رواية ميمو الفصل الأول بقلم رانيا أبو خديجة
رواية ميمو بقلم رانيا أبو خديجة
رواية ميمو
#الفصل_الاول
#ميمو
#رانيا_أبو_خديجة
كانت نايمة في الكرسي اللي جنبي في العربية ...عارف انهم ورايا بيحاولوا يلحقوها مني ...التفت ابص عليها وانا بجري بالعربيه احاول اهرب بيها لأبعد مكان ...نايمة ولا دريانة باللي بعملة عشانها غمضت عيني بأسى مكنش نفسي الأمور توصل لكدة ...غصب عني انحرفت العربية وانا بحاول اسرع بيها ومالت مني... لقيتها ميلت براسها وجسمها عليا ... مش عارف لية قشعرت لما حسيت دفى جسمها بالقرب دة مني ...التفت ابص عليها قابلني وشها إللي برائتة دلوقتي بتلومني و تأنبني ...ريحتها في انفاسي.... بعدها بايدي اعدلها وفضلت حاطت ايدي على كتفها اسندها ...بصيت في المرايا لقيتهم لسة ورايا بصيت عالطريق احاول بقدر الامكان اتفاداهم ... التفت أبص ليها تاني لسة ساندها بايدي ... بعدين ريحت راسها على كتفي براحة ورجعت ابص تاني على عربية اخوها اللي ورايا وباباها جنبة ...ابتسمت باستهزاء غصب عني الاتنين شكلهم هيتجننوا وهما ورايا في العربية خايفين عليها مني... ميعرفوش اني افديها بعمري ...واذا كان عاللي هعملة دلوقتى فمقدميش حل تاني عشان احافظ علي وجودها معايا
..........................
_ ازاااي ازاي طلع من الڤيلا بيها والأمن كاااان فين؟!!!!!!
مردتش علي أبويا اللي بيصرخ جنبي بتوتر وقلق في صوتة عليها ولا قادر اقول نص كلمة حتي...كل اللي هممني دلوقتي الحقها من ايد الحيوان دة ...واخدها على فين وهيعمل فيها اية؟! ... سلمى مش بس اختي اوقات كتير بحس انها بنتي ...مليش غيرها...هي اختي الوحيدة ...والحيوان دة لو مسها بس يا هيكون اخر يوم في عمره يا عمري
كنت عمال باجي بالعربيه يمين وشمال احاول اكسر علية لكنة ابن ال....محترف في السواقة وبيعدي مني بكل الطرق ...لحد ما خلاص كنت هلحقة لكن... فاجأة ...
_ حااااااسب يا قصي.....
……....................
كنت لسة بحاول اهرب بيها منهم لاي مكان ...نفسي العربية يحصلها معجزة في اللحظة دي وتطير بيا انا وهي ونبعد عن هنا خالص ... بصيت في المرايا عليهم لقيتهم فاجأة اختفوا
عدلت المرايا بايدي ابص عليهم كويس وادور عليهم بنظري برضة ملقتهمش ...وقفت بالعربية على جنب مشيت روحت للجهة بتاعتها فتحت باب العربية وبصيت عليها مش عارف لية حزنت دلوقتي حاسس عايز أخدها في حضني بس هي عارفه انه غصب عني واكيد هتسامحني ...قربت شيلتها بين ايديا وانا ضاممها لحضني وفتحت الباب الخلفي ونيمتها على الكرسي اللي ورا اريح جسمها علية ...ورجعت مكاني بعد ما فردت الجاكت بتاعي عليها وبدأت اسوق بيها وانا عارف كويس اني لازم أبعد بيها لأبعد مكان ..
فضلت سايق بيها لمدة معرفش قد اية كل اللي كان شاغلني هي ..... كل شوية أبص عليها وارجع للطريق تاني لحد ما اخيرا وصلت ...نزلت وروحت للجهه بتاعتها فتحت باب العربية وبصيت عليها لسة ما فاقتش عارف ان المخدر دة قوي ومش ممكن تفوق قبل بكرة الصبح شيلتها براحة ودخلت بيها المكان الوحيد اللي بحس فية بالأمان لانة ابعد مكان عن البشر وابعد من انهم يوصلولة.
طلعت بيها ودخلت اوضتي والأوضة الوحيدة الموجودة في المكان وحطيتها علي سريري بالراحة ابتسمت لما بصيت في وشها بالقرب دة ملامحها جميلة اومال هي خطفاني لية ...
سحبت ايدي من تحتها بالراحة اخر حاجة اكون عايزها انها تصحى دلوقتي.... وقفت قدامها ابصلها شوية ...لوقت مش عارف قد اية .... وبعدين انحنيت اقعد جنبها وبدات أيدي تفك حجابها وبعدته فعلا عن شعرها...شعرها اللي أول ما فكيت المشبك بتاعة ومشيت ايدي علية لقيتة اسندل على ايدي زي خيوط العسل في لونها وملمسها... ابتسمت وانحنيت ابوسة لما افتكرت دلوقتي اول مرة شفت شعرها فية ...انا فاكر المرة دي كويس لما طلعت لحد بلكونة اوضتها لما كانت زعلانة مني وكنت عايز أشوفها وشفتة غصب عنها لما كانت نايمة...ابتسمت غصب عني لما افتكرت القسم اللي اخدتة على نفسي وقتها بأن مفيش راجل هيلمس الخصلات دي غيري انا ومن اللحظة دي مفيش حد هيلمس شعرة منها تاني ....رفعت ايدي من اطراف شعرها لفوق ابعدة عن وشها وبعدين رميت المفاتيح من ايدي التانية وفضلت ابصلها شوية واراجع نفسي في اللي هعملة .... وبعد تفكير كتير لقيت ان مفيش حل تاني ...لازم تكون ليا ...لازم تكون ملكي وقبل خروجها من هنا كمان دة اذا سمحت انها تخرج.
….............................
مكنتش حاسة بأي حاجة في اللحظة دي هو تقريبا انا لسة نايمة في اوضتي وبحلم ...بس لية شامة ريحتة بالقرب دة... ريحة بتشدني للواقع بس لأ انا مش قادرة ارجع للواقع حاسة حاجة بتمسكني للدوامة اللي دماغي فيها دي...بس لية برضة ريحتة عمالة بتقرب مني اكتر هو انا بحلم بية ولا ايه .... ابتسمت لما دماغي ودتني وكاني بحلم بالحدث قدامي لما شميت الريحة دي بالقرب دة لأول مره في حياتي وياريتي ما روحت هناك ولا شفتة ولا سمحت ان ريحتة دي تبقى جزء من أنفاسي بعد كدة ...
……...........................
_ طيب احنا كدة خلصنا الدرس التالت من الوحدة الأولى...فهمنا ولا اعيد تاني....اللي عايزني اعيد تاني يقول وانا مش هعيد
لقيتهم ضحكوا كالعادة...انا بحبهم قوي قوي وبحب شغلي في المدرسة هنا جدااا.... بعشق تفاصيل الاطفال هنا ..وكتير قوي في الفسحة اجيب حاجتي واكلي واقعد هنا عالكرسي قدامهم بس اراقبهم واضحك على افعالهم ...لقيت شهد رفعت ايديها بعد ما خلصت ضحك مع زمايلها
= ينفع يا مس تعيدي تاني..
_ ينفع يا روح المس بصي معايا...
وقبل ما أكمل جملتي سمعت جرس الفسحة وفي اقل من دقيقة..... مشفتش حد في الفصل حتى البنت الي المفروض هعيدلها ولا موجودة... فضلت رافعة ايدي بقلم السبورة وهما خارجين كدة .... اتنهدت بيأس من دي اطفال...اخدت شنطتي وخرجت
_ اطفال بقى مانتي كنتي اطفال برضة..
_ بتكلمي نفسك ولا ايه ... سلامتك ... لسة بدري عالجنون دة
_ ماهو مع العيال دي ...هيبقى مبكر.
_ بعد الشر عنك يا سلومة ...بقولك ايه انا هطق من البيت والشغل وعايزة أخرج
هي دي غدير صاحبتي تبقى لسة جاية من هنا ومن هناك ومخنوقه وعايزة تخرج
_ هو انتي يا بنتي مش كنتي في اجازة الاسبوع اللي فات عشان سافرتي لباباكي تشوفيه وتتفسحي
_ انتي لسه فاكره دة الاسبوع اللي فات يا ماما ...انا مخنوقه وعايزة أخرج يا سلمى بجد
سمعنا جرس الفسحة اللي خلص في الرغي دة
_ طب أروح أشوف حصصي وبعدين نفكر في خروجة تبسط سيادتك كدة على رواقه
_ ماشي...وانا بقى هفكر في خروجه تحلفي بيها
…..............................
_ بس حظي الوحش بقى ان ميمو شافني وانا باخد السيجارة وراه وبشربها لولا كدة كنت جربتها وجيت قولتلكوا بتبقى عاملة ازاي
_ هيثم!!!!!!
التفتوا كلهم يبصولي ...قربت منه هيثم الكلب دة انا عارفاه جديد هنا وهيتعبنا بس بلاش يبوظ بقيت المدرسة
قربت ومسكتة من لياقة اليونيفورم بتاعة
_ ولا انت بتقول اية لزمايلك وسجارة اية يا حيوان اللي كنت عايز تجربها دي؟!
_ اومال يا مس لو سمعتي الباقي ...دة بيقول انة بيقلد ميمو في كل حاجة
_ ميمو...مين ميمو دة كمان؟!
...........................
كنت رايح جاي في المستشفى...دماغي هتنفجر ...في اللحظة دي ويلي ويلين ابويا اللي جوا مع الدكتور بسبب اصطدام عربيتي بعربية تانية ...ولا أختي اللي الحيوان دة معرفش اخدها على فين وهيعمل فيها ايه
دخلت أبويا المستشفى واول ما دخل للدكتور والدكاترة اتلمت حوالية ...فكرت امشي بسرعة الحق سلمى ...قابلني الأمن اللي كلمت رئيسهم وقولتله يجيلي على هنا
_ ايه يا محمد ... لقيتوه؟!!
كنت بسأل وعندي أمل يكونوا وصلولوا ويقولولي ان سلمى في البيت دلوقتي والحيوان دة متكتف كلب مستني اللي هعملة فيه
_ للأسف يا قصي بيه ..احنا تقريبا قلبنا الدنيا علية ملوش أثر .
ابن ال....كنت حيران حاسس اني متكتف ...اخدت مفاتيح عربية واحد فيهم وكنت هخرج ادور علية بنفسي تاني ...بس خطوتين ووقفت وبعد لحظة تفكير ...لقيت ان مفيش غيرها ...هي يا هتجيبة ...يااا...
_ محمد ....هتلي أختة
_ مين يا فندم؟!
_ أخته ...عايزها في خلال دقايق تكون عندي في البيت.
.........................
_ لولا الملامة يا هوا لولا الملامة ...لفرد جناحي عالهوا زي اليمامة واطير وارفرف في الفضا واهرب من الدنيا الفض...
كنت برقص مع اكتر أغنية بحب ارقص عليها ... ابتسامة عريضة على وشي لدرجة لما عيني بتيجي على صورتي في المرايا ..كنت أشوف غمازتي في خدي اليمين باينة زي الشمس ..وقفت قدام المرايا ابص على نفسي وانا برقص ...انا بحب تفاصيلي ..وشي المدور الابيض والغمازة اللي دايما اللي حواليا يمدحوا فيها دي ... شعري الأسود اللي وارثة طولة من أمي ... طولة اللي بيوصل لبعد وسطي بكتير ... كنت بتمايل مع الأغنية باحتراف ...مانا أكيد مش هتكلم عن رقصي يعني ...انا كمان....
قطع تأملي في نفسي في المرايا صوت خبط غريب عالباب ... اتخضيت من طريقة الخبط دي ...فكيت ربطة الحزام من على وسطي وسحبت شال احطة عليا وفتحت الباب
_ ايوا ...مين حضرتك...وبتخبط ازاي كدة!!!
كنت بتكلم بزعيق ...لقيتة رد عليا بنفس الطريقة
_ انتي اخت الجدع اللي اسمة ميمو؟!!
استغربت طريقتة وهو بيسأل على ميمو اخويا
_ ايوا...انا...انتوا مين وعايزين ايه...ااااه !!!
يا ترى ايه حكاية ميمو ؟!
وسلمى عرفته ازاي ؟!
وهيعمل فيها ايه بعد ما خطفها ورد فعلها بعد ما تفوق ايه؟!!
واية بقى قصة قصي مع أخت ميمو اللي عايزها في بيته زي ما ميمو خطف أخته ؟!!!!🤔🤔
كل دة في اللي جاااي باذن الله أستنوني في بااارت بكرة يا قمراااتي ♥️♥️♥️♥️🥰
#رانيا_أبو_خديجة
#ميمو
لقراءة الفصل الثاني من رواية ميمو 👇👇
🌹🌹 الفصل الثاني 🌹🌹
للانضمام لصفحتنا على الفيس بوك 👇👇
🌹🌹 الانضمام 🌹🌹
او الانضمام علي جروب الفيس بوك 👇
👈👈 جروب الفيس 👉👉
إرسال تعليق