رواية ميمو الفصل السابع عشر بقلم رانيا أبو خديجة
رواية ميمو بقلم رانيا ابو خديجه
رواية ميمو
الفصل السابع عشر
#ميمو
#رانيا_أبو_خديجة
_ قصي بيه تحت يا فندم ...وعايز يقابل أنسه نسمه
_ قصي تحت؟!!!
سألت بلهفة وانا مش مصدقه انه رجع تاني دلوقتي....ياترى راجع ليه.... انا افتكرته روح من ساعة ؟!
_ استني يا نسمة ...انتي مش هتنزليله ...انا اللي هنزله واتكلم معاه
التفت لماما على كلامها دة....وكنت لسه هناقشها ....لقيت بابا الحمد لله رد عليها..
_ سيبى بينتك هي اللي تنزل لخطيبها ...متدخليش بينهم يا كاميليا...سيبيهم ياخدوا على بعض ويعرفوا طباع بعض من غير ما ندخل بينهم
_ ولما تطلعلي معيطة تاني ومتنكد عليها بسببه ....وقتها أنزله انا بقى وارمي حاجته في وشه ... واعرفه ازاي يعمل كدة في بنتي الوحيدة
_ متخافيش هو اللي يخليه جه لحد هنا دلوقتي يبقى جاي يصالحها ...أكيد مش هيتخانق معاها هنا كمان
بعدين بصلي
_ امسحي دموعك دي يا نسمه وانزلي لخطيبك شوفيه عايز ايه....وانتي يا كاميليا تعالي معايا انا عايزك
لقيت ماما قبل ما تخرج من الاوضة التفتتلي
_ نسمة...عايزاكي وانتي بتتكلمي معاه تعرفيه ان طريقته دي متنفعش ....والا نفضها سيرة وكل واحد منكم يروح لحاله ... جايز مفيش نصيب ليكوا مع بعض يبقى مش بالعافيه!
..........….......…......
مش معقوله كل دة يحصل في خروجتين مع بعض بس...ومش قادر على فكرة ان كل خروجه ليها معايا ارجعها بالشكل دة....أكيد دلوقتي بتكرة اللحظة اللي طلبت انها تعرفني فيها أكتر ونقرب من بعض.... مش معقول أصدرلها فكرة طول الوقت إني عصبي والتعامل معايا لا يطاق كدة
أول ما وصلت بالعربيه لقدام البيت وبدل ما انزل وادخل لفيت بالعربية تاني أرجعلها ..... دة غير خوفي الجديد عليا من انها تعيد تفكير في ارتباطنا تاني ... اتنهدت وانا مش مصدق ان تفكيري بقى يروح طول الوقت ان مبقاش ينفع غيرها.... وحقيقي مبقتش شايف شريكة حياه ليا وزوجة غيرها.... فيها تقريبا نفس الصورة اللي أي راجل يتمناها في زوجته ...محترمة ...خلوقه جدا ...حلوة جدا ... رقيقة وملتزمة كمان ....دة غير جاذبيتها الغريبة اللي بتشدني ليها كل ما اعرفها أكتر ...بس فيها عيب واحد ...حساسيتها الزيادة دي ....مش معقول من اي مشكله صغيرة القيها اتحولت كدة ....بس منكرش ان شكلها بيبقى الطف شئ وهي كدة
ابتسمت لما افتكرت شكلها كل ما بتعيط
.... عموما ان لسه معرفتهاش بشكل كافي ووارد قوي العيب دة يبقى برضه ميزة ....ايوا انا لسه معرفتهاش بشكل كافي وهي كمان .... أكيد بتقول لنفسها كدة دلوقتي ان اللي ظهر من شخصيتي دة نبذة ... اكيد كل دة خوفها مني ودة أكتر شئ مضايقني أكتر....
رفعت عيني اتجاه السلم أول ما سمعت همس حركة جاي من هناك .... خطواتها .....
....ابتسمت غصب عني لما بان قصرها كدة اول ما قلعت الكعب اللي كانت لبساه واحنا مع بعض بره.....قصيرة بشكل ملفت ومحبب للنفس....طولها دة بقى لايق على ملامحها الطفوليه وانفاعلاتها اللي اقرب لكائن صغير ..... ابتسمتي اختفت اول ما قربت لعيني أكتر ....كانت قلعت البليزر اللي كانت لبساه وفضلت بالتيشرت الأبيض على البنطلون الابيض الواسع ....التيشيرت جوه البنطلون بشكل خلاه اضيق من فوق ....بين جمال تفاصيلها وقوامها ....الولد بتاع المطعم دة عنده حق ......فظييييييييعه....احم....
نزلت عيني بسرعة من عليها واستغفرت في سري لحد ما سمعت صوتها الرقيق جدا أشبه باللمفيش ...بس فيه نبرة قمص كدة فى كلامها ... رفعت عيني لقيتها مربعة ايديها قدام صدرها وبصه بعيد
_ نعم.... عايز ايه ؟!!
بصتلها شويه وانا قاعد وهي واقفه قدامي كدة
_ طيب ممكن تقعدي يا نسمة لو سمحتي
قعدت فعلا قدامي ملامحها زي ما تكون كانت لسه بتعيط لحد دلوقتي.... كالعادة مش بتبصلي.... بصه بس على صوابعها اللي بتفركها في بعضها كالعادة
_ انتي عارفه اني خلاص المفروض أسافر بكرة او بعده بالكتير....تفتكري ينفع أسافر وانتي زعلانة مني كدة؟
برضه ساكته
_ نسمة....انا مينفعش أسافر وأسيبك زعلانة مني كدة....
اخيرا رفعت عينها الجميلة دي ليا
_ تعرف ان ماما بتفكر تفسخ خطوبتنا يا قصي
_ ايه ؟!!! مش للدرجادي يا نسمة
_ لأ للدرجادي.... ياقصي احنا لسه منعرفش بعض ويدوب اول ما حاولنا يحصل بينا كل دة!!..دة احنا مخرجناش مع بعض غير مرتين اتنين بس ....شوف النتيجة ايه.
عندها حق...بس حقيقي انا مقصدش دة ابدا
_ أولا حقك عليا...انا أسف
لقيتها رفعت عنيها اخيرا ليا تبصلي
_ ثانيا بقى متنكريش انك انتي كمان بتزعلي وتعيطي من أي شئ وحقيقي الموضوع مبيبقاش مستاهل يكبر كدة
_ انا عمر ما حد زعقلي ولا على صوته عليا زي ما انت بتعمل دلوقتي.... وحقيقي انا مش معتاده....ومبعرفش اتعامل مع العصبية دي ابدا
_ وانا كمان مش من عادتي العصبية.
لقيتها سكتت وبصت على ايديها تاني وبعدين رفعت عينها كلها دموع واتكلمت بخنقة حسيتها في صوتها
_ قصي...
_ نعم يا نسمة!
_ انا حاسه ان ماما معاها حق .... احنا طباعنا مختلفة قوي وأكيد دة شئ مش هيبقى مريح بعدين
بصتلها وانا حاسس بصدمة....هي بجد ممكن تكون بتفكر في كدة....تفسخ خطوبتنا!!!
_ احم ..... انتي..انتي شايفة كدة يا نسمة؟!....اننا مننفعش لبعض؟!
_ انت طول الوقت عصبي وأقل حاجة بتنرفزك وتضايقك وانا بتوتر من الزعيق والصوت العالي وحقيقي مش بعرف اتعامل....انا اسفة.
خلصت كلامها وحطت ايديها على وشها وكملت عياط .... معقول...انا عملت كل دة؟!!! انا حقيقي مستغربتي جدا؟!!
_ طيب...ممكن كفاية عياط طيب.... خلاص يا نسمة لو مضايقك قوي كدة .... خلاص همشي..
لقيت عياطها زاد اكتر بشكل ملحوظ.... طيب اعمل ايه في الليلة دي!!!
بصتلها وانا عارف انه مينفعش أمشي وأسيبها كدة .... قربت منها شوية في قعدتي.... وحاولت اتكلم بصوت يكون اهدى من كل عصبيه شافتها قبل كدة
_ نسمة ... انا أسف ... خلااص بقى ...انا اول مرة اعرف ان انا وحش كدة!!
قربت في قعدتي خطوة كمان بحذر وحاولت اشيل ايديها دي من على وشها
_ نسمه....طيب انتي بتعيطي ليه دلوقتي طيب....انا والله هعملك اللي انتي عايزاه
واخيرا همست بصوت كله عياط ...واللي فهمته منه واخر حاجه كنت متوقع اسمعها منها
_ عشاان مش عاي ..عايزة نفسخ خطوبتنا...
هي قالت ايه....
_ بتقولي ايه مش فاهم ....ممكن تبطلي عياط عشان اعرف افهم
رفعت وشها اخيرا واتكلمت بتنهيد عياط برضه
_ لأ مش بقول .... كنت عايزة اقولك ربنا يوفقك مع واحدة شبهلك
لأ اقسم بالله قالت حاجة تانية وانا سمعت
فضلنا ساكتين شويه... وغصب عني عيني عليها وهي كمان اخيرا رفعت عينها ليا
_ ممكن اطلب منك طلب
_ نعم يا قصي
ابتسمت غصب عني بس يارب متفتكرنيش بضحك على احزانها بس حقيقي بحب اسمع اسمي منها
_ ينفع نخرج الجنينة شويه....يعني اكيد الهوا والجو هيساعدك تهدي عن كدة
.........….....….…............
_ ياللي أمر من بعدك لقاااك ...ياللي امر من هجرك رضااك...
قربت منه وهو قاعد مكان ما كنا كلنا قاعدين كدة....ومولع برضه خشب مدي دفا للمكان المحيط بيه....وسمعته بيدندن الاغنية دي ....ياترى يقصد بيها مين ....ولا بيغنيها في المطلق كدة
_ ميمو..
سكن مكانه لحظة بعدين التفت فاجأة يبصلي
_ سلمى!!....ايه اللي مصحيكي لحد دلوقتي....افتكرتكوا كلكوا نمتوا
روحت قعدت جنبه
_ فعلا كلهم نايمين .... بس انا مكانش جايلي نوم ....وانت كمان ليه لسه صاحي ....افتكرتك نمت من وقت ما دخلنا سوا
اتنهد كدة وبص للفراغ قدامه
_ بقالي فتره كدة كل اما أجي انام الاقي تفكير الدنيا كله وهموم الكون قررت تحضر دلوقتي
_ هموم!!...هموم ايه ممكن تفضفض معايا .... على فكرة انا بسمع كويس وبحب اسمع الناس...و...و خصوصا انت ...
لقيته التفت بصلي شوية بعدين ظهرت ابتسامة حسيتها فيها وجع او حزن مش عارفه ليه ورجع بص قدامه تاني
_ يعني ... الحياة عموما وجع قلب ....
بعدين اتنهد قوي
_ زي ما بيقولوا مفيهاش راحة
سكت ابصله وانا محتارة ....مش عارفه أقوله ايه ....ومش فاهمه بيتكلم عن ايه.... ياترى ايه تعبه ومحيره كدة
_ تعرف يا ميمو ان احنا زملا عمل في مكان واحد بقالنا قد ايه....ومنعرفش حاجة عن بعض ....
لقيته بصلي فاجأة وملامح وشه غريبه من خضه او خوف لملامح مجهولة مقدرتش افهمها ...ماله؟!
_ عايزة تعرفي ايه؟!
_ باباك ..مامتك.. اخواتك ....عندك اخوات اصلا ولا انت ابن وحيد ...كدة يعني ؟!
بصلي شوية لدرجة استغربت جدا بعدين بص للفراغ قدامه
_ أبويا وأمي متوفيين من زمان ...زمان جدا ....وعندي أخت واحدة ....تعتبر دي اللي انا عايش عشانها لأ هي مش تعتبر زوزو فعلا الحاجة الوحيدة اللي خلتني أصبر عالحياة وكانت سبب في وقت من الأوقات اني أكمل وأعيش عشانها.
ابتسمت من كلامه عن أخته
_ انتوا بس عايشين مع بعض؟! .... حلو قوي
_ لأ هي عايشه مع خالتي لكن انا يعني اخدت مكان يكون قريب من شغلي شويه
_ شغلك في الخشب؟
_ اه في الخشب ....انا بشتغل الشغلة دي من زمان قوي ...من بعد وفاة أبويا وأمي...
_ طيب وباباك ومامتك ماتوا امتى و ازا....
لقيته قام فاجأة من جنبي وسبني ووقف بعيد يبص للفراغ قدامه وبدء يدخن في السجاير اللي بتعمل على حرق الدم والقلب أكتر دي
_ ميمو... مالك ...انا ضايقتك في حاجة؟!
_ لأ خالص .... احم .... على فكره انا كمان معرفش عنك حاجة
انت بس اسأل وانا هجاوبك على اللي انت عايز تعرفه...رديت عليه بابتسامة....
_ عايز تعرف ايه وانا اقولك؟
_ كل حاجة....كل حاجة عنك لو ينفع
قالي كدة وهو باصص في عيني لدرجة ابتسمت غصب عني
_ انا سلمى ٢٤ سنه...امممم ..مدرسة وبحب شغلي قوي و...وبس اه وعايشه مع بابا وأخويا قصي ...وبس
لقيته باصصلي بعدين ابتسم على ابتسامتي
_ أخوكي دة اللي انا شفته وقابلته قبل كدة يوم فرح يوسف
_ ايوا ايوا اللي قابلته يوم الفرح ...
_ دة أخوكي الوحيد؟
_ ايوا ...بس ....
سكت شوية
_ بس مش شقيقي ....اخويا من بابا ...بس
_ ليه حاسس في نبرتك وكأنه مزعلك كدة
_ لا ابدا ... احنا بس عشان مكناش عايشين مع بعض من زمان....قصي جة يعيش معايا انا وبابا بعد وفاة والدته ودة من فترة صغيرة قوي ...مش من زمان....فمش معتادة على وجودة قوي.... بس
قال وهو بيحط ايدة في جيوب بنطلونه من البرد
_ والدك دة شكله كان مدغدغ الدنيا....بيتجوز بالاتنين
ضحكت غصب عني على كلامه
_ لأ مش زي ما انت فاكر.... بابا اتجوز عشان يخلف فجى قصي ...وبعديها بكذا سنه ماما حملت فيا بس...بس يا حبيبتي ملحقتش تفرح
_ ليه بتقولي كدة؟!
ضميت الشال بتاعي حواليا من البرد اللي زاد بعد ما بعدنا عن مكان النار..
_ اكتشفت وقتها جواز بابا من وراها وجتلها تروما اتسببت في اصابتها بمشاكل كتير في القلب فضلت تتعالج منها كتير لحد ما ...لحد ما ماتت
_ لا اله الا الله.... طب ووالدك ومراته كانوا فين وقتها ولا ايه موقفهم؟!
_ هما السبب اصلااا في اللي حصلهاااا
_.......!!!!!
_ ....أسفه على نرفزتي ....مقصدتش
لقيته بيبصلي قوي كأنه بيحاول يتبين ملامحي
_ ولا يهمك.... تحبي نقعد
هزيت راسي بمعنى ياريت ...وقعدنا فعلا على جانب من الرمله
فضلنا ساكتين شويه وحقيقي انا مش عارفه أقول ايه بعد عصبيتي المفاجأة الغير مبرره دي....
_ تعرف ... انا كنت بحب ماما وبابا قوي ....كنت عايشه حياه طفوليه جميله لحد اللي حصل دة .... وماما كانت حد جميل قوي وكانت بتموت في بابا .... والمفروض ان هو كمان وعشان كدة مرضيش يجرحها فخبى عليها جوازه واحتياجه لطفل...بس للاسف اذاها اكتر ....
بعدين التفت ابصله
_ حتى اللي بيحب بيأذي يا ميمو ....
_ بس أكيد هو كمان اتأذى من تعبها دة وأكيد لام نفسه على اللي عمله في حقها وانه خبى عليها
اتنهدت وانا بفتكر كل دة
_ انا فاكرة كل دة ...رغم اني كنت صغيرة قوي ...بس لان الموضوع كان بيكبر معايا ومع سنين عمري ....في تفاصيل مش هقدر انساها.... تعرف ان بابا كان أوقات كتير بيصعب عليا ....كان مدمر في فترة تعبها قوي
بعدين ابتسمت وانا بفتكر الامنيه العجيبة دي
_ والغريبة ورغم اللي شفته معاهم ...بس كتير قوي كنت بتمنى حد يحبني كدة زي حبه لأمي .... دة كان هيموت عشانها وقت تعبها
التفت ابصله لما لقيته ساكت ....لقيته بيبصلي كأنه عايز يقول حاجة بس متردد
_ افهم من كلامك انك عمرك ما حبيتي قبل كدة؟
_ لأ والحقيقة عمري ما فكرت في كدة .... انا كان في خيالي طول الوقت ان الحب الحقيقي دة اختفى مع انقراض كل حاجة حلوة حوالينا
بعدين بصتله
_ وانت؟
_ انا مستحيل كنت افكر في كدة .... يعني ظروف حياتي اللي مريت بيها مكنتش تسمح ....
بعدين سكت...
_ لحد من فترة قصيرة
بصتله بأمل ... يارب يقول حاجة
_ ايه اللي حصل من فترة قصيرة ؟!
_ يعني شكلي كدة............شكلي كدة قابلت اللي هتتسبب في وجع القلب اللي جاي كله
مستغربة كلامه جدا .... ليه رابط الحب بوجع القلب مش المفروض دة شئ متصل بالارتباط والجواز والحيااااه....وياترى يقصد مين في كلامه ....نظراته بتقول انه يقصد.....
_ ومين دي اللي عامله فيك كل دة؟
سكت شوية بعدين بص للفراغ قدامنا وهو بيتنهد
_ مش عارف اذا كان ينفع أقولك ولا لأ!!!
_ ..........!!!!!!!
_ ايه سكتي ليه؟!
ماهو لو يقصدني زي ما حاسه يبقى ليه خايف يقول.... يبقى أكيد قاصدة حد تاني...أكيد
_ لأ مفيش....عن اذنك الوقت اتأخر جدا والمفروض اننا هنصحى بدري...
_ طيب استنى بس رايحة فين.... هنرجع سوا ...انا كمان عايز انام.
رجعنا سوا فعلا ....بس انا مكنتش مركزة في اي حاجه بيقولها ....كل اللي كان شاغلني....انه أكيد مش عايز يقول لانها مش انا ...يا ترى مين دي اللي بيتكلم عنها ...واللي محيراه كدة ..يا بختهااا بحيرته دي ...
.........…...............................
كنت بتمشى جنبها وغصب عني عيني بتروح من جمال الفراغ والجنينه قدامي لجمالها هي ..... كانت ماشيه جنبي وضمه دراعاتها حواليها وشويه تبص للفراغ قدامنا وبعديها تبص تحت وهي ماشيه بخجل
_ فين البليزر اللي كنتي لبساه عالتيشرت دة ...كدة هتبردي من برودة الجو
ضمت دراعاتها حواليها أكتر
_ نسيت البسه وانا نازله....بس انا مش بردانه قوي كدة.
بعدين سكتت ...بصيت لملامحها حسيت وشها هدي كتير...واحمرار مناخيرها وخدودها اختفى الى حدٍ ما
_ حاسة انك بقيتي اهدى شويه ؟
_ الحمد لله.... افضل.
بعدين رفعت عنيها بخجل
_... على فكره لو عايز تمشي... خلاص انا بقيت كويسه
كنت لسه هرد عليها واقولها اني مش همشي وهي زعلانه مني والموضوع بنا كدة .... بس سمعت صوت عربية داخله الفيلا
_ حد جايلكم دلوقتي؟!
ردت وعنيها على اللي خارج من العربية وجاي اتجاهنا
_ دة خالو عامر.... دي عربيته
بعدين قالت وهو جاي اتجاهنا
_ انت مقبلتهوش قبل كدة ...فأكيد متعرفوش
لقينا راجل شكله محترم جدا جاي وبيقرب علينا بابتسامة وقورة ليها
_ ازيك يا نسمه
راحت بهدوء حضنته
_ خالو....ازي حضرتك وازي طنط فريدة
_ ازيك يا نسمة العيلة انتي .... وحشاني قد الكون
_ الحمد لله... وطنط فريدة عامله ايه ومجتش مع حضرتك ليه
لقيته بصلها بصه مداعبه كدة
_ فريدة بس اللي بتسألي عليها....طب ومختار دة خلاص هيخلص دراسته وهينزل خلال الشهر دة
بصتلة وبصتلها لقيتها اتوترت كدة وبصتلي
_ معرفتش حضرتك يا خالو... قصي ...خ خطيبي..
بصلي وكأنه لسه واخد باله مني وقرب سلم عليا بس كانت ملامحه كلها اتغيرت وكأنها قالت حاجة زعلته
_ خطيبك!!! كدة يا نسمة من غير ما تقولوا!!
_ لأ ازاي يا خالو ... ماما قالت هتقول لحضرتك بس اما ترجعوا يعني عشان متجبركوش تنزلوا مصر مخصوص عشاني
رد عليها وعينه عليا كأنه بيكتشفني
_ اممممم ....وهننزل يعني لأعز منك...وفين كاميليا!!
_ ماما جوة مع بابا
_ طيب بعد اذنكم ....اتشرفت بيك يا قصي
بعدين سبنا ودخل
_ ممكن تفهميني بقى ايه دة.... ومين مختار دة
_ مختار يبقى ابن خالو عامر
_ وليه كنتوا مخبيين عليهم خطوبتنا
_ لأ مش مخبيين ...بس صراحة ماما خافت على زعلهم ..اكمنهم يعني.. يعني كانوا كلموا بابا عني لمختار بس انا كنت رفضت لانه كان نفس الوقت اللي انت اتقدمتلي فيه
سكت كتير ابصلها وبس .... لدرجة اتوترت ورمشت بعنيها اكتر من مرة... بعدين بصت بعيد
_ وليه موافقتيش عليه
بصتلي بعيون واسعة وكأنها بتقولي ايه السؤال دة
_ ماما هي اللي كانت بتلح عليا كتير لكن بابا ....
كملت بصوت اهدى
_كان متحمسلك انت أكتر
_ طيب وانتي؟
رفعت عينها ليا تاني وسكتت بعدين همست
_ كل شئ نصيب يا قصي
قربت منها لما لقيتها سكتت وبصت لتحت
_ نسمة.... انا مش هكذب عليكي ..انا لما فكرت فيكي واتقدمتلك كانت مجرد فكرة لجوازة صالونات لاني دخلت في التلاتين وكنت ناسي الموضوع خالص ....
بعدين رفعت صباعي ارفع وشها المثبتاه في الأرض دة
_ لكن بعد ما اتخطبنا وبدأت اعرفك حاسس انك احسن اختيار اختارته في حياتي.... ونفسي انتي كمان متندميش عليه
كانت لسه بوادر ابتسامة بتظهر على وشها لكن فاجأة زعلت وبصتلي بلوم
_ طب وفسخ الخطوبة اللي كنا بنتفق عليه من شوية
_ انا عن نفسي متفقتش على حاجة....هل انتي اتفقتي معايا على حاجة؟!
لقيتها ضحكت بخفه وهزت راسها بمعنى لأ... ابتسمت على ضحكتها اللي اخيرا شفتها تاني بعد كل دة
_ نسمة...انا هسافر بكرة ومش عايز أسافر وانتي زعلانة مني
بعدين تلقائي عيني راحة على المدخل اللي لسه داخل منه خالها لجوا
_ وعلى فكرة....اول ما ارجع ان شاء الله هنبدء نجهز في ترتيبات الجواز....ولا انتي ايه رأيك؟!
رفعت عنيها في ذهول طفولي يضحك
_ ايه ...اااا ازاي ...جوازنااا ... دلوقتي...بس احنا لسه..
_ انا عارف ان خطوبتنا معداش عليها كتير.... لكن عارف برضه ان مهما عدى انا مش هغير رأيى ان انتي تكوني مراتي وشريكة حياتي
لقيت لخبطة ماليا ملامحها
_ طب وانا لسه.... يعني...وكمان عصبيتك دي ..و..و
_ هو انا بقولك هنتجوز بكرة....انا بقول هنبدء نجهز.... وبعدين انا طبعي مش عصبي زي ما انتي فاهمة..... واوعدك يا ستي الوضع هيختلف بعد كدة....تمام ولا ايه؟
هزت راسها بمعنى بتردد .... بعدين لقيتها مترددة شويه كأنها عايزة تقول حاجه
_ ممكن...ينفع يعني....ينفع....
_ قولي ...عايزة ايه؟!
_ ينفع تبقى تكلمني وانت ...وانت مسافر....قبل كدة مش كنت بتكلمني خالص الا اذا انا اتصلت بيك....
حطيت ايدي في جيبي وبصيت بعيد بحرج منها...معاها حق...الشغل كان واخد كل وقتي فعلا والحقيقة حتى لما كان بيبقى عندي وقت..... مكنتش بهتم أكلمها..
...……..…...............
_ ايه يا باشا الاشكال اللي عندك دي .... بقى دول يشتغلوا في مكان عالي زي دة؟!
_ لأ يا فريد اللي مش عحبينك دول انت تعرف مكلفيني كام ولا سابوا شغل فين عشان يجولي هنا
_ ايوا بس الصاله ناقصها حد يكون بيحب المهنه ..بيحب الجو..مش بيهز عشاان القرشين
_ مانت السبب ومش عارف تجيبها هنا....بنت اللذين من يوم ما شفتها عندكوا في الصاله وهي مش خارجة من دماغي...وحاسس ان الشغل عندي ناقصها فعلا.
_ اطمن بدأت تلين وجايه جايه
_ طيب فين يا فريد .... بقالك اسابيع بتقولي جايه
_ يا باشا زوزو غير اي واحده هنا ولها ظروفها ...يعني تلاقيها بمواعيد معينه لاينفع تتأخر فيها ثانيه ولا تيجي في وقت غير وقتها وزي ما قولتلك قبل كدة مبقعدتش مع حد من بتوع الصاله حتى لو مين.
_ ياعم ما كلهم بيقولوا كدة في الأول وبعدين المكسب بيخليهم يقعدوا قبل ما يشتغلوا كمان...ويقوموا من على تربيزة دة عشان يقعدوا مع دة
_ لا... إلا زوزو انا عارفها كويس
_ ماشي بلاش تقعد مع حد تخلص شغلها وتمشي ....بس تيجي ...انا عايز اللون دة عندي هنا
_ واللبس... هي حابه يكون عندها استايل في اللبس بعيد عن الجو اللي هنا شويه
_ ازاي يعني....بترقص ببدله وكرافته ماهي اكيد هترقص يعني بدلة رقص
_ لأ... هي مبتلبسش البدل اللي في بالك دي .... هي صحيح مبيبنش منها حاجة في اللي بتلبسه بس أشهدلك.... عليها شوية فساتين واستايلات اجدع من اي بدلة رقص ممكن تشوفها عليها
_ لو كان قصدك على اللبس اللي شفتها بيه دة فلا يا فريد ....هي صحيح كانت حلو... وباينه كدة عن باقي اللي في المكان بس لأ مش حاسس هيليق مع المكان والجو هنا
_ يا باشا دة شرطها الوحيد.... تلبس على مزاجها ... قولت ايه؟
_ امممم....طيب يا فريد بس هيكون معاها استايلست من المكان تكون معاها برضه انا مش عايز عك
_ تمام قوي يا باشا....هتكون عندك في خلال يومين
....……...…….............
_ سلمى !!!! الحقيني يا سلمى ...قومي اصحي شوفي المصيبة اللي احنا فيهاااا
_ اايه ..ايه يا غدير في ايه ...في حد يصحي حد كدة؟
_ بقولك أصحي احنا في مصيبه .... الولاد عددهم ناقص وانا مش عارفه اعمل ايه.... دة لو جرالهم حاجه يبقى روحنا في داهيه
قومت مفزوعه من كلامها دة
_ ايه ....مين ..ازاي ...تعالي معايا بسرعة ندور عليهم ....
_ انا دورت في المكان كله ...مختفيين
اتكلمت بفزع و انا بلبس هدومي بسرعة وبلف حجابي
_ فين ميمو طيب؟!
_ اكيد لسه نايم .....انا كمان لسه صاحية
_ طيب تعالي ....تعالي معايا بسرعة!!!
وقفنا قدام باب أوضته ......وخبطنا كتير قوي
_ ايه دة نومه تقيل جدا ....مقدمناش غير اننا نفتح الباب وندخل
_ ايه!!! ايه اللي انتي بتقوليه دة يا غدير.... نفتح عليه الباب وهو نايم ازاي يعني ...عيب وميصحش
_ دة وقته يا سلمى!...عيب ايه وزفت ايه...بقولك مش لاقيه الولاد ولا حتى حوالينا هنا احنا في مصيبه لو حضرتك مش حاسه يعني
بصتلها بحيرة.... بعدين بصيت للباب... لأ عيب بجد ازاي يعني هندخل عليه وهو نايم ...اكيد مينفعش
_ انتي لسه هتفكري يا سلمى.....اوعي كدة
لقيته فتحت الباب هي فعلا ....واول ما شفته التفت ابص الناحية التانية.....مش عارفه ليه اتكسفت اما شفته نايم كدة
كان نايم بتيشرت من غير كمام ....ونايم على صدرة ورايح في سابع نومه ..... لقيت غدير قربت منه وهي تقريبا مش مدركة حاجة كل تفكيرها حاليا الولاد
_ ميمو.....ميمو اصحى ....
_ همممم ....ايه....مين!!
_ مين ايه بس ...يا ميمو اصحى ..انا غدير
فتح عينه فاجأة لقانا معاه في الأوضة....اتعدل واتكلم بصوت كله نوم
_ في ايه يا غدير....هي الساعة كام دلوقتي...احنا امتى
_ احنا الصبح بس انا صحيت ملقتش هيثم وسندس اختفوا معرفش راحوا فين!!
#رانيا_أبو_خديجة
يا ترى هيثم اخد سندس وراحوااا فين😂
وميمو وسلمى خلاص هياخدوا قرار اللي هيودينا على منعطف تاني خااالص
ودة نفس السبب اللي هينهي قصة زوزو بعد ما يدوب تبدء ...ماهي قصة زوزو لسه ليها بداية تااانيه خاااالص
استنوني الباارت الجاااي ومش هتكلم عن التفاعل المحبط عشاان انتوا أكيد شااايفين فهمتكوا معايا بقى وتفاااعل يشجع عالكتاابه وننزل بالبااقي بدري باذن الله قراءة ممتعة ♥️♥️🥰
لقراءة الفصل الثامن عشر من رواية ميمو 👇👇
🔥 الفصل الثامن عشر 🔥
للانضمام لجروبنا على الفيسبوك 👇
👈 انضمام 👉
او للصفحة الرئيسية الخاصة بالروايات 👇👇
👈 انضمام 👉
إرسال تعليق