان مين يعني
_ لأ يا سيدي شكرا...ولا اقولك الله الغني عن دي خدمات وروح بقى شوف شغلك اللي بألوفات دة... ووسع كدة وسع
قالت كدة وسابتني وطلعت السلالم جري.... ابتسمت وانا بطلع وراها....
_ سلمى
_ يا نعم ....عايز ايه...انا متأخرة عالفصل بتاعي على فكرة
_ يعني هو الفصل هيسيبك ويمشي
قالي كدة بنبره هااديه وكانه بيوشوشني
_ بقولك ايه...تيجي نطنش الحصة الأولى دي ونفطر سوا ... انا ميت من الجوع على فكرة ولسه مفطرتش
لقيتها حطت ايديها على بوقها وبصت يمين وشمال وانفجرت ضحك....
طب دة ايه الصباح الحلو دة بقى
ابتسمت على ضحكها ...طب انتي عارفه اني مبفطرش اصلا ... اخيرا خلصت ضحك بس انا مخلصتش بص في وشها
_ ميمو...انت عايزنا نزوغ من المدرسة
لقيته قرب خطوة واحنا اصلا واقفين عالسلم ومفيش خطوات واتكلم ببتسامتة ونبره بقيت بشوفهم اليومين دول كتير
_ تيجي؟
ضحكت تاني
يا بنتي والله ثانية كمان وهبوسك...
اهي حطت ايديها تاني على بوقها اهي لما ضحكتها زادت ... سمعتني دي ولا ايه
_ انا عموما مش بفطر دلوقتي يعني خليها عالفسحه كدة...اتفقنا
_ حصل
.……............…..…..…...
خلصت الحصة التانية وخرجت من الفصل عشان ادخل الحصه الي بعده .... وطبعا وبشكل فضولي بحت قربت ابص عالحوش من فوق .... ولقيته فعلا لامم الولاد حوالية زي كل حصصه .... وفضل يكلم فيهم شوية ... بعدين بدأوا يجروا وفي وسط الجري يقفوا يعملوا حركات رياضيه وبعدين يكملوا ... ابتسمت اكتر لما لقيت الدور في الجري جه على جميلة بنت المدرسه كلها وزمايلها عارفين بظروفها ... شالها هو على كتفه وجري بيها المساحة بتاعتها وسط ضحكها وتشجيع زمايلها اللي ميمو بيقولوا وهما يردوا وراه في حماس ... الغريب فعلا اني مكنتش متخيله انه الولاد هيحبوا كدة وبالسرعه دي والغريب اكتر انه بيتعامل وكأنه متقن المهنه فعلا ... وكأنه فعلا مدرب محترف .... بصيت نظرة أخيرة وهو بيمسك هيثم من ودانه عشان قفشه سايب الصف وواقف بعيد مع سندس وبنتين كمان ... ضحكت على شكلهم بعدين اتنهدت والتفت ادخل فصلي لكني لمحت حد واقف على بعد خطوات مني ومصوب نظراته وبيبص على نفس اللي انا كنت ببص عليه....قربت خطوة اتحقق من اللي انا شيفاه... وايه الابتسامه الغريبه دي ... طيب خدي بالك بقى بوقك هيوصل لودانك ومش هتعرفي تجبيه
اتنرفزت فعلا من بحلقتها فيهم كدة وبالابتسامة السمجة دي ...مالها وفاء بجد؟!
لقيت نفسي واقفه قدامها بعد ما خطواتي سبقتني بشكل تلقائي
_ ايه يا وفاء معندكيش حصص ولا ايه؟
ردت وعنيها برضه هناك ..بس الضحكة والإبتسامة بقت معقوله شويه
_ اه يا سلمى عندي ...بس قولت الواحد ياخد نفسه من الفصل والعيال شويه... واهو الولاد ياخدوا بريك صغير كدة
بصتلها وانا هاين عليا انزل اقول لميمو ان في واحدة سمجه هنا مركزة معاه
_ ا..ا ايه رايك في المستر الجديد دة صحيح
_ مستر ميمو..دة ونعمة الاخلاق يا بنتي غير الحيوان شريف دة ... وحقيقي دايما براقبه القيه بيحب الولاد والولاد بيحبوا .. حقيقي المدرسة كسبته
طب ليه اتضايقت اكتر بعد كلامها دة...مش المفروض اتضايق لو العكس!
_ لأ.. لأ مش حاسه برضه ....على فكرة انتي بتبالغي عادي واحد مدرب عادي يعني
_ يا شيخه ابالغ ايه بس حرام عليكي...انتي مش شايفة طريقته ولا معاملته معانا ومع الولاد عامل...
_ طريقته معانا ازاي يعني....هو له كلام معاكي اصلا
لقيتها سكتت وبصتلي
_ عادي يا سلمى زمايل
بعدين ابتسمت ابتسامه محبتهاش كدة
_ بس انا اوقات بلاحظ انه ليه معاكي انتي
_ انا!!! لأ طبعا .... بقولك ايه احنا اتأخرنا عالولاد انا داخلة أشوف شغلي ياريت انتي كمان تدخلي فصلك
.......……...........
كنت قاعد في مكتبي مندمج في شغل مش عايز يخلص... بقالي تقريبا خمس ساعات عالحاله دي ....بابا حاليا بقى يعتمد عليا في كل شئ تقريبا....اكيد دة ارهقني جدا وتعبني قوي لكن قد ايه محسسني اني قريب منه وبشيل عنه .... كفاية محاولاته طول الوقت انه يقربني من سلمى ويفكك العقد اللي بيني وبينها...
سلمى!!
اتنهدت اول ما افتكرتها وافتكرت مواقفها معايا طول الوقت اللي اقل ما يقال عنها انها مواقف بايخه ...
سبت الاب توب وعيني انحرفت على صورتها الموضوعه جنب صورة أبويا عالمكتب....مش انا اللي حطتها ...وطبعا مش محتاج اخمن ان بابا هو اللي عامل كدة.... بصيت للتليفون ورفعت السماعة اكلمها ....لكن اترددت على اخر لحظة...بقالي كام يوم مبشوفهاش ...على ما برجع بتكون نامت...والصبح تصحى قبلي عشان شغلها...
سمعت خبط عالباب بعديها السكرتيرة دخلت
_ قصي بيه... انسه نسمه بره ادخلها
سكت شوية استوعب وجودها
_ دخليها
قومت من ورا المكتب ووقفت اقابلها
وبعد لحظة دخلت بنفس ابتسامتها وملامحها الجذابه..جدا
_ قصي...ازيك
_ اهلا يا نسمة...اتفضلي...
قعدت عالكرسي المقابل للمكتب وطبعا قعدت عالكرسي اللي قدامها ...سكتت شويه بنفس خجلها اللي بترجمه طول الوقت في صمتها
_ باباك قالي انك في الفرع هنا...فقولت يعني أجي أشوفك
_ اهلا بيكي في اي وقت
سكتت تاني تحرك ايديها على حرف شنطتها بارتباك... الحقيقة ان هي نسمة زي اسمها بالظبط ... خجولة جدا ... ونادراً لما بشوفها لواحدها او تفكر تجيلي هنا .. بحس بكسوفها من قبل حتى ما أشوف الوان وشها اللي بتعبر عن مدى خجلها وهي قاعدة قدامي كدة
نسمة بقى شفتها واتعرفت عليها في حفله كانت عملاها شركتنا لنجاح صفقة مشتركة مع شركة باباها وكان حاضرها وقتها والدتها وهي .... طريقتها وقتها وكسوفها وانها لازقة لوالدتها طول الوقت لفت نظري وحسسني انها غير الموجودين...كمان لبسها وطريقة...
أخدت بالي وانا ببصلها من خصلة يبان نعومتها من لمعانها خارجة من حجابها .... شاورتلها عليها تدخلها جوه الطرحة
لقيتها ارتبكت أكثر من ارتباكها من سكوتها ونظراتي ليها .... وبصتلي بعدم فهم .... اتنهدت
شاورت بالقلم افهمها
حركت رأسها بمعنى حاضر وعدلت حجابها فعلا .... يمكن من يوم خطوبتنا ومفيش كلام بينا كتير ودة أفضل بالنسبالي لأني بشوف ان ملوش لازمه طول ما هي لسة مش حلالي
رفعت راسها تدريجي...هتتكلم
_ احم.... بابا قالي أسألك لو يعني حابب تيجي تتغدا عندنا النهاردة...
سكتت بتوتر وبعدين كملت
_ هو وماما واخدين بالهم انك مش بتيجي خالص ولا حتى يعني..
سكتت تاني
_ ...كملي .. سامعك
_ ولا حتى بتحاول تيجي عشان تشوف.. تشوفني
قالت كدة وعنيها على شنطتها اللي تقريبا خربشتها من كتر ارتباكها اللي بترجمه في حركة ايديها وصوابعها عليها
انحنيت لقدام اسند بدراعاتي على ركبتي وحاولت اتكلم بصوت هادي جدا ليها هي بالذات
_ شوفي يا نسمة انا مش حابب فترة خطوبتنا تبقى كدة .... انا عارفك كويس من كلام بابا عن والدك والاسرة كلها فالموضوع مش محتاج الاحتكاك والاقتراب الزيادة دة ... وان شاء الله لما تبقي مراتي وفي بيتي هنزهق يا ستي من بعض
بصتلي وسكتت بزعل وتكشير .... وفضلت ساكته... حسيت بشفقه اتجاهها ....هي خجوله جدا ومش بتعرف تعبر كتير عن اللي عايز تقوله
اتكلمت انا بنبرة اهدى احاول اخليها تتكلم باريحيه عن كدة
_ لو عندك اي اعتراض على كلامي قولي انا سامعك
فضلت على حالتها شويه بعدين رفعت وشها وعنيها ليا
_ انت تعرفني زي ما بتقول حتى لو بالسمع مع ان دة مش كفايه...لكن انا....انا يا قصي معرفكش كفايه ...فكنت يعني...
_ هممم ...كملي ...سامعك
_ كنت بقترح لو يعني نستغل فترة خطوبتنا ونعرف بعض ونقرب من بعض اكتر .... اكيد دة هيبقى افضل من اننا نتجوز واحنا حاسين اننا منعرفش حاجة عن بعض
لوهله فكرت في كلامها ... انا فعلا معرفش عنها كتير بس لما اعرف ايه اللي هيحصل يعني ... خلاص انا اخترتها تبقى زوجتي واللي اعرفه عن والدها وتربيته ليها يخليني كمان ابقى مطمن مين هتبقى أم عيالي بعدين.
_ طيب انتي شايفه ايه اللي ناقصنا او ناقص علاقتنا من وجهة نظرك؟
_ يعني...نشوف بعض أكتر... تيجي عندنا ... اجي انا عندكم مع بابا وماما ..او يعني...نخرج مثلا
امممم هي دي دماغ البنات انا عارف..
_ للاسف يا نسمة...انا مش فاضي لكل دة ....عندي شغل
_ وانا مش هعطلك بس على الاقل تلاقي ولو ساعة في يومك ...صدقني اكيد دة هيفرق في علاقتنا بعد كدة
لقيتني سكت وببصلها ... حطت عنيها على شنطتها كالعادة
_ ماشي يا نسمة.... انا هعدي عليكي النهاردة وممكن نخرج شويه سوا
لقيتها رفعت وشها فاجأة بفرحة
_ بجد.... ماشي وانا هستناك.. بس هنروح فين؟
لقتني سكت فرجعت فسرت بخجل اكبر
_ يعني اقصد عشان اختار اللبس المناسب للمكان وكدة
_ المكان اللي انتي عايزاه...هنروحه
...…..…............................
_ طيب ...بكرة ان شاء الله هشوف الHom work...
سمعت جرس الفسحه ... في غمضة عين لقيت الفصل كله خرج ...لميت حاجتي وخرجت من باب الفصل ...كنت ماشيه في الطرقة وكالعادة رايحة لغرفة المدرسات ...لقيته مقابلني في وشي
_ على فين كدة؟
_ ميمو...خضتني!
_ رايحة فين ...دي فسحة يعني معندكيش شغل
_ كنت هدخل احضر في غرفة المدرسات ... عايز ايه ؟
_ نفطر سوا....انا جعان ومستنيكي من الصبح على فكرة
لقيتها سكتت وبصت لتحت
_ ميمو... انا مش هينفع اقعد اكل معاك لواحدنا ...أكيد هيبقى شكلنا مش الطف حاجة سواء كان هنا او حتى نزلنا مع بعض
_ ومين قالك اننا هنقعد لواحدنا؟
_ اومال مين هيقعد معانا
.... بصتلها بحيرة وكنت لسه هرد اي رد...
= مستر ميمو مستر ميمو ابعد وليد عني عمال ياخد مني الشيبسي بتاعي
= انا برضه اللي خادته منك ولا انتي اللي عماله تضايقني من الصبح عشان مردتش اديكي من سندوتشاتي متصدقهاش يا مستر ميمو دي كدابه
بصتلهم بتفكير ...طب والله جيتوا في وقتكوا
انحنيت ليهم الاتنين وهي كانت لسه واقفه بتراقب الموقف بابتسامة طفوليه معينه كدة مبشوفهاش غير مع الولاد بس وتصرفاتهم
_ طيب ممكن يا وليد تديني سندوتشاتك دي وانتي يا فيروز تديني الشيبسي بتاعك دة
لقيتهم بصوا لبعض و بصولي ... بعدين وليد اداني علبه فيها سندوتشاته ... لكن فيروز لقيته كشرت تكشيرة حلوة كدة لايقه عليها وكأنها هتعيط
_ مستر ميمو بس انا لسه مأكلتش وجعانه
_ ميمو ...سيب للولاد أكلهم...انت بتعمل ايه؟!
شاورت لسلمى بمعني استني بس
= طيب خلاص..هدي لحضرتك شويه يا مستر وانا هاخد شويه.. عشان مش تزعل ماشي
لقيته باعت أمن البوابة يجيب سندوتشات من برة المدرسة وبدل ما أكون انا وهو لواحدنا قعد معانا وليد وفيروز بأكلهم وشويه شويه الولاد كتروا حوالينا يحطوا أكلهم معانا وكلنا ناكل من الاكل سوا .... يمكن دة الذ بريك في المدرسة دي من يوم ما جيتها... الولاد كانوا مبسوطين قوي بقعدتي انا وهو معاهم وكلهم بقوا يفتحوا أكلهم وياكلوا معانا ...
= فيروز ممكن تجيبي واحد من سندوتشاتي اللي قدامك دي
= ماشي يا وليد بس انت كمان خلصت الشيبسي بتاعي على فكرة
لقيته بيبصلهم وبيضحك عليهم وبدأ يبدل الاكل اللي قدامهم عشان كل واحد يبقى عندوا من اللي قدام التاني
_ مش عايزين خناق تاني بقى
قالهم كدة بمرح وبعدين بصلي وقالي بابتسامته
_ وانتي يا مس سلمى ايه رايك في الاكل
_ صدق لو قولتلك ان دي أحلى فسحة الولاد حضروها هنا
قرب كدة شويه في قعدته واتكلم بنبره هاديه
_ الولاد بس؟!
_ لأ طبعا.. والبنات كمان
لقيته كشر بعد ابتسامة عريضة
_ سلمى...سلم....
_ تعالي يا غدير...انا هنا
فضلت واقفه تبصلنا شويه وتبص للمه دي والدايرة اللي احنا عاملينها
_ بقى انا قالبه عليكي المدرسة وانتي قاعدة تاكلي هنا وسايباني
غدير صاحبتها دي يمكن من يوم ما جيت المدرسة هنا وانا بشوفهم الاتنين تقريبا مع بعض...ولو واحدة فيهم لواحدها يبقى من الطبيعي ان تبقى التانيه بتدور عليها....بعد كلام ومعاتبات بينهم عزمنا عليها طبعا تقعد معانا... مش دي المشكلة... المشكله ان بعديها بثواني لقينا مس وفاء داخله علينا وقالت انها كانت بتدور عليا وبرضه قعدت معانا
_ ميرسي يا مستر ميمو عالسندوتشات الحلوة قوي دي
_ بالهنه والشفا يا اساتذة...خليكم زي ما انتوا انا بعدت الامن يجيب سندوتشات تاني ....زي ما انتوا
….………...................
(بعد مرور أسابيع)
خبطت علي باب غرفة المديرة ودخلت
_ صباح الخير
_ صباح الخير... اتفضل يا ميمو ..تعالى
_ خير قولولي ان حضرتك عايزاني
_ ايوا ..قولي الاول الولاد عاملين معاك ايه
_ كويس ... وبيحبوا التمرين جدا ....ومنهم متميز فيه بشكل ملحوظ
لقيتها ابتسمت
_ الحمد لله انا ملاحظة الولاد بيحبوك وحبوا الرياضه والتمرين معاك ودة شئ لافت جدا ....وعشان كدة دة شجعني اني اقدم للمدرسة ضمن منافسات مجموعة مدارس الإدارة وعايزاك اكيد تختار افضل فريق معاك عشان هيسافروا كمان عشر أيام ...
_ دي حاجه كويسه جدا للولاد... وهتشجعهم أكتر وتحمسهم
_اكيد ...مش هأكد انك محتاج تكسف تواجدك في المدرسة خلال الأيام دي عشان الولاد يلحقوا يجهزوا ويكونوا على اعلى مستوى
_ من غير ما اكسف وقتي هنا ... الولاد هيكونوا جاهزين في الوقت المناسب ان شاء الله
_ لأ انا عايزاك بدل التلات ايام اللي بتجيهم دول ...تبقى كل يوم هنا خلال العشر ايام قبل السفر ...كمان عايزاك تختار معاك اتنين او تلاته من المدرسات زمايلك عشان هيسافروا معاك مرافقين ومشرفين مع الولاد
#رانيا_أبو_خديجة
رأيكوا في احداااث الفصل وتوقعاتكوا للي جاي
يا ترى مين هيسافر مع ميمو وايه هيحصل في السفر وكمان بعد السفر ايه هيحصل لما يرجعوا ؟!
وايه باقي حكاية قصي اللي لسه هنتعرف عليه اكتر في البارت الجاي
وزوزو ايه علاقتها بقى بكل دة ... زوزو بالذات هيبقى ليها علاقه بكله
توقعاتكوا ورأيكوا وتفاااعل حلو بقى يشجعنا كدة عاللي جاااي
قراءة ممتعة يا قمرااااااتي ❤️🥰
#ميمو
#رانيا_أبو_خديجة
لقراءة الفصل الثالث عشر من رواية ميمو 👇
👈 الفصل الثالث عشر 👉
للانضمام لصفحتنا على الفيس بوك 👇
🔥🔥 الانضمام 🔥🔥
او لجروبنا على الفيسبوك 👇
👈 الانضمام 👉
إرسال تعليق