رواية ميمو الفصل الثاني والعشرون بقلم رانيا أبو خديجة
رواية ميمو للكاتبة رانيا أبو خديجة
رواية ميمو
الفصل الثاني والعشرون
#ميمو
#رانيا_أبو_خديجة
وقفت الموتوسيكل على بعد خطوات بسيطة من البيت .. سمعت صوت واصلني وجايب الشارع كله ...يشبه صوت زينب أختي....ايوا انا عارف الصوت دة كويس..!
جريت في مشيتي مع اتجاة الزعيق دة... لمحتها من بعيد واقفه وبتزعق فعلاً وتشوح بايديها لواحدة واقفه ومش واخده معاها حق ولا باطل.... ايه ده ...سرعت في خطوتي اكتر اتجاهها لما لقيت فاجأة شاب خارج وبيرفع ايده عليها ..
قربت بسرعة امسك ايده اللي بيرفعها عليها دي
_ ولاااااا.. ايدك جنبك ..انت اتجننت بترفع ايدك على اخت ميمووو..!!!
التفت بذهول على صوت ميمو أخويا اللي ظهر فاجأة دة ومعرفش ازاي دلوقتي وليه؟!!!!
_ م ميمو... طب افهم الأول اختك عملت ايه عشان ارفع ايدي عليها
لقيته شد عصام جارنا اخو الزفته ولاء دي من دراعه
_ وترفع ايدك عليها ليه اصلا ... اختي محدش يرفع ايده عليها.... ولا بعدي عن هنا نساكوا مين هو ميمو.... لو كنتوا نسيتوا ارجع وافكركوا
كنت ببص للي بيحصل وانا مرعوبه ومبنطقش ربنا يستر والزفته دي متنطقش بكلمه زيادة
= جرا ايه يا ميمو... ماتشوف يا أخويا اختك بتعمل ايه الأول في نصاص الليالي وفي قلب حتتنا هنا وفي شارعنا الطاهر وبعدين ابقى اتكلم
يا لهووي يا لهوووي .... منك لله اللهي اشوفك مخنوقه بغاز طبيعي ملوش محبس يا بعيده يارب
..….....…..….....................
أول ما دخلت من باب الڤيلا سألت على بابا من قبل حتى ما أطلع اوضتي ... وزي ما توقعت عرفت انه في الشركة... طلعت بسرعة أوضتي أخد دش وأغير هدومي وروحتله على هناك ....
ميمو قالي افتحوا في الموضوع في أقرب وقت... وصراحة بقى هو من غير ما يقول حاجة... انا عايزة بابا يوافق دلوقتي وميمو يقابله دلوقتي ونتخطب دلوقتي ويلا عادي بقى نبقى نتجوز بكرة
ضحكت من تفكيري اللي واضح انه عداني بيه ده وبصيت على نفسي في المرايا بسرعة أظبط طرحتي واخدت شنطتي ونزلت
وفي أقل من نص ساعة كنت طلعت لمكتبه في الشركة
_ مساء الخير عاللي واحشني قد الدنيا
لقيته رفع وشه عن الاب توب اللي قدامه وابتسم بفرحة....
_ سلمى..!!... جيتي امتى يا بنت؟ مش قولتلي احتمال توصلي متأخر؟!
قربت احضنة
_ مقدرتش على بعدك قومت جيت بدري ...يدوب وصلت البيت غيرت هدومي وجيت اسلم عليك
_ نورتي الشركة اللي مش بتدخليها الا في المناسبات
بعدين راح اتجاه المكتب وانا وراه
_ بما انك جيتي على هنا يبقى أكيد متغدتيش .... استنيني شوية اخلص ايميلات هبعتها لاخوكي عشان هيحتاجها الليلة في شغله وبعدين ننزل نتغدى في أي مكان انتي عايزاه
وفعلا سابني وبدء يخلص في شغله اللي قال عليه ده...قعدت قدامه متردده شويه اقوله دلوقتي ولا لما نراوح احسن
_ بابا..!
رد وهو مركز قوي في الشغل ده
_ ايه يا حبيبتي؟!
_ انا.....كنت عايزه أكلم حضرتك في موضوع
رفع وشه ليا لحظة وقبل ما يرجع لشغله تاني كان التفت وركز عليا ... لقاني قاعده وايدي الاتنين في حجري ضماهم بخجل ...ايوا اكيد فهم ان الموضوع ..غير خالص
قلع نضارته وبصلي
_ خير يا سلمى.... ايه الموضوع اللي مقدرتيش تستني لحد ما نراوح البيت وجيتلي لحد هنا مخصوص عشانه...وكمان مخليكي قاعده كدة كلك توتر
ابتسمت بحرج شوية.... انا بحب بابا جدا وبحب فيه انه دايما بيفهمني بس مش عارفه ليه محرجه كدة دلوقتي
_ ها هتقولي ايه الموضوع اللي موترك كدة ولا ارجع أخلص شغل ونبقى نتكلم اما اراوح بقى بالليل
_ لأ لأ هقول لحضرتك أهو
لقيته ضحك
_ ده شكله موضوع مستعجل فعلا
ابتسمت نص ابتسامة خجوله كدة
_... في زميل ليا ....عايز ييجي... يقابل حضرتك
...….…................
_دي كداابة يا ميمووو .. طب دة انا بنام من أدان العشا حتى اسأل خلتك.... وبعدين يعني اومال انا كنت رايحة اضربها وافرجها مقامها ليه... مش عشان كدبها دة وانها بتقول كلام محصلش....متقوليله يا خالتي
بصيت لخالتي برجاء تقف جنبي المرادي بس وانا بعد كدة همشي عالصراط المستقيم ومش هعمل حاجه تاني ابدا..بس المرادي يارب تعدي على خير بس
_ للحق يا ميمو يا ابني ...دي بتدخل تنام قدامي ولا بيبانلها حس ...ماانت عارف اختك من بعد ما خلصت تعليها وهي قاعده في البيت لا بتروح ولا بتيجي
_ والبت دي هتتبلى عليكي ليه ان شاء الله؟
روحت سحبته من دراعه بهدوء وقعادنا عالكنبه...لعله يهدي صوته اللي بيرعبني أكتر دة
_يا ميمو دي بت غلاويه ....يعني انت مش فاكر هي واخوها كانو بيعملوا معانا ايه زمان ....ولا انت ضربت اخوها ده كام مرة بسبب اخته واللي كانت بتعمله معايا في المدرسه واحنا عيال...دة قاصدة تشوه سمعتي وتقول عني كدة عشان عارفه كويس ان أي حاجه هتقولها عني الناس هنا والجيران هيصدقوها
لقيته بصلي شويه ....صدقني ولا لأ....انا خايفه ....ماهو يا صدقني ياهلاقي ايده دي نازله على وشي دلوقتي...وفعلا رفع ايده ...رجعت راسي لورا بخوف ...لقيته سحبني براحه لحضنه وباس راسي وهمسلي بصوت حنين كله حزن
_ متزعليش وانا اهو جبتلك حقك وعرفتهم ازاي يقولوا عنك كدة... بس لو حد منهم او اي حد من الحته كلها فكر يضايقك تاني او يمسك بكلم زي زمان كلميني بس ...هتلاقيني في دقايق عندك هنا....ماشي
هزيت راسي وانا في حضنه بمعنى ماشي ...واتنهدت انه الحمد لله صدقني ....كان لازم يصدقني بما اني جبت سيرة اللي كان بيحصل زمان على يده وربطه باللي البت دي قالته عني دلوقتي....وانا عارفه ميمو ... بييجي عند سيرة زمان وتفكيره كله بيعطل ويركز بس في اللي كان بيحصلي انا وهو واحنا صغيرين
لقيته رفع وشي ليه وقالي بصوت هادي حنين
_ لو المكان هنا مضايقك كدة ...تعالي معايا ....وهناك هتكوني بعيده عن كل القرف ده وكل اللي هنا
لقيت خالتي جايه من ورانا وفي ايديها صنيه عليها أكل
_ وتسيبوني انتوا الاتنين يا ميمو.... دي اخرتها برضك ...واخرة اللي خالتكوا عملتو عشانكوا؟!
_ ما انتي هتيجي معانا يا هند.... محدش فيكوا هيستنى هنا
_ انت عارف رأيي في الموضوع دة ....انا مش هسيب هنا واجي معاكوا في حته
_ انا مش عارف يا هند انتي ايه اللي محببك في هنا.... انا محتاجوا تبقوا معايا خصوصا الفترة الجاية
اتعدلت وسألته بحماس وانا من جوايا بحمد ربنا ان الموضوع عدا على قد كدة
_ اشمعنى يا ميمو الفترة الجايه ...انت تعبان ولا ايه؟
_ تعبااان!!! مالك يا ضنايه عندك ايه يا نور عيني؟!!
_ استهدي بالله يا هند مفيش حاجه....انا بس عايزكوا تبقوا معايا عشان... عشاان خلاص قررت اني اتجوز وأكيد عايزكوا تبقوا معايا في كل خطوة
صرخت بفرحه وانا مش مصدقه اللي بيقوله أصلاً
_ بجد يا ميمووو!!!..هتتجوز وتبقى عريس ..!!
اتصرعنا انا وهو بسبب صوت زغروتة خالتي اللي جابت اخر الشارع
_ ياهند...ياهند اصبري ...انا بقول لسه هتقدم معرفش الدنيا هتعمل معايا ايه
_ هتعمل السعد والهنا ياارب يا حبيب خالتك .... وانا في ديك اليوم اللي احضر فيه فرحك واجي اخطبلك وأشوف عيالك يا ابن سهير يارب.
ابتسمنا على دعا خالتي اللي دايما تشبعنا بيه دة ...وكأنها أمنا... بعدين لقيت ميمو اتعدل واتكلم باهتمام
_ طيب حلو .... انا بقى مستني معاد منها عشان اروح اقابل والدها وعشان كدة عايز نكون جاهزين ... فيلا جهزوا نفسكوا وتعالوا معايا..هنروح شقتي النهارده
_ ومالو يا ابني نيجي معاك ... بس مانروح من هنا وهو احنا يعني لازما نسيب بيتنا ونروح نقعد معاك في أخر الدنيا
_ يا هند ما هناك بيتكوا برضه.... وبعدين مينفعش المسافة بين هنا وهناك هتبقى صعبه وانا عايز تكونوا معايا بحيث الدنيا تبقى ظابطة عن كدة ومكنش شايل هم حاجة
_ طيب خلاص نيجي ...بس اليومين دول لحد ما ربنا يفرحك ويتملك على خير لكن هما يومين وهتلاقيني رجعت هنا تاني...اه انا معرفش انام غير في فرشتي
_ انا عن نفسي يا ميمو معنديش مانع ...طب والله وحشني اني اطلع برة البيت دة والمنطقة دي كلها
بعدين قومت بحماس
_ في أقل من دقايق هكون محضره شنطتي وجاهزة
دخلت اوضتي وقفلت الباب عليا ...لازم اتصرف في موضوع الشغل قبل ما امشي وقبل اي حاجه ...ايوا ما قداميش غيره
_ الو...ايوا يا فريد ...اسمع بس وبلاش مواويل عالصبح انا هغيب عن الشغل كام يوم كدة... معرفش قد ايه..
بعدين كملت بابتسامة عريضة ونبرة فرحة
_ اخويا ميمو هيتجوز وهنروح نقعد معاه اليومين دول
...…..…..…..…..….…
_ طيب ماشي ....نستنى اخوكي قصي وأول ما يرجع نحدد معاد وييحي يقابلني انا وهو
_ وليه يا بابا نستنى قصي .. انا كفاية عليا حضرتك جدا ربنا يخليك ليا اما قصي فخليه في شغله وييجي براحته
_ انتي شايفه ان كلامك بالطريقة دي عن أخوكي ..صح؟
لاحظت طبعا زعل بابا وتغيير نبرته في الكلام...فتراجعت فوراً طبعا عن اي معارضات وجدال كنت عايزة أقوله
_ طيب وهو المفروض هيرجع امتى؟
_ كلها كام يوم ويكون خلص ارتباطاته هناك ويرجع وأول ما يرجع اوعدك هعملك اللي انتي عايزاه
_ طيب...طيب ممكن حتى تقعد معاه قعدة تعارف كدة بس...ولما قصي ييجي نبقى وقتها نقعد تاني ونتكلم بقى في الرسميات.
_ قولت مفيش حاجه هتحصل طول ما اخوكي مش موجود.
قومت من الكرسي بتاعي وروحتله ... اتراجاه زي زمان
_ يا بابا دي قاعدة تعارف بس ...انا عايزاك تقعد معاه وتشوفه وتسمعه ومفيش اي اتفاقات الا لما قصي ييجي متقلقش
لقيته سكت شوية... بعدين اتنهد
_ ماشي يا غلباويه ... نقابله بس قاعدة تعارف وبس ...لازم اخوكي يكون حاضر كل شئ من البداية... عشان كمان يعرف ان اخوكي علطول معاكي...حاضر...وفي ضهرك....أهلك لتهلك يا بنتي.
..….….….. ....................
كنت نايم في اوضتي ومستني ترد عليا...برن عليها من ساعة ما جيت عشان اعرف عملت ايه مع والدها وبرضه مبتردش .....
سندت التليفون على دقني وانا نايم وفكرت ...ياترى ايه ممكن يكون حصل خلاها متردش عليا.... معقوله يكون باباها لحق س....
وقبل ما اكمل تفكيري لقيت اللي قطعت حبل أفكاري بدخولها الأوضة بالشكل دة
_ ميمو.... انا جوعت ....معندكش أكل هنا؟
حدفتها بالمخده على طريقتها في فتحة الباب دي
_ بنخبط قبل ما ندخل دخلة المتسولين دي يا متخلفه انتي.. وبعدين ما تروحي تاكلي هو انا قافل عالتلاجة
ردت وهي رايحه ناحية دولابي تفتحه
_ اوف مانا زهقت بقى وصراحة عايزة اعمل اكل بس مش عارفه أولع البوتجاز ده...ايه دة الله!!!!!!
رفعت عيني من عالتليفون ابص أشوفها منبهره كده بايه...لقيتها بتطلع في هدومي وبتحطها عليها وكأنها بتقيسها
_ هو الشميزات الكاروهات دي عندك ده انا نفسي فيه من وقت ما طلع بس ولاد الذين ماسكين فيه قال الواحد ب500 جنيه قال!!
_ هو ايه دة اللي ب500 جنية ...وبعدين انتي مالك انتي ومال هدومي .... ؟!
ردت وهي بتطلع جواكت جلد من اللي ماليا الدولاب لاني مبحبش البس غيرهم تقريبا
_ عشان خاطري يا ميمو اديني اتنين من دول وربنا هدومك بتبقى جامدة عليا ... عشان خاطري
قومت اجبها من قفاها قبل ما تشطب على باقي الدولاب في ليلتها دي
_ بت انتي... انتي مش كنتي جاية تقولي جعانه... دلوقتي جعانة وطمعانة ..... انا كنت ارتحت من حوار الهدوم دة من زمان
_ طيب سيبني يا ميمو...واخدني على فين انا كنت عايزة اقعد معاك في اوضتك
روحنا اتجاه المطبخ وانا برضه ساحبها من قفاها
_ مش بتقولي جعانه...تعالي هساعدك نعمل اكل وبالمرة نصحي هند تتعشى معانا زمانها جاعت
ودخلنا فعلا المطبخ سوا وساعدتها تولع البوتجاز .... بعدين طلعت حاجات من التلاجة وبدأت اساعدها في الأكل لكن كان بالي مشغول بيها ياترى مبتردش ليه.... أول مرة اكلمها ومتردش عليا والمرادي بالذات مينفعش تعمل فيا كدة وتقلقني بالشكل دة
_ ميمو ...انهو احلى... اللي بطعم الفراولة ولا اللي بطعم المانجة؟!
_ .........!!!!
_ ميمو..ميمووووو
رفعت وشي للي بتزعق دي
_ وبتزعقي ليه دلوقتي ....مانا قدامك أهو..
_ قدامي برضه...دة انت مش هنا خالص ياعم ...انا بسألك انهو طعم في دول احلى
_ الاتنين حلوين.... اعملي اللي يعجبك يا زوزو
_ طيب خد قطعلي المنجاية دي على ما ادوق الطعمين واشوف مين فيهم احلى
هزيت راسي وأنا ببص في التليفون... برضه مفيش حاجه...قلبت التليفون بخيبة أمل يبقى الموضوع أكيد انتهى ....
قربت اخد المانجة من ايد زينب....صح كدة... هي سلمى تستاهل أجمل حد في الدنيا وأكيد الحد دة مش أنا .... ربنا بيحبها اكتر مني .... عشان كدة اكيد بعدها.
_ ميمو...تليفونك بينور .... باين حد بيرن عليك
فوقت من شرودي في كل الدوامة دي وبصيت على شاشة التليفون....
_ مبترديش ليه ...برن عليكي من الصبح..
بعدين سكت أقل من ثانية اخد نفسي من لهفة صوتي دي وكملت بصوت منكرش انه خايف
_.....باباكي رفض... صح؟
كنت وصلت اوضتي وقفلت بابها ورايا ولسه التليفون على ودني بسمعها ...مش حابب زينب ولا اي حد يشوفني وانا بسمع ردها برفضي....ضعفي دة محدش له حق يشوفه غيري
= أولا لاحظ انك بتزعقلي يا ميمو واول مرة تكلمني بالشخط دة...
_ وثانيا يا سلمى...انجزززي..
سمعت نبرة في صوتها مش ممكن تتماشى مع اللي انا متوقع اسمعه منها ابدا
= ثانيا بقى يا سيدي.... انا بكلمك عشان اقولك تجيب خالتك واختك عشاان عايزة اتعرف عليهم ...وتيجي تقابل بابا... عارف يا ميمو لو اتأخرت عن بكرة الساعة 8 بالظبط هعمل فيك ايه؟!
يعني ايه الكلام دة .... مش فاهم حاجة ابدا... يعني باباها وافق!!
= عارف لو اتأخرت عن معادك انا هعمل فيك ايه؟!
غمضت عيني براحه...وانا كل دقة في قلبي بتدعي معايا انها تكون ليا ....وربنا يكمل على خير
فتحت عيني وانا سامع صوت انفاسها الفرحانة زيي بالظبط وهي مستنيه ردي...
رديت عليها وانا رايح اتجاه السرير
_ ولو اتأخرت ...هتعملي ايه يعني؟!
_ طب اعملها كدة .... وانا هسخن بابا عليك وهو بيقدر اللي بيلتزم بمواعيده جدا ...يعني هيبقى ساخن خلقه
رديت عليها بابتسامة عريضة وانا بشيل المخدة احطها على رجلي اسند عليها
_ لأ في عرضك....احنا عايزينه هادي كدة لحد ما أخدك وتبقي معايا بعد كدة يعملوا اللي هما عايزينه.
_ ايه تاخدني دي ...هو انا شئ يا ميمو؟!
_ أقسم بالله أحلى وأجمل شئ في حياتي....واحلى واطعم ميمو بسمعها منك انتي يا اغلى ما عند ميمو
لقيتها سكتت مع سكوت نفسها اللي كان واصلني ... واضح كمان ان فيه عيون مبرقه دلوقتي... قادر اتخيل شكلها.... ضحكت غصب عني على شكلها في خيالي ....
_ ع...على..على فكرة بقى.... انا لازم اقفل عش.. عشان .. عشان بكرة ورانا مدرسة وشغل.
_ بكرة الجمعة يا سلمى..
سكتت شويه بحيرة
_ اه دة بكرة الجمعة ....عشان.. عشاان بكرة الجمعة ومش ورانا حاجة ..ارتحت..س..سلام بقى.
وقفلت.... بصيت في التليفون وانا بضحك ... ومن جوايا مش مصدق ان الحلم بيقرب كدة
خرجت لزينب لقيتها واقفة بتاكل الأكل اللي عملته
_ صدقي انك عيله مش كفاءة...بتاكلي من غيري يا جزمة
ردت وبوقها مليان بالأكل
_ اعملك ايه ما انت اللي اتأخرت... شكلك كنت بتكلم المحروسة بتاعتك
قالت كدة وهي بتغمز بعنيها مع خدها المنفوخ بالأكل دة
قربت منها ... وفاجأة خبطها في خدها المنفوخ دة ...
فضلت تكح وكأنها بتحتضر... روحت اجبلها ميا وانا بخبطها على ضهرها
_ أحسن عشان تعرفي انها مش محروسة ولا حاجة
التفتت ليا وهي بتمضغ الأكل
_ طب وبتضحك على ايه دلوقتي... خلاص يا سيدي قصدي ست......
بعدين بصتلي وسالت بجد
_ صحيح يا ميمو...هي اسمها ايه؟!
رديت عليها بابتسامة تناسب اني اتكلم عنها...وانابكمل تقطيع المانجة اللي كنت بعملها
_ اسمها سلمى
لقيتها قربت في قعدتها وسندت بايديها دقنها
_ ميمو.... انت بتحبها؟
رفعت عيني ابصلها وسكت .... ماهو دة اللي ناقص اتكلم مع عيله زيها في الحب والغرام كمان
_ طيب قولي طيب ... حلوة؟
_ اجمل من الجمال نفسه يا زينب.... لو حلفتلك انها اجمل حاجه شافها اخوكي مش هتصدقي... ولا... ولا يمكن عشان انا دايب فيها شايفها احلى الحلوين؟
كانت مبتسمة بعدين لما سألت فكرت شويه وردت
_ معرفش....اصل انا هعرف منين ....بس بسمع ان اللي بيحب بيشوف حبيبه اجمل حد في الدنيا..دة أكيد
رديت عليها وانا بتأمل قطع المانجة في ايدي
_ عامله زي قطعة مانجة متلجة في عز الحر... لما بشوفها بحس بأمان عجيب ورغبة رهيبة بأني اقوى من الدنيا ويمكن دة اللي مديني طاقة عند اني احافظ عليها واحارب اي حاجه عشانها... ولما بتغيب بحس كأني عطشان وان الجو لا يطاق
بعدين مسكت قطعة المانجة وتأملتها أكتر
_ صح....هي قطعة مانجة.....مانجتي
_ طب دوقني كدة...
_ اه يا بنت ال.....
الحيوانة الفصيله دي فصلتني وخطفت قطعة المانجة من ايدي تاكلها
....…...................................
قفلت معاه وانا بحاول استوعب ان كلامة اللي قاله دة ليا انا... واحاول كمان استوعب اني لازم اعود نفسي على كلامة دة...دايما كنت أشوف حاجات كتير وكلام كتير في عنية....مكنتش محضرة نفسي ابدا للحظة اللي اسمعه فيها كل الكلام دة...
قومت من السرير وفتحت دولابي ...مش عارفه المفروض البس ايه ...بس كل اللي اعرفه اني لازم اظبط كل حاجة من دلوقتي...لازم بكرة اكون زي القمر في عيونه ....ياترى هو كمان هيبقى عامل ازاي ...وهيلبس ايه.... والله يا ميمو لو جيت كاجوال زي كل لبسك في العادي لأكون...... لأ مش هزعل قوي يعني عشان هو بيبقى زي القمر فيه برضه......اووف ...امتى بقى ييجي بكرة ويبجي هو لحد هنا وأشوف
#ميمو
الفصل كان المفروض اطول من كدة والله وأحداثه أكتر ....لكن لقيته هيطول عن كدة وهياخد وقت في مراجعته كمان ..لكن باذن الله تكملته تنزل بكرة او بعده بالكتير.... رأيكوا وتوقعاتكوا بقى
ياترى المقابلة هتكون عامله ازاي...وهل هتم ولا قصي ناوي يعملنا مفاجأة ؟!!!
وايا كان اللي هيحصل ويتم فبعده هتكون معاملتهم مع بعض في المدرسة عامله ازاااي؟! اكيد مش عااادي خااالص....
احداااث كتير جااايه ..... وزوزو اللي بتقول معرفش وهعرف منين اصلا دي.....ياترى مصيرها في اللي جاااي هيخليها تحس باللي أخوها عايشه ولا الموضوع هيبقى عكسي تماما..
استنوني في الفصول الجااايه ....عشاان عندنا شغل جااامد مع بعض يلا قراءة ممتعة دايماً يااارب♥️♥️🥰
#رانيا_أبو_خديجة
لقراءة الفصل الثالث والعشرون من رواية ميمو 👇👇
للانضمام لجروبنا على الفيسبوك 👇
👈 انضمام 👉
او للصفحة الرئيسية الخاصة بالروايات 👇👇
👈 انضمام 👉
إرسال تعليق