رواية ميمو الفصل العاشر بقلم رانيا أبو خديجة
رواية ميمو بقلم رانيا ابو خديجه
رواية ميمو
الفصل العاشر
#ميمو
#رانيا_أبو_خديجة
كنت قاعده في أوضة المدرسات بعد ما خرجت من الفصل ودخل الكابتن شريف دة ينزل الولاد التمرين ...
مبرتحش انا للبني ادم دة نهائي .... تلزيقة وطريقته بتضايقني .... كمان وجوده بيفكرني بأخر مرة شفت... شفته فيها...
المرة اللي مش قادرة اتخطى التفكير فيها...ملامحة ونظرتة الغضبانة بتطاردني طول الوقت.... لو اعرف بس فيه ايه ...او انا عملت ايه....اوف... عارفه عارفه انه مش فارق معايا والمفروض ميهمنيش كل دة...بس على الاقل...افهم... ارتاح....الاقي سبب..
مسكت قلمي وكشكول تحضيري ...ابدء شغل ... لازم بقى نركز شوية بقالك كام يوم شغلك مش عاجبني....
_ يلا ..بسم الله نبدء تحضير لفصل تالته رابع ...
يا ترى ما بيجيش ليه ...بقالة كام يوم مشوفتوش ...
من اخر مرة شفته قدام المدرسة وكان باين عليه مش طايقني
حاسة اني عايزة أشوفه .... طريقته...طولة الغريب وانا برفع عيني وابصله كدة...تقلة في كل حركة بيعملها... ابتسامتة اللي في عز هدوئها يبان تقلها برضة...حتى ضحكتة اللي مش بسمعها الا لما أكون بحكيلة عن هيثم وعمايله....ببقى بستناه يضحك بس عشان أشوفها...
كنت بلعب بالقلم بين صوابعي وسرحانة ...لقيت فاجأة هيثم داخل عليا وبص بره وبعدين قفل الباب ودخل...بصيت باستغراب لطريقتة وهو بيتسحب كدة وهو داخل
_ في ايه يا هيثم ...مالك يا حبيبي وسايب التمرين بتاعك ليه...مش قولنا نلتزم بقى ؟
لقيتة قرب عليا واتكلم بصوت هادي وهو بيطلع حاجة من تحت تيشيرت اليونيفورم بتاعه
_ مس سلمى.... شوفي دة كدة
_ تليفون مين دة يا هيثم ....انت ازاي معاك تليفون زي دة ...انا لازم انبه اهلك بخطورة ان يبقى معاك في السن دة ...غير انه ممنوع هنا في المدرسة؟
_ دة مش تليفوني يا مس
_ اومال تليفون مين ؟
كنت بسأله فعلا وانا متنرفزة .....
_ تليفون ميمو..
هو قال ايه ....لقيتني بقرب منه وبسأله بأهتمام
_ ميمو!! ....هو فين ميمو....مشوفتوش وهو جايبك الصبح
_ لأ هو مش جابني المدرسة ...هو اداني تليفونة الصبح قبل ما اركب الباص وعلمني ازاي افتحة واصور دة
خلص كلامه واداني التليفون مفتوح على فيديو ...
ايه دة....دة شريف ....ايه ده..ايه ده!!!!
_ ايه دة يا هيثم ؟!!!!...جبت الفيديو دة منين ؟!!!
_ انا لسة مصوره دلوقتي....في التمرين..انا علطول بشوفة بيعمل كدة يا مس بس ميمو قالي اصوره.
_ و..و..وصورته ازاي...شافك وانت بتصورة؟!!
_ لأ يا مس...ميمو فضل امبارح معايا في أوضتي يعلمني ازاي اعرف اخبي التليفون واصورة من غير ما يشوفني
رفعت راسي ليه وسألته بهدوء
_ ميمو؟!
_ اه ...هو ادهولي النهاردة الصبح وقالي أصوره واجيلك وانتي هتتصرفي
كنت بسمعه وانا متنحة في الفيديو مش مستوعبة اللي بسمعه وشايفاه دة .... قفلت التليفون بغضب وعصبية من البني ادم المقرف دة ...اللي بيستغل طفوله عارف انها مش مدركه بيعمل ايه...حيوان
_ طيب يا هيثم....ارجع انت مع زمايلك وسيب التليفون دة معايا وانا هتصرف
…..…..…..….............
بقاله ساعة تقريباً بيرغي في كلام وتعليمات وحاجة تفقع المراره....طب صدق بالله كلمة كمان وهقوملك
_ والكلام دة انا مش عايز اعيده تاني يا زوزو ...مفهوم
لأ كدة كتير قوي ...قومت وقفتله بقى ده
_ اسمع يا مستر كمال انا لو كنت رجعت فده بس عشان زن فريد عليا ....ولا ايه يا فريد... وانت كمان مكالماتك اللي قرفتني وفي الاخر مقعدني قدامك تملي شروطك
_ جرا ايه يا فريد... انت مش فهمتها النظام الجديد ولا ايه
= فهمتها يا ريس فهمتها...
لقيت فريد مقرب يوشوشني
= انا هفهمك كل حاجة....تعالي بس انزلي يلا وانا هبقى افهمك
_ النظام الجديد يا زوزو ان هيبقى زيك زي باقي الشغالين هنا...تلبسي زيهم وتقعدي مع الزباين بعد فقرتك...مش تخلصي وتجري زي ما بتعملي.
_ لا والله!! مش عايزني ابقى اراوح معاهم بالمرة!
_ زوزو!!!!!
_ يا شيخ بلا زوزو بلا قرف بقى....انت فاكر ايه .... انا لو هرجع هنا فهرجع بشروطي انا.... وموضوع اللبس دة قولت ميت مرة انا مبعرفش أشوف نفسي في الزفت اللبس اللي انت جايبه ده... وموضوع قعادي هنا بعد ما بخلص فقرتي فدي بقى حاجة تخليني اسيبهالك مخضرة وملتفتش ورايا تاني... بالاذن
قولت كلامي بصوت حسيت انه وصل للصاله تحت وخرجت وسيبتلهم المكتب
= ليه كدة يا ريس مانت عارف زوزو عنيدة ...ومبتجيش كدة
_ فريد....اتصرف انا عايزها تنزل الصاله النهاردة بأي شكل....معنديش استعداد المحل يخسرها ....انت شوفت الناس كانت بتسأل عليها الأيام اللي فاتت ازاي
= ماشي يا كمال بيه...بس معلش خليها تعمل اللي هي عايزاه دلوقتي....واللي انت عايزة دة كله هيحصل بعدين اوعدك....بس بالهداوة
..............................
كنت واقف في الورشة مع العمال بشرف عالشغل .... خصوصاً في غياب يوسف .....انا متربي هنا من صغري بعتبر الشغل هنا بيتي التاني ...يمكن بقعد هنا اكتر ما بقعد في شقتي..
_ حلو يا مصطفى اتكل عالله وكمل ...بس خلي بالك لو فتحت في الطلبيات دي لازم نعرف نسد ...شد عالرجالة ولو في حاجة انا موجود
_ متخافش يا ريس ... انا هتولى الدور دة بنفسي ...واذا كان عالرجالة كلهم قلبهم عالشغل زيي تمام
_ حلو ...اتكل يلا عالله
كنت واقف بتكلم مع العمال ...لقيت الحاج داخل عالورشة
_ ميمو..
التفت ليه ... بعدين روحتله في مدخل الورشة
_ ايوا يا حج....صباح الفل عليك
_ صباح الخير.... فين فريد؟
_ فريد طلع على دمياط من الفجر ... هيشوف الدنيا عاملة ايه هناك ولو المحلات هناك محتاجة حاجة هيبعتلنا وانا ابقى ابعتله اللي هو عايزة
= ميمووو...ميموووو!!
التفت ..لقيت هيثم داخل جري عالورشة ...وبيعدي من وسط العمال والمكن وعينه عليا بابتسامة حماس في عنيه...
لقيت الحج سبقني وبصله وعلى صوته
_ انت يا زفت انت ايه اللي جابك هنا....وكمان داخل الورشة بلبس المدرسة ...اطلع يلا على فوق ...ذاكر يكش تفلح
لقيت هيثم بصلي بدموع واتكلم بغصة زعل وتكشير
= انا كنت جاي أشوف ميمو..واسلم عليه
_ ليه هو ميمو كان مهاجر....اطلع على فوق يلا...وبلاش دلع مرق!!!
قربت أخدت هيثم من ايدة اوقفه جنبي من الخوف اللي بان على وشه من ابوه
_ خلاص خلاص يا حج....انا هطلعة فوق وارجعلك
_ تطلعه فوق ايه يا ميمو..احنا فاضيين ..سيبه وتعالى ورايا عايزك في شغل
_ معلش يا حج...اطلع انت مكتبك ...وانا خمس دقايق وهطلعلك
وفعلا سيبته واخدت هيثم أطلعه شقتهم وطبعاً اسأله عمل ايه
وأول ما دخلنا اوضته لقيته قفل الباب وقرب بابتسامة يحكيلي اللي عمله وشكله فخور بنفسة وفرحان انه عرف يعمل كدة
_ وبعدين ايه اللي حصل ؟
_ المديرة قالت هترفدة ...بس مس سلمى زعقت وقالت لازم نبلغ ...قصدها تقول للبوليس يعني ...قالت لازم مشيتغلش تاني في اي مكان...والمديرة خدت التليفون وخدت منه الفيديو وودوه القسم.
_ متأكد انهم بلغوا عنه؟
_ انا كنت واقف مع مس سلمى في مكتب المديره عشان تسألني صورته ازاي ...وسمعتها في الأخر بتكلم ظابط تعرفه في التليفون وقالتله ...وبعدين نزلت تحت احضر التمرين زي ما المديرة قالتلي وفضلت هي واقفه مع مس سلمى في مكتبها ...بعدها بشوية كتير لقينا اتنين ظابط داخلين ومن الناحيه التانيه المديرة ومس سلمى وكانت معاهم مس غدير جايين ناحيتنا اول ما شافوا الظباط داخلين
_ وبعدين ؟!
_ وبعدين الظابط اتكلم شوية مع المديرة وقربوا اخدوا مستر شريف بس هو كان عمال يزعق ومعترض ...قاموا الظباط ضربوا قدامنا يا ميمو ...وخدوا ومشيوا...
قربت منه وسألته بهدوء واهتمام
_ طب وسلمى؟!
_ مس سلمى قالتلي انه هيتحبس ومش هيشتغل مع اطفال تاني ابدا...ولا مع حد خالص....وادتني تليفونك وقالتلي اديهولك وقالتلي كمان اقولك شكرا
شكراً !!!!.... والله!!!!
_ قالتلك حاجة...تانيه؟
_ هي كانت متنرفزة ومتعصبه من اللي شافته في الفيديو وكانت طول الوقت بتزعق.
اتنهدت وهو بيكلمني عنها ...حاسس اني عايز أشوفها دلوقتي
_ ميمو....انا عايزهم يجيبوا مدرسة مس ...مش مستر ...بس مس غدير قالت لازم كابتن راجل ...مينفعش بنت ليه يا ميمو...افرض اللي جاي هو كمان مكنش مؤدب كدة؟
على رأيك يا هيثم...افرض مكنش مؤدب وبرضه بيحب يتلزق في المدرسات زي دة... هنعمل ايه ساعتها انا وانت؟
فضلت فعلا افكر..... معقولة ييجي حد تاني يحاول يقرب منها تاني...ومش بعيد ينجح انه يلفت نظرها...ماهم مدرسين بقى زي بعض
……...….............................
أخيرا نزلت الصالة تاني...مملكتي اللي بحس فيها اني بعمل الحاجة اللي بحبها .... رغم خوفي طول الوقت واحساسي اني بسرق وكدبي على خالتي وميمو....
المغني اللي جنبي كان بيغني اغنية شعبية قديمة قوي ..وقتها ميلت بوسطي وافتكرت نفس الحركة دي لما كنت لسة بتعلمها على نفس الأغنية وانا يدوب عندي تسع سنين
_ بصي يا ماما بصي ...بعرف اعمل الحركة دي
كانت وقتها بتروق هدومي الصغيرة وهدوم ميمو في الدولاب لقيتها سابت اللي في ايديها وراحت علت شريط الكاسيت على نفس الأغنية
_ شوفي أمك بقى واعملي زيها ...شوفي
ولقيتها ميلت بنفس حركتي بس طبعا فرق كبير بيني انا زوزو التسع سنين وبينها ....
فاكرة يومها علمتني حركات كتير بشكل ضحك وهزار وانها توريني بتعرف ترقص ازاي ...فاكرة حركاتها وجمالها وقتها اللي ربنا اراد أخد منه كتير ....ربط على وسطي طرحة زيها من الهدوم الكتير اللي عالسرير كانت بتطبق وترتب فيها وفضلت أعمل في كل حركة تعملها ... تميل لقدام احاول اميل زيها.... ترفع ايديها لفوق وتنزلها براحة بطريقة استعراضية الاقي نفسي عيني على ايديها وايدي زي ما تكون مرايا لايديها.... من اليوم دة وانا بعشق حاجة اسمها رقص واستعراض.... بحب كل حاجة كل حركة....
فتحت عيوني على صوت التصقيف اللي فزعني لما الرقصة انتهت اخر حركاتها بشكل تلقائي مع نهاية الاغنية...الاغنية اللي رجعتني كتيييير...كتييير قوي لورا
..….….....……..…..…...
وحشتني جدا ....عايز أشوفها بأي طريقة.... روحت قدام المدرسة وقت خروجهم .... وكنت هقرب فعلاً ...بس لقيتها واقفة قدام المدرسة وعماله تلتفت تبص في نفس الاتجاه اللي دايما باجي منه.... ابتسمت على شكلها ....قد اية وحشتني ووحشني أقف معاها واتكلم عن هيثم اي حجه وتلكيكه للكلام وخلاص ....
لقيتها اتنهدت في وقفتها بإحباط ونزلت راسها بزعل والتفتت لطريقها....كنت هضغط عالموتوسيكل واتحرك من الناحية الجانبية اللي واقف فيها واتقدم واروحلها....بس بين لحظة والتانيه لقيت صاحبتها غدير دي خارجة من المدرسة وبتقرب منها
معقوله كدة خلاص....بقاله أكتر من اسبوعين مجاش ولا شفته قدام المدرسة.... طبعاً واحد زيه أكيد ميفرقلوش حاجة لا يسأل على هيثم ولا غيره....ايوا بس انا فاكرة كنت بشوف في عنيه اعجاب وكتير كنت بحس انه بيتحجج بهيثم عشان....
عشان ايه... عشان يشوفك...اهي طلعت اوهام وحضرتك صدقتيها ...اتنهدت بزهق من الوقفه بتاعة كل يوم دي والتفت عشان امشي....لقيت غدير خارجه من المدرسة وجايه ناحيتي
_ ايه يا سلمى مش هتمشي؟!
_ اه اه...كنت ماشيه اهو..
_ طيب يلا نراوح سوا.
_ يلا يا غدير يلا....انا أصلا مصدعة وعايزة اراوح في اسرع وقت
اتنهدت وانا بلف بالموتوسيكل وبرجع ... وانا جوايا مرتاح بنظرتها دي....بس خلاص كلها كام يوم واللي بخطتله بقاله ايام يتحقق واطمن اكتر...
…….....….….............
كنت خارجة من الفصل ورايحة على اوضة المديرة اللي طلبتني بالاسم ... معرفش عايزاني في ايه...اللهم اجعله خير
_ على فين يا سلمى.... كنت عايزاكي تدخلي تالته تالت بدالي الحصه دي
_ رايحه مكتب المديرة بتقول انها عايزاني معرفش ليه؟
_ اه ...سمعت ان في كابتن جديد جه ومحتاجة طبعاً حد يعرفه عالمدرسة ويلففوا الفصول
_ يعني هي ملاقتش غيري ... هو انا فاضيه للكلام ده ولا فايقه
_ ما انتي عارفه وفاء مجتش النهاردة...وانا وهي عارفه اني تعبانة وجيت بالعافية والجدول مشغول بباقي المدرسات وهي عارفه انك الوحيدة اللي خلصتي حصصك ...وانا كمان كنت فاكره كدة وكنت عايزكي تدخلي مكاني يا سلمى
_ طيب ادخلي اكتبلهم كام سؤال يحلوهم وانا دقايق وهجيلك ادخل مكانك
..........…..….......
دخلت مكتب المديرة وانا عارفه اكيد جايبلنا عاها جديدة...ماهي اكيد مش هتجيب حد كويس ... والله ما مصبرني عالمدرسة دي غير الولاد ...غير كدة ما كنت قعدت فيها دقيقة واحدة
خبطت عالباب المفتوح ودخلت
_ صباح الخير
_ صباح الخير يا سلمى ...تعالي ادخلي
دخلت فعلا وانا بعدل النضارة اللي على عيني بملل وزهق
_ خدي الاستاذ عرفيه عالمدرسة واشرحيلة هيعمل ايه بالظبط ونظام الجدول بتاعنا ...اتفضل معاها يا استاذ
كنت واقفه بسمعها وشايفة حد قاعد عالكرسي اللي قدامها بس مش عارفه مين ضهر الكرسي الكبير مدريه ...واول ما قام والتفت ...!!
= صباح الخير
_ مين... لأ...!!!
#رانيا_أبو_خديجة
اه يا ترا مين الكابتن الجديد...هو هو اللي في بالي وبالكواا🙈😂😂 بس يا ترى عملها ازاي دي؟!
وايه الاحداث القمر الجديدة اللي مستنيانا اوعدكوا باذن الله هتبقى احداث قمرين يعني♥️♥️🙈 قراءة ممتعة ♥️🥰
للانضمام لصفحتنا على الفيس بوك 👇👇
♥️♥️ الانضمام ♥️♥️
او لصفحتها 👇👇👇
🔥🔥 الانضمام 🔥🔥
لقراءة الفصل الحادي عشر من رواية ميمو 👇
🌹🌹 الفصل الحادي عشر 🌹🌹
#ميمو
#رانيا_أبو_خديجة
إرسال تعليق