رواية ميمو الفصل السادس بقلم رانيا أبو خديجة
رواية ميمو بقلم رانيا أبو خديجة
رواية ميمو لرانيا أبو خديجه
الفصل السادس
#ميمو
#رانيا_أبو_خديجة
المرادي مسمعتش صوت ضحك الفصل بس ....لأ كان في صوت ضحك رجولي كدة اتخلل الاصوات الطفولية دي ...خلاني التفت أدور على مين دة.... لحد ما لمحتة واقف في الشباك... بيتكلم ببتسامتة دي
= دلوقتي بس عرفت... الواد دة مش معمر هنا ليه
_ ميموووو
...جري عليه هيثم يحضنه ...حضنه هو كمان وعينه عليا زي ما عيني عليه بحاول استوعب وجوده عندي في الفصل
_ ميمو....بتعمل ايه هنا
_ هكون بعمل ايه... جاي أشوف الاستدعاءات اللي كل شوية بتتعملك دي
كان بيكلمة وعينه برضه في عيني ... سمعنا جرس ان الحصة خلصت .... اتوترت من نظراتة... وفاجأة لقيت مس وفاء جاية تدخل بعدي...لميت حاجتي واخدت اقلامي ونضارتي وتجاوزتة بتوتر أخرج من الفصل وسبتة بيتكلم مع هيثم اللي من أول ما شافة وهو عامل زي ما يكون لقى ضالته
التفت أبص عليه بعد ما خرجت لقيتة وقف معاها وبيشاور على هيثم ..أكيد بيسألها عنة ...لقيته التفت ناحيتي .... اية الابتسامه اللي ابتسمها دي بقى .... اكيد لما لقاني واقفة ببص علية
طب ممكن نحترم نفسنا بقى وتشوفي انتي رايحة فين ... قررت فعلاً احترم نفسي واروح غرفة المدرسات وأشوف شغلي ... بس فاجأة حسيت بخطوات ورايا بعدين حد بيبسبس زي ما يكون بينادي على قطة ... ايه الأسلوب دة ...عملت نفسي ولا واخدة بالي وكملت طريقي
_ بس بس....انتي ياااااا
وفاجأة لقيتة قدامي بطولة دة...اتوترت اكتر واتكلمت بارتباك
_ نعم.... حضرتك بتنادي عليا ليه ... وبعدين في حد بينادي على حد كدة ...
_ مأنا للأسف مش فاكر اسمك ايه ...ولو قولتلك انا فاكرك بايه أكيد.. هتزعلي
_ قصدك ايه؟!
_ لا لا متركزيش ..متركزيش .... انا ميمو لو مكنتيش فكراني
ازاي مش فاكراه هو انا نسيتك من وقت ما شوفتك
_ فاكرة
بصلي شوية بعدين هرش في راسة واتكلم بحرج
_ على فكرة انا كنت قلقان لأخوكي يزعلك بعد ما شافني معاكوا في العربية...شكلة عصبي
اتنهدت افتكرت زعيقة وعصبيتة عليا اللي أول مرة اشوفها من قصي وأسمع الكلام اللي سمعته منه دة
_ لأ خالص ..... قصي أخويا متفاهم معايا جداً ....
بعدين سألتة أحاول أغير الموضوع
_ هو انت بتعمل ايه هنا؟
_ كنت جاي أشوف الأبلة اللي مستقصدة هيثم دي
كان بيتكلم بنبرة وكانه قاصدني ...عدلت حاجتي اللي في ايدي ورديت عليه
_ قصدك انا؟
لقيتة بيهز راسه بمعنى ايوا وهو بيبتسم كدة
_ أكيد انت شوفت الولد بيتعامل ازاي دلوقتي... دة غير انة مش مؤهل تماماً لمستوى المدرسة ...ومستواه الدراسي مبيتحركش...متزعلش مني انتوا كنتوا المفروض تتابعوا معاه أكتر من كدة
بعدين انتبهت وسألتة
_ صحيح هو هيثم يبقالك ايه
اخيرا شال الابتسامه اللي متنحلي بيها دي من وقت ما وقفنا وحقيقي موتراني بجد وحط ايدة في جيوب بنطلونة ورد
_ تقدري تقولي أخويا الصغير....والدة يبقى زي أبويا ...وبجد بعتبر نفسي أخوه الكبير
افتكرت تعلق هيثم بية وكتير اشوفة لامم صحابة وبيحكيلهم عن صاحبة الكبير اللي اسمة ميمو وقد اية بيحبة وبيقلدة
_ للأسف هيثم كمان واضح انة مرتبط بيك جدا وبيقلدك في كل حاجة تقريبا
اتعدل كدة في وقفتة وعيني في عينة
_ للأسف ازاي يعني؟
اتوترت اكتر من طريقتة وتقلة دة حتى في وقفتة ... عدلت كتبي اللي على ايدي أكتر واتكلمت وانا بحاول ابعد عيني عنه
_ يعني كنت بقول لو ياريت تستغل دة وتعلمة حاجات كويسه وتفيدنا احنا هنا .. زي مثلا ازاي يحب مدرستة ويحب مذاكرتة عشان يتميز ويقدر يواكب زمايله
_ انتي شايفة ان انا بعلمة حاجات مش كويسة؟
اتوترت أكتر من نبرة صوته اللي بقت اهدى اشبه بالهمس
_ انا المفروض دلوقتي عندي حصة ولازم ادخل ... ياريت حضرتك لو تقدر تتابع معاه او تقول لأهلة الكلام دة...بعد اذنك
كانت بتتكلم وهي باصة في الكتب اللي على ايديها.... مش عارف لية عجبني حالتها كدة...توترها دة مخليها لذيذة وحجابها دة مخليها قمر... مختلفة
كانت هتمشي فعلاً.... عليت صوتي نسبياً وانا بتكلم عشاان تقف
_ على فكرة... هيثم زكي وشاطر جدا هو بس اللي شقي شويتين وبيحب اللعب
_ تمام تمام... انا فاهمة ...بس الأطفال كلها كدة وعشان كدة لازم اهتمام من والده ووالدته او يعني....
عدلت الكتب على ايديها تاني وفتحت النضارة ولبستها ...يالهوي عالعسل بالنضارة دي
_ من حضرتك...بما انة بيعزك كدة
_ طيب قوليلي اعمل ايه وانا هعملة
طيب دلوقتي هو بيسأل عن الولد...اية الابتسامه العجيبة اللي بيكلمني بيها دي ...عدلت النضارة اللي لبستها مخصوص احاول اخبي عيني شوية من عينة القوية قوي دي
_ احم... ااا.. ممكن تذاكرلة مثلاً
والله نفسي أضحك بس لأ لتفتكرني بضحك عليها بس حقيقي اسلوبها وطيابتها دي تشد ....قربت منها خطوة وعارف انها هترجعها
_ طيب ممكن تقوليلي أذاكرله إزاي ؟!
لأ كدة استظراف وقلة أدب ... نبرة صوتة مش مريحاني ونظرتة وطريقته وهو بيقرب كدة تخوف
_ احم.... لأ انا كدة اتأخرت على شغلي .... حاول انت بس مع الولد ولو في مشكله ابقى ارجعلي...بعد اذنك
سابتني بتوتر وارتباك ومشيت واختفت فعلا بعد أخر الطرقة...
_ طب وربنا عسل ...ومزة
لقيت يوسف خارج من اوضة المديرة اللي كان داخلها من شوية
_ خير ....عملت اية جوا
_ قولتلها اننا مش فاضيين احنا لكل شوية يطلبوا ولي أمر وبتاع ... تقوم تكلمني في مصاريف الواد وصندوق تطوير المدرسة!
…...…......…...............
_ صباح الخير يا خالتي
_ صباح الفل يا عيون خالتك
روحت قعدت جنبها
_ بتعملي ايه؟
_ بخيط هدومك اللي لقيتها محتاجة تظبيط في الغسيل
_ وريني كدة... يا خالتي دي هدوم انا مش هلبسها تاني ... حرام عليكي عنيكي
_ اهو بسلي نفسي ... وبعدين مش هتلبسيها ليه...يا بت دة انتي كنتي جيباه جديد مع الحاجات اللي جبتيها الشهر اللي فات
_ دة الشهر اللي فات....لسه فاكرة
_ بالحق خليني اقولك قبل ما انسى .. اخوكي ميمو كلمني امبارح بعد ما دخلتي نمتي وسأل عليكي
_ ايه..م ميمو...ووقولتيله ايه؟
_ هقوله ايه يعني...قولتله انك نايمة ...وقال هيبقى يعدي يشوفك
_ وايه الغيبة دي ...بقالي أكتر من شهر مشوفتهوش ولا جة.
_ مشاغل يا بت مشاغل ...هو أخوكي فاضيلك
اخدت البتاعة اللي في ايديها دي اكملها واتكلمت بزهق
_ شغل شغل ....يعني هيعمل ايه بكل دة في الأخر ...مأحنا زي ما احنا وعيشتنا زي ما هي.
_ اهاا.. عارفه انا الكلام دة... شوفي يا بنت سهير كلام تاني في موضوع اني اعزل وأسيب بيتي والمنطقة اللي اتربيت فيها مش هيحصل انا قولتها لأخوكي وبقولهالك أهو.
_ وفيها اية يا خالتي...مانروح نقعد مع ميمو في شقتة دي حلوة قوي وهو يتمنى
لقيتها خطفت البتاعة من ايدي
_ روحي انتي ...انامرتاحة هنا وهعيش باقي حياتي هنا وهموت هنا.
بعدين بصتلي وكملت
_ عارفه أمك يا بت يا زينب .... كانت طول عمرها زيك كدة طول عمرها نفسها تطلع من هنا لحد ما اتجوزت أبوكي الله يرحمة ويرحمها
ابتسمت اما جابت سيرتها
_ كانت شبهي قوي يا خالتي مش كدة
_ يالهوي يا بت يا زينب دي كانت قمر ....تقول للقمر قوم وانا اقعد مكانك ... كانت شبهك كدة بالظبط في طولك وحلاوتك ..حتى شعرها واخده طولة منها ...اوماال ابوكي كان هيموت عليها ليه لحد ما اتجوزها.
ابتسمت أكتر على سيرتهم ...بحب علطول القاعدة دي مع خالتي بالذات عشان خاطر تكلمني عنهم... قربت منها واتكلمت بحب في السيرة دي
_ انا فاكرة يا خالتي وانا صغيرة كان أي حد يشوفني معاها يقول ان انا شبهها قوي
_ اه ...حتى أخوكي ميمو في شبه منها برضه
_ ميمو... أوقات بحسة حنين زي ماما الله يرحمها ..واوقات تانيه بحس انه جامد وناشف زي بابا بالظبط
_ أبوكي كانت حنية الدنيا فيه ... بس الدنيا يا بنتي بتعلم اللين ازاي يبقى حجر.
سمعت تليفوني بيرن
_ ردي دة تلاقي أخوكي ...هو قالي هيبقى يكلمك
قومت أجيب تليفوني من الاوضة أرد علية .... انا وميمو ملناش غير بعض بعد خالتي ورغم خوفة عليا بس عصبيتة برضة في أي حاجة تعارضة بتبقى مشكلة ...
دة مش هو
_ ألو ... ايوا يا مستر كمال .... لأ مش هاجي النهاردة مش يومي أصلا
.... طيب هشوف ظروفي .....يادي اللبس متقلقش من موضوع اللبس دة ..حاضر
…...…...…..…......................
بعد مرور يومين
_ ميمووو... ميمووو
وقفت بالموتوسيكل بتاعي التفت ...لقيت هيثم اللي بينادي عليا وجاي من بعيد يجري ...رجعت بالموتوسيكل ليه
_ اية اللي موقفك بين زحمة العربيات دي عالصبح كدة؟
_ مستني اتوبيس المدرسة هو بيعدي ليا من هنا...انت بقى رايح فين؟
_ ملكش دعوة
قولتله كدة وانا بشده من الاوقصة بتاعته دي ...
ضحك
_ عشان خاطري.. عشان خاطري رايح فين
_ رايح لأخوك الورشة .. عندنا شغل ومشاوير قد كدة
_ طيب ما تيجي توديني المدرسة انت عرفت مكانها ...عايز اوريك لاصحابي واقولهم انك صاحبي.. عشان خاطري.. عشان خاطري يا ميمو
بدأت اعدل الموتوسيكل واجهزة عشان أمشي
_ بص هناك كدة....مش الاتوبيس بتاعك اللي جاي هناك دة...يلا اتكل على الله
_ ماشي يا ميمو..ماشي ... بس في يوم برضه هاخدك معايا افرجك لأصحابي
كنت بدأت اعدل الموتوسيكل فعلا وهطلع بيه ... لقيته بيقول ويبرطم وهو ماشي
_ طب والله لأرخم على مس غدير أو مس سلمى واخليهم يعملولي استدعاء النهاردة.. عشان تيجي وأعرفك على صحابي ها
سلمى!!!.... لقيتني بنادي علية
_ هيثم ..
_ نعم ..... عايز اية ... الاتوبيس هيسبني ويمشي
_ أركب
لقيتة قال بفرحة وهو بيضم ايدة الصغيرة دي بحماس
_ بجد يا ميمو.... هتوديني
_ هتركب وتنجز ولا امشي
_ هركب اهو ..هركب هركب
_ امسك فيا جامد عشان همشي بسرعة
رد بفرحة وحماس وهو بيكلبش فيا
_ ماشي...بس امشي بسرعة جااامد
طلعت فعلا وكنت طاير بيها زي ما بحب امشي بيها علطول ....
_ قولي بقى يا هيثم .... مس سلمى بتشتغل في المدرسة دي بقالها كتير
رد وهو بيخبي وشه فيا من شدة الهوا
_ مش عارف.... بس أنا من وقت ما روحت وهي هناك
_ اسمها سلمى ايه ..تعرف
_ اسمها؟!!.اسمها سلمى ...دة اللي انا اعرفة ... ولا استنى افتكرت ...لما كانت بتسألني على اسمي اول ما روحت المدرسة قالت ان اسمها سلمى عمران
_ هي قالت ان اسمها كدة
_ ايوا ... قالتلي كل واحد فينا يقول اسمه .... انا بحبها قوي يا ميمو عشان هي طيبة وبتخليني أهزر معاها في الفصل براحتي ...غير مس وفاء... علطول تزعقلي وتشتكي مني
_ مبسوط يا هيثم في مدرستك الجديدة دي
_ قوي يا ميمو ... عشان مبيضربونش فيها ابدا مهما عملت... وبيعلمونا حاجات حلوة قوي موسيقى ورسم ولسة هيجيبوا مدرسة مخصوص تعلمنا العاب...شوفت يا ميمو هيعلمونا ازاي نلعب ....غير مدرستي القديمة خالص ...مكنتش كدة
ضحكت على كلامة دة .... انا بحب هيثم جدا اصلا
_ يا سلام يعني هما هيجبوا مدرسة تعلمك تلعب ازاي...يا متخلف مدرس العاب يعني هيعلموك رياضة .... عشان اما تكبر يبقى جسمك صحي ورياضي
_ زي ما أنت ماكنت بتعلمني
……...........................
_ بس أقف هنا....شوفت وصلنا قبل الباص
وقفت انزل هيثم ...مش عارف ايه اللي خلاني ارفع عيني وكأني هلاقيها واقفة في الشارع مستنياني مثلا... ايه دة!!!
ابتسمت بفرحة مش عارف ليه لما شفتها واقفة قدام بوابة المدرسة مع مدرسة كمان وبتدخل الاطفال من البوابة
واقفة بابتسامة جميلة بتبص بيها لعيون كل طفل يمر عليها ولازم ترفع ايديها اللي تلاعبة من خدودة واللي ترتبلها شعرها وهي داخلة
_ ميموووو ...ميموووو
_ اية يلا...بتزعق لية
_ بكلمك بقالي ساعة ....بقولك انا داخل المدرسة عايز حاجة
…...…...….............
_ صباح الخير يا مس تغريد ...صباح الخير يا مس سلمى
_ عيون مس سلمى....صباح النور...استني يا أشرقت
انحنيت على ركبتي اظبطلها ربطة الكارفاتة بتاعتها ...قمة سعادتي وفرحتي لما اكون وسط أطفالي دول ...بحب اعملهم كل حاجة والحمد لله بلاحظ في دة حبهم المقابل ليا
لقيت غدير بتقولي
_ سلمى انا هطلع بطابور الباص دة .... اما الباص الباقي ييجي ابقى طلعيه انتي ماشي
هزيت راسي بمعنى تمام وانا بربط لحمزة رباط الكوتشي بتاعة
_ اية رأيك كدة؟
_ لأ اعملية ربطة قصيرة عشان بيوقعني
_ انا مش قولت قبل كدة تخلي بابا يربطلك الكوتشي قبل ما تنزل من البيت... عشان الرباط ميتبهدلش كدة ترابة
_ مش بلحق بابا بيكون راح الشغل وماما علطول متأخرة ومستعجلة عشان الباص
_ عموما يا سيدي....اهو....اتربط وبقى قصير عشان مش يوقعك.
لقيتة شد رجول البنطلون من عند الركبة يحاول يبص عالكوتشي ...ابتسم بارتياح وقرب يبوسني من خدي
_ شكراً يا مس
_ عيون المس انت يا حمزة
بوسته على خده القمر دة .... يارب يبقى عندي واحد زي دة ومش عايزة حاجة تاني
حسيت فاجأة بحد واقف جنبي ... رميت عيني لقيت كوتشي أبيض ....مش طفل ... لأ دة حد كبير!!!
رفعت راسي وانا لسة على ركبي ....
= صباح الخير!
..…..…..….............
_ زوزو !!!!
التفت أشوف عايز ايه دة....مش هخلص انا عارفه
فضل يبصلي من فوق لتحت وبعدين اتحولت نظرتة لقرف كدة
_ اية اللي انتي لبساه دة
ابن ال.... والله ما عايزة اشتم ... خلاني فعلا أبص على نفسي بشك مالي يعني....ما انا حلوة أهو... بصيت على الدريس التيجر اللي لبساه والله كان شكلة حلو ضيق من فوق ونازل بوسع ومفتوح من الناحيتين لحد ركبتي تقريبا... مع صدر مقفول واكمام مفتوحة لحد الكوع ونازله بوسع ....انا كنت شرياه عادي بس انا اللي عملت فية كدة عشان يناسب الشغل هنا ...انا اللي بعمل كل لبسي هنا تقريبا لان دايما هدوم الشغلانة دي مش بتعجبني وطبعا مش هتعجبني دة شكلها يقرف
_ فين البدل اللي انا جبتهالك؟
_ عندك جوة في الأوضة
_ ومبتلبسيهاش لية ....دة منظر رقاصة
_ مالي يعني ما انا قمر أهو
فعلا كان شكلي مش وحش ودايما بلتزم بالميكب اللي يقول عليه وكنت رافعة شعري لفوق في ديل حصان مكوي ومفرود لأخر ضهري وعلية لامعة تناسب لمعة الفستان يعني شكلي مناسب أهو
_ يا ستي مقولناش حاجة ... بس اللي انتي لبساه دة مش لبس رقاصة ولا انتي مش شايفة زمايلك اللي معاكي بيلبسوا اية
بعدين بصلي تاني من فوق لتحت
_ اللي انتي لبساه دة لما تكوني شغالة في مكتب لكن احنا هنا في كبارية ولا أنتي مش واخدة بالك
_ مكتب!! طب شوف يا أستاذ كمال الي هنا دول مش زمايلي انا مليش اصحاب هنا وبالتالي انا مش شبة حد ومش هعمل زي حد وعجبني شكلي واسلوبي كدة ولو مش عجبك يا اخويا نفضها سيرة ومش هتشوف وشي هنا تاني براحتك
_ استني هنا انتي رايحة فين...انا بكلم..
_ شيل ايدك من عليا ومتعليش صوتك وسط الزباين مش انا اللي اتعامل كدة .... انا زوزو
صوتي علي زي علو صوتي وبدأنا فعلا نلفت الأنظار لينا ...يادي الغلب انا مش بتاعت الفضايح دي
_ انتي فاكرة شغلك هنا رفاهية دة شغل والتزامات ....يعني مفيش حاجه اسمها نفضها ..مفهوم ولا لأ
لأ كدة كتير زقيت ايدة اللي مصر يمسك بيها دراعي دي... واتكلمت بصوت ينفع مع الاشكال دي
_ لو فاكر ان انا سكتالااالك عشان باقية على هنا لاسمح الله تبقى غلطااان .... والمخروب بتاعك دة انا مش دخلاه تاااني
فضل يبص حوالية بتوتر من انتباه الناس اللي قاعدة عالترابيزات ولمتهم حوالينا
قرب يتكلم بصوت هادي المرادي وبرضة محتجز طريقي ....سمعت صوت من ورايا جاي يزعق بتقل في لسانة زي ما يكون مش في وعية
_ انتوا خواتونا بكلامكوا دة ... وانتي يا حلوة يا قمورة ما تطلعي تدلعينا بدل الخناق اللي مش لايق عليكي دة
_ انت بتكلمني انا يا بتاع انت؟!
لقيتة قرب أكتر ووراه رجالة شكلها جاية معاه
_ ايوا انتي واطلعي يلا ....وانا معاكي هنا للصبح
اخيرا البقف اللي واقف دة اتدخل
_ ممكن حضرتك تقعد .... واحنا هنطلع النمرة اللي بعدها حالا...واسفين على حصل
_ لأ مش عايزين غيرها....اطلعي انتي يا حلوة يا قمورة انتي ...يلا
_ انت اهبل يا عم انت!!
قولت كدة ويا ريتني ما قولت .... لقيت رجالته بتقرب مننا وعلى استعداد للخناق
وبعد شد وجذب مع صاحب المكان دة لقينا الراجل السكران دة بيطلق رجالتة علينا اللي هما كانوا على استعداد اصلا عالخناق
فضلت واقفة مستنية الدنيا تهدا عشان اعرف ادخل اغير هدومي لقيت فاجأة الدنيا قامت أكتر وكراسي بدأت تترفع علينا .... جريت بسرعة عالأوضة احاول اغير وأمشي ...لقيت تليفوني بيرن
_ يالهووي هي ناقصة ...دة ميمو
قفلت الصوت وحاولت اجهز حاجتي بتوتر خليني اخلص والحق امشي بدل الفضايح دي....زن زن ...لازم ارد والا هيكلم خالتي ويعرف اني مش في البيت
_ ألو ...ايوا يا ميمو.... اه ... لأ...اي
= اية الأصوات اللي عندك دي يا زينب ...انتي فين!!!!
يادي النيلة حطيت ايدي عالتليفون ..مش عارفه أرد ...هقوله انا فين بس ...
سكوتها والأصوات اللي وصلالي دي قلقتني عليها أكتر ...أخدت مفاتيحي بسرعة وقفلت باب الشقة وروحت عالموتوسيكل أركب .....لحد ما سمعت صوت سرينة غريب ...بس انا عارف الصوت دة كويس
لقيتة زعق فيا بصوت خرم وداني تقريبا
_ زينب!!!!! بقولك انتيييي فيييين ؟!!!
اتوترت أكتر من زعيقة .....أخدت شنطتي وخرجت جري من غير حتى ما أغير والتليفون لسه على ودني ...وجريت أحاول أخرج بسرعة أحاول أكون في البيت في أسرع وقت.. وفاجأة شفت في مدخل المحل عساكر داخلة وأولهم ظابط بيبص في كل مكان ...لحد ما لمحني وعيني جت في عينة
_ خلاااص...روحت في داهية
#رانيا_أبو_خديجة
يا ترى اية اللي هيحصل لزوزو البارت الجاي وتصرف ميمو معاها هيبقى اية اوعدكوا انة مش هيكون عادي خااالص؟!
وميمو وسلمى حكايتهم كل شوية تدخل في الجد والجد اللي بجد لسه جااي في البارتات الجاااية باذن الله
باذن الله لو لقيت تفااعل كويس على دة هنزل البارت السابع بدري
قراءة ممتعة ❤️❤️
لقراءة الفصل السابع من رواية ميمو 👇
🔥 الفصل السابع 🔥
للانضمام لصفحتنا على الفيس بوك 👇
🔥 الانضمام 🔥
للانضمام لجروبنا على الفيسبوك 👇
🔥 الانضمام 🔥
#ميمو
#رانيا_أبو_خديجة
@الجميع
إرسال تعليق