رواية ميمو الفصل الثالث عشر بقلم رانيا أبو خديجة
روايه ميمو بقلم رانيا ابو خديجه
رواية ميمو
 |
الفصل الثالث عشر
#ميمو
#رانيا_أبو_خديجة
_ زوزو...يا زوزووو
التفت أشوف مين دة ... كنت واقفة تعبانه وبنهج ...لسة يدوب خارجة من الصاله ونازله من عالمسرح ولازم اغير هدومي واكون في البيت كمان ساعة بالكتير...من بعد أخر مرة ميمو كان هيقفشني فيها وانا بحاول مطولش بره البيت خصوصاً بالليل كدة
_ فريد!... خير...فيه ايه؟
لقيته قرب وهو بيبصلي من فوق لتحت وعلى وشه ابتسامة مش كتير بشوفها من فريد يعني
_ عارفه يا زوزو ايه احلى حاجه فيكي
لأ بنظراتك دي وكلامك شكلك هتاخد قفا
_ لأ معرفش يا فريد وسبني بقى اروح اغير هدومي خلينا اراوح عشان اتأخرت عن معاد رجوعي
قولت كدة وسبته ومشيت لقيته اعترض طريقي تاني
_ فساتينك دي... هي احلى حاجه فيكي....اللي بتختاريها تنزلي بيها الصالة..انتي عارفه انا بحس كمال دة غبي قد ايه لما بيطلب منك تلبسي زي باقي اللي هنا...غبي ...ميعرفش ان دي اكتر حاجة مميزاكي عن غيرك في المحل
بصتله وانا مستغربة
_ ...في ايه يا فريد....مالك ... انت شارب حاجة؟!
_ لأ يا زوزو مش شارب
_ اومال مالك النهاردة....مزاجك رايق عليا كدة ليه؟
_ عايزة الصراحه.... انا عايزك في موضوع بعد الشغل ...ومش هينفع نتكلم هنا
_ موضوع ايه يا فريد ..انا مينفعش اتأخر عن كدة
_ ايه يعني هيحصل... أخوكي وعمره ما زاركوا بالليل كدة ...وخالتك زمانها في سابع نومه ...وانا مش هأخرك ...ها قولتي ايه؟
اتنهدت بتعب من الوقفه واليوم كله
_ طيب هدخل أغير هدومي ...ثواني كدة تقول اللي انت عايزة وتخلصني...تمام
_ تمام يا وحش
..….......................
_ كدة كله تمام ... وفلوس البضاعة كلها هتبقى في حساب الحج بكرة
قولت ليوسف كدة بعد ما قفلنا المحلات والورشة وكنت بركب الموتوسيكل بتاعي عشان أراوح
_ أبويا مأكد عليا التعامل مع الراجل دة بالذات يكون كاش ومناخدش منه اي وصلات
رديت عليه بعد ما ركبت الموتوسيكل
_ طيب خلاص عدي عليه انت بكرة او حد من الرجاله وميمشيش الا لما يصرفهم كاشات في وجودة او حد من طرفه
_ انا بكرة مش فاضي يا ميمو ...هروح دمياط اشوف الدنيا هناك...وابويا مبياثقش في حد غيرك
_ طيب خلاص..بكره على بعد الضهر هكون عنده
بعدين رفعت راسي من المفاتيح اللي كنت بحطها في الموتوسيكل وافتكرت
_ صحيح يا يوسف ...بلغت الحج اني هغيب يومين كدة عن الشغل
لقيته قرب وبصلي شويه وبعدين قال
_ لا مقولتلوش
_ ليه يا ابني ...انا مش قايلك واحنا مع بعض في الورشة امبارح... وبعدين ابوك مبقاش بينزل ...معنتش بشوفه عشان اقوله بنفسي
_ أهو عندك فوق...اطلع معايا قوله
_ طب وليه النداله دي يا جدع...خليك جدع وقوله اني هغيب كام يوم كدة
_ ماهو انا مش هقوله الا لما تقولي رايح فين وايه وضعك كدة بقالك فترة مش مظبوط في الشغل وبتغيب كتير...
_ مفيش يا عم... مسافر يومين كدة اغير جو ومش هتأخر
_ والله...يعني مش مسافر مع مدرسة الواد هيثم يااا..مستر ميمو
بصتله باستغراب....عرف منين دة
_ انت عرفت منين...الواد هيثم اللي قالك صح؟
_ ماهو لولا هيثم دة مكنتش عرفت انت بتختفي فين كدة وتسيب الشغل بالساعات بقالك فترة
بصتله شوية .... استوعب
_ يعني انت شايفني مقصر في الشغل؟
_ شهادة لله محصلش...بس انا برضه كنت بلاحظ غيابك اللي بقى متحدد بمواعيد... مواعيد العمال بقوا عارفينها كمان...حد وتلات وخميس تغيب فيهم الكام ساعة بتوع الصبح دول ولولا الواد هيثم وقع قدامي بالكلام...انا كنت شكيت انك اشتغلت في حته تانيه
_ حته تانيه ايه بس يا جدع...عيب عليك الكلام دة
_ يبقى تيجي سكه ودوغري كدة زي زمان وتحكيلي ايه الموضوع
…..…...…..….........
كنا في أوضته القديمة قبل ما يتجوز ... نفس قعدتنا زمان
_ ميمو ...انا مش هتحايل على اهلك كتير ...وربنا ما انت خارج من هنا الا لما افهم الحوار بيدور على ايه بالظبط
_ ما قولتلك يا ابني ...اخوك كان عنده مشكله في المدرسة وبمرواحي انا اتحلت ... وبعدين انا زي ما انت عارف بحب الرياضة ووالجو دة .. فلاقيتها فرصة أعمل حاجة جديدة
_ اه... تعمل حاجة جديدة لدرجة انك تكلم الواد دمغة وتخلية يضربلك ورق؟
بصتله وانا مش فاهم عرف كل دة منين
..لقيته ضحك
_ دمغة هو اللي قالي برضه...كان جاي ياخد منك فلوس وملقكش ... وكلمني على اساس اني عارف.. عشان هو عارف انا وانت ايه
_ هو فيه ايه....هي كل الناس فاجأة بقت بتفتن عليا كدة... لأ وييجو يقولولك انت
_ دة من حظك يا حبيبي.... على الاقل صاحبك وستر وغطى عليك....
بعدين قرب كدة في قعدته
_ ها ايه الحوار بقى...في مصلحة في المدرسة دي ولا ايه الدنيا ؟!
_ اه في مصلحة...بس بصراحة مصلحة حلوة قوي يا صاحبي..احلى مصلحة شفتها في حياتي....و رقيقه كدة عاملة زي البسكوته ولا صوتها وهي بتقول يا ميمو...اقسم بالله ببقى هاين عليا اا...
_ هي مين دي يا ابني.. المصلحة؟
_ لا...مُدرسة الواد هيثم
_ ايه!!...ميمو ...انت بتروح تعاكس في مدرسات الواد؟!!
_ يا عم اعاكس ايه بس...انا بحبها ..
لقيته ابتسم فاجأة كدة بعدين قرب اكتر في قعدته وهو بيكلمني...انا عارف يوسف كويس دة غير ما انه واخد مراته عن حب يعني أكيد هيفهمني
_ ميمو...انت بتحب عادي كدة زي باقي شباب خلق الله...طب دة انا كنت قربت ايأس من خلقتك يا أخي
_ ليه لأ يعني يا عم ...مش بني آدم وبحس
_ ايوا بس انا صاحبك وعارفك ... وعارف عقدك كويس
_ لا سلمى حاجة تانية...يمكن من يوم ما شفتها وانا شفت في عنيها اللي عمري ما شفته في عيون اي بنت قبل كدة...طاقة انبهار وإعجاب تحبب الواحد في نفسه يا أخي...لحد ما حبيتها هي
_ معنى كلامك دة ان هي كمان بتحبك
_ انا واثق.. ان هي كمان بتحبني... اغلط في اي حاجه الا عنيها
_ سبحان مغير الاحوال يا صاحبي ...شوف كلامك عن انك عمرك ما هتحب ولا تتجوز....وشوف كلامك دلوقت
سمعنا فاجأة خبط عالباب
التفت لقينا هيثم دخل
_ ماما بتقولكوا العشا جاهز
_ طيب يا هيثم اطلع قول لنورا مراتي تنزل وعرفها أن ميمو هنا
_ لا ياعم انا ماشي ... عشاان يبقى كله على راحته
_ يا ابني راحة ايه اللي بتتكلم عنها هو انت غريب ...انا بس بقوله يقولها انك هنا عشان ساعات بتنزل وهي على راحتها ومن غير حجاب يعني
_ لا ماهي نورا بره وعارفه وبتساعد ماما من بدري
خرج هيثم لقيتني ببتسم وانا بفتكرها
_ هي كمان يا اخي... محجبة بس اول مره في حياتي أعرف ان المحجبين بيبقوا حلوين كدة
لقيته خبطني في كتفي وابتسم بضحك
_ ايه يا عم ميمو...دة انت واقع خالص...طب وبعدين اخرة دة كله ايه مش فاهم
_ يعني ايه اخرته ايه؟!
_... يعني انا عارفك مش بتاع حريم ومشي شمال وبتقول انها محجبه يعني محترمه يبقى لازم يكون في نهاية لليله دي
بصتله بسرحان وسكت فاجأة افكر ... بعدين رفعت ايدي افتح سوستة الجاكت بتاعي حاسس اني اتخنقت فاجأة
وقومت فعلا وفتحت بلكونة الاوضه ووقفت فيها اشرب سيجاره وافكر.. بعدين سمعت صوت يوسف واقف جنبي بنبرة هاديه...انا عارف إنه حاسس بيا
_ أجي معاك انا وأبويا يا أخي ونخطبهالك بدام بتحبها كدة
اخدت نفس من السيجارة وخرجته وكأني بخرج معاه ضيقتي
_ بحسها بنت ناس جامد يا اخي ولما سألت عرفت تبقى بنت مين واتأكدت انه صعب
_ ياعم يعني هي بنت ناس واحنا ولاد كلب..الاه...ايه يعني نروح ونتقدم زي اي حد وطالما انت بتقول انها شرياك يبقى محلوله ان شاء الله
بصتله بحيرة
_ افرض...افرض سألوا وعرفوا حاجة عن القديم ...يبقى كدة كله انتهى قبل ما يبتدي
_ ياعم صلى عالنبي وتفائل خير دة احنا ما صدقنا انك أخيرا نويت وفي حد عرف يحل عقدك
ابتسمت تلقائي لما اتكلم عنها
_ تعالى ... تعالى بس يلا نتعشى... الواحد حاسس انه واقع من الجوع وربك هيحلها...تفائل خير
رميت السيجارة من البلكونة وخرجنا من الاوضة
…..…........................
_ تحبي اطلبلك حاجة تانيه؟
_ لأ ...كدة كويس
_ طيب بتبصي للأكل كدة ليه... اتفضلي كلي يلا
_ طيب انت مش هتاكل .... يعني بتبصلي ومش بتاكل
بدأت فعلا امسك الشوكة وانشغل بالاكل
_ لا انا هاكل اهو
لقيتها ابتسمت وبدأت هي كمان تاكل بمنتهى الهدوء والرقه ولا مش عارف دة كسوف منها برضه كالعادة
_ على فكرة ماما مكنتش مصدقاني لما قولتلها إنك هتعدي عليا النهاردة عشان تخرجني....كانت فكراني بهزر
_ المهم ان انتي تكوني مبسوطة وتكوني حاسة اننا ماشيين صح في علاقاتنا زي ما كنتي بتقولي
لقيتها رفعت راسها عن الأكل وابتسمت بخجل و..جمال
_ اه... مبسوطة..عش.. عشان....
سكتت
_ احم... عشان معاك
بصتلها كتير قوي ... بعدين ابتسمتلها ردا على كلامها ... فاجأة سمعت صوت تليفونها فتحته وبصت فيه وفاجأة ابتسمت ابتسامتها الجميلة دي
_ حد باعتلك حاجة
اتكلمت وهي بتكتب عالموبايل
_ ايوا...دي واحدة صاحبتي بتعلقلي على استوري كنت حطاها
كويس لقينا حاجة نرغي فيها ....رديت عليها وانا بقطع الاستيك وبدأت أكل
_ كنتي حاطه ايه بقى؟
_ كنت حاطة صورة ليا وانا في ...
سبت الشوكة من ايدي وركزت معاها
_ صورتك... وانا ازاي مشوفتهاش...ولا انتي عملاها لاصحابك البنات بس
_لا عملاها عادي ...بس انت اصلا مش بتفتح اي استوريز قبل كدة
مسكت تليفوني من على الطربيزة وفتحت أشوفها
لقيتها حاطه صورة ليها وهي بالحجاب ورافعة صوابعها السبابه والوسطى قدام عنيها بضحكة جميلة... ابتسمت تلقائي لما شفتها... بعدين مرت واحدة تانيه ودي بقى كانت بوضعية مرجعة راسها لورا وكأنها نايمة ...وشعرها القصير الجميل حوالين وشها في صورة ابيض واسود تسحر بلون شعرها المضاهي للون عنيها..
شعرها!!!
رفعت وشي ابصلها ...لقيتها بتبصلي بابتسامة خجولة لدرجة عمالة تشد بصوابعها اكمام البلوفر اللي كانت لبساه
_ مين بيشوف الاستوريز بتاعتك دي؟
_ يعني صحابي عادي
سحبت تليفونها وبفضول رفعت اشوف مين عندها بيشوف صورها بالشكل دة ...منه...جنى...جودي....مسيو غنيم!!
_ مين غنيم دة؟
_ دة مسيو كورس الفرنش بتاعي
_ وليه مش عملاله hide من الاستوريز بتاعتك
_ عادي يا قصي دة قد بابا ... بعدين مش دايما بيفتح الاستوريز بتاعتي ...انا أول مرة اعرف اصلا انه بيشوفها
_ يعني دة عادي....بنت محترمه تخلي واحد غريب يشوف صورها بالمنظر دة الا إذا كانت حابه كدة
بصيت حواليا حسيت صوتي عالي في أخر جملة لدرجة اللي حوالينا التفتوا بعدين بصتلها بنفس نرفزتي وعصبيتي ...
لقيتها بتبصلي وساكته وعنيها كلها دموع.... فضلت بصاالي بالشكل دة كتير قوي...عنيها جميله خصوصاً وهي لامعة كدة ... فاجأة لقيت دموع نازله على خدودها اللي فاجأة بقت لون الدم ...كل دة وعنيها في عنيا في صمت
أخيراً نزلت عينيها بعيد عن عيني بس مسكت شنطتها وتليفونها وهمست بصوت مخنوق
_ ممكن نقوم لو سمحت
اتنهدت على منظرها دة بعدين حاولت اتكلم بصوت هادي
_ احنا لحقنا نقعد
لقيتها قامت وقفت
_ معلش...مش عايزة اتأخر على ماما
بصتلها بحيرة على شكلها اللي اختلف في دقايق ..بعدين قومت وحطيت الحساب فعلا ومشينا
...….…...................
كنت سايق العربية وسامع تنهيد عياطها جنبي...مش معقول كدة حقيقي زعلها صعب قوي...
_ خلاص يا نسمة انا أسف.... كفاية بقى لو سمحتي
برضه عياط
_ لو سمحتي يا نسمة خلاص بقى.... محصلش حاجه لدة كله
ملقتش غير اني لازم اقف بالعربية والتفت ابصلها
لقيت تنهيدات عياط زي الطفلة بالظبط.... سبحان الله ازاي اختلفت كدة في لحظة من ابتسامة خجولة جميلة...لحمرار وشها دة كله والعياط دة ...لقيت نفسي وبشكل عفوي بقرب منها وامد ايدي امرر صوابعي على خدودها براحة امسحلها دموعها
رفعت عينها تبصلي .... واخيرا بطلت تنهيد وعياط
مسحت دموعها بايدي
_ أنا أسف ....مكنتش عارف ان كلامي هيضايقك كدة ...بس انا اتضايقت يا نسمة ان حد غيري يشوف صورك دي ....مش فاهم اصلا ازاي حاجة زي دي تعمليها
برضه سكته بس الحمد لله اخيرا هديت
_ دة قد بابا
_ حتى لو قد جدو...برضه محدش يشوف صورك دي غير صحابك البنات وبس دة لو يعني كان ضروري قوي تحطي استوريز فيها صور ليكي
_ صحابي البنات بس؟!...حتى انت كمان لا؟
بصتلها وانا ساكت
_ ممكن انا أشوفها
لقيتها بصتلي وبدأت تبتسم وكأنها عايزه تضحك
_ احم...بس أكيد مفيش داعي من صورك بدون حجاب
ابتسمت بشكل أكبر وهزت راسها براحه بمعنى حاضر...
كنت لسه هدور العربية سمعت همس خجول جدا وكانه جاي من بعيد
_ قصي
التفت ابصلها ...لقيتها نزلت راسها وركزت عنيها على صوابعها كالعادة
_ كان ..كان..شكلي حل..حلو في الاستوري؟
لما لقتني ببصلها ومردتش ...
_ يعني اصل كل صحابي اللي شافوها عملو ريبلاي عليها وقالولي تعليقهم بس انت... لأ
رديت عليها وانا باصص عليها وعلى خجلها...اللي بيخليها غريبة...جدا
_...كنتي حلوة... جدا
رفعت عينها ليا تبصلي بوسعها... وبعدين ابتسمت وفاجأة خدودها رجعت لنفس حمارها لما كانت بتعيط بس على اجمل
_ طيب مم..ممكن اطلب طلب ...
_ اطلبي طلب..
_ بما اننا قريبين من الكورنيش..ينفع ننزل نتمشى شويه قبل ما نراوح...
...……..................
_ خير يا فريد ...ادينا نزلنا من عالموتوسيكل نتمشى .... ياريت نخلص بقى عشان اتأخرت وعايزة اراوح
لقيته وقف تمشيه ووقف يبصلي
_ واحدة في جمالك دة يا زوزو وحلاوتك هتفضل دافنه نفسها في المحل دة كدة ....طب دة حتى يبقى حرام عليا وعليكي
_ مش فاهمه قصدك يا فريد ....ما تنجز وتجيب من الأخر....هو كمال مش عايزني في المحل وموصيك توصلهالي ولا ايه
_ كمال!!...دة كمال لو عليه يمضيكي عقد احتكار بعمر المحل...لكن انا اللي صعبان عليا رقاصة زيك وفي حلاوتك واختلافك عن الموجود تفضل هنا في المكان المدفون دة
_ الخلاصه
_ الخلاصه ان في مكان تاني عايزك يا زوزو...وبتلات أضعاف اللي بيدهولك كمال كمان ...قولتي ايه
_ مينفعش... عشاان اللي كمال بيوافق عليه .. صعب غيرة يوافقني فيه .... وبعدين يا اخي مين قالك اني عايزة اغير المكان ...انا مرتاحه هناك
_ يا بنتي افهمي ....بقولك تلات أضعاف
_ انت عارف ان تلاته ولا اربعه مش فارق معايا ... انا اللي يفرق معايا ابقى بمزاجي واشتغل بشروطي
_ ماهي نفس الشروط وكل اللي انتي عايزاه... يعني هتفرق بس في قعادك مع كبارات المكان واه مش اي حد ...دول الكبارات وبس
وقفت تمشيه جنبه... وبصتله بعدين غصب عني انفجرت ضحك...ماهو انا أضحك احسن ما امد ايدي برضه
...…................
التفت على صوت ضحك منفر اتخلل الصمت اللي بيني وبينها واحنا ماشيين ....ببص لقيت واحدة طويله وشعرها طويل بشكل ملفت لبعد ضهرها وماشيه مع واحد جنبها وبتضحك لدرجة لفتت الأنظار ليها
سحبت نظري علطول وبصيت للي قاعدة جنبي تبص للمكان وللنيل بابتسامة ....يمكن دي اول مرة من يوم ما عرفت نسمة أشوفها بالقرب دة ونقعد مع بعض المدة دي
_ المكان هنا جميل قوي....بتيجي هنا كتير
_ أول مرة اقعد هنا عالكورنيش
التفت تبصلي باندهاش
_ ازاي!!! ازاي مجتش هنا ...تخرج مع صحابك تشم هوا ...دة هوا النيل بيشفي
_ بس انا معنديش صحاب كتير هنا في القاهرة
بصتلي شويه
_ ليه يا قصي
_ مش عارف انتي عارفه ولا لأ يا نسمة...بس انا من وانا صغير وانا بتنقل كتير يعني كنت كل اما اعمل جيران وصحاب ...نعزل انا وأمي واروح لناس وجيران جديده
ابتسمت وهمست
_ مش مهم...انا وانت ممكن نبقى صحاب على فكرة
بصتلها باندهاش ...انا فعلا مكنتش اعرفها خالص
بعدين فاجأة التفتت على أصوات عاليه جنبنا
_ هو في خناقه...ولا انا بيتهيئلي
_ متبصيش عليهم ..دول تلوث سمعي وبصري ...
_ بس دة شاب بيتخانق مع بنت...تفتكر خطيبها؟!
_ مش عارف.... بس اللي يرضى على نفسه يبقى مع واحدة زي دي يستاهل اللي يجراله
ميلت تبص عليهم تاني
_ ليه...مالها يا قصي
_ انتي مش شايفة شكلها ولا صوتها وضحكتها اللي جايبه أخر الطريق
لقيتها بصت عليهم بصه اخيرة وبعدين عملت بوشها بمعنى ملناش دعوة
_ قسما بالله يا فريد لو ما مشيت من قدامي دلوقتي لأكون مفرجة عليك الكورنيش كله
_ وطي صوتك يا بنت المجنونة ....هتفرجي علينا الناس
بصيت حواليا بتوتر ...هو انا فعلا صوتي عالي دة كان مجرد تهديد
_ فريد...انت لو اتكلمت معايا بالشكل دة تاني والله لأكون فتحالك دماغك المتكلفة غباوة دي
_ هو انا قولت ايه لدة كله ...كل دة عشاان عايزك تشوفي شغلك وتوسعي رزقنا عن كدة
كله كوم وتوسعي رزقنا دي كوم تاني وزي ما يكون نسيت انا فين وحواليا ايه ومسكت فيه من غيظي والله ما هسيبك الا لما افتح دماغك دي أشوف فيها ايه
_ هي حصلت ...اوسع رزقكوا ...
وخلعت جزمتي ونزلت بيها على دماغه
_ تعالى هنا بقى عشان انا سكتلك كتير ....بقى عايز توسع رزقك بيا يا فريد
_ يا بنت المجنونة هتفرجي علينا الناس
_ والله ما هسيبك الا لما أشوف دمك لونه ايه
وفاجأة لقيت ناس كتير ملمومة حوالينا ... التفت للناس بتوتر بس والله حتى التوتر ماهيحوشني عنه
_ بقى كده ياااا زينب بتفتحيلي دماغي ... والله ما أنا سيبك
كنت لسه بحاول اتلافى ايدة اللي عايز يضربني بيها والله دة بعدك ....بس فاجأة لقيت واحد من اللي كانوا واقفين وقف بينه وبيني
_ عيب يا محترم تمد ايدك على بنت في الشارع
_ وسع يا جدع انت من وشي ...يعني انت مش شايف عملت في وشي ايه....انا دماغي اتفتحت .... والله لابلغ عنك واوديكي في داهيه
_ طب اعملها كدة يا فريد والله لأكون ...
_ خلاص يا أنسه عيب كدة
كنت اتمشيت انا ونسمه رايحين اتجاه العربية...بس فعلا لمحت الشاب السايح في دمه دة بيحاول يضربها ....
_ وسع يا جدع انت وهو والله ما هسيبه عشان بعد كدة يعرف يتكلم معايا ازاي
حقيقي شكلها مستفز ...غصب عني وقفت واتكلمت بعصبية من اني أشوف بنت بالمنظر دة
= ما خلاااص يا بنت انتي بقى... عيب عماااايلك دي
لقيت نسمه بتشدني من دراعي تلومني على تدخلي
_ ملناش دعوة يا قصي
_ وانت مالك انت كمان
= ما انتي لو بنت فعلا محترمه مش هتقفي تفرجي الناس عليكي وعلى خطيبك في الشارع كدة
_ يا قصي ملناش دعوة ويلا نمشي
لقيت ناس كتير من اللي واقفين ادخلوا يحاولوا يبعدوهم عن بعض
حسيت بنسمة بتشدني تحاول تبعدني نمشي...بصيت بصه أخيرة على البنت دي وفي لحظة جت عيني في عنيها .... لقيتها بصتلي بقرف ومشيت
معقوله هي كمان اللي قرفانه....
.................................
وقفت بالموتوسيكل قدام البيت ...وحشوني جدا بقالي اكتر من اسبوعين مشوفتوهمش
رنيت جرس الباب...محدش فتح ...طلعت المفاتيح من جيبي افتح ...لقيت هند في وشي فتحت الباب
_ ميمووو... ايه الصباح الحلو دة
_ صباح الفل يا هند
بعدين بصيت حواليا
_ اومال البت زوزو فين؟
_ نايمة في أوضتها يا حبيبي
رديت عليها وانا داخل أوضتها
_ لسه نايمة لحد دلوقتي
سمعت صوتها وهي داخلة المطبخ
_ ما انت عارف اختك بتنام براحتها...يلا صحيها على ما أحضر لقمة خلينا نفطر سوا
دخلت لقتها نايمه ورايحه في سابع نومه قربت اقعد جنبها
وبدأت اصحيها
_ زوزو....زينب .. اصحي
_ هممم ..سبيني يا خالتي اصحى براحتى
_ وحياة خالتك!! قومي بدل ما ادلق عليكي ميا
أخيرا فتحت عنيها بالعافية
_ ميمو... انت جيت امتى؟!
سحبت المخدة من تحت دماغها احطها على رجلي اسند عليها
_ لسه يا دوب جاي...اصحي ..في حد ينام لحد دلوقت
اتعدل وقعدت وبدأت تفكك شعرها الطويل
_ هي الساعة كام دلوقتي
بعدين بصت في المنبه جنبها
_ يا ميمو حرام عليك الساعه 7 الصبح سيبني انام
قالت كدة وهي بتشد الغطا عليها
_ بقولك قومي ...عايزك في حاجة مهمه
بعدين فاجأة سمعت صوت خبط في الشباك وكأن حد زقل حاجة..
_ ايه الصوت دة....مين بيزقل طوب في الشباك؟!
لقيتها قامت اتنفدت وبصتلي بخضه على وشها
#ميمو
توقعاتكوااا للبارت الجااي يا ترى ايه هيحصل وزوزو هتتقفش اخيرا ولا هتعمل ايه؟!
وميمو هيسافر المسابقة مع مين؟
وايه حكايه قصي ؟!
توقعاتكوا وتفاااعل كويس عالبارت بقااا♥️♥️
لو لقيت تفااعل عالبارت كويس كدة هنزل البارت الجاي بكرة علطول باذن الله
قراءة ممتعة ❤️🥰
#رانيا_أبو_خديجة
#ميمو
لقراءة الفصل الرابع عشر من رواية ميمو 👇
👈 الفصل الرابع عشر 👉
للانضمام لجروب الفيسبوك 👇
👈 الانضمام 👉
او👈👈 لصفحتنا 👉👉
إرسال تعليق