رواية ميمو الفصل الثامن بقلم رانيا أبو خديجة
روايه ميمو بقلم رانيا ابو خديجه
رواية ميمو
#ميمو
#رانيا_أبو_خديجة
مين...انت!
_ تليفونك مقفول من امبارح ليه....عايز اتطمن عليكي مش عارف
_ انا كويسة قدامك اهو....بس امشي دلوقتي لحد يشوفك وانت واقف كدة...يلا بسرعة
_ متخافيش انا سايب الموتوسيكل بتاعي على اول الشارع واتأكدت ان شارعكوا دة مفيش حد بيمشي فية بالليل كدة
بعدين لقيتة بيبصلي قوي من شعري لباقي وشي
_ بتبصلي كدة لية يا فريد!!!! اتكل على الله يلا
لقيتة ابتسم وهو بيتكلم وبيدخل ايدة من فتحات الشباك
_ أول مرة أشوفك وانتي كدة ....شكلك زي القمر بعيد عن المكياج وجو المحل اللي هناك
بعدين لقيتة بيمد ايدة يلمس خصلة من شعري
_ ابعد ايدك يا فريد انت هتستهبل....ويلا امشي أخويا ميمو زمانة جاي .....
_ طيب همشي بس تفتحي تليفونك....
_ ماشي ماشي امشي بقى يلا...
لقيته التفت يمشي بعدين لف بوشه تاني
_ بقولك يا زوزو....هو انتي علطول بتبقى بيضه قوي كدة لما بتبقي واخدة دش ومبلولة؟
_ فريد!!!!!!
_ خلاص خلاص همشي ....بس هكلمك ابقى ردي عليا
_صحيح يا فريد استنى....متعرفش ...عملوا ايه امبارح في القسم؟!
رد وهو عينه على شعري المبلول
_ ولا حاجة...كلهم خرجوا والراجل صاحب المحل دة دفع كفالة كبيرة شوية والدنيا خلصت
_ انتي بقى أخوكي عمل معاكي امبارح ايه؟
شاورت على خدودي المحمرة شويه
_ يعني منتاش شايف ؟
لقيتة ابتسم وهو بيبص في وشي
_ انا افتكرت الحمار دة طبيعي مع البياض دة كله
_ امشي يا فريد....امشي يلا اتكل على الله!!!!
_ طيب برااحة ... خلاص همشي بس اعملي حسابك شغلك معانا هيرجع من بكرة ...متفقين
_ لأ مش متفقين ... عشان انا باللي حصل امبارح دة مش هشتغل تاني ...وابقى بلغ جمال بالكلام ده
_ اية الكلام دة يا زوزو.....يعني ايه مش هتشتغلي تاني ....هو لعب عيال
_ هو دة اخر كلام عندي ...انا حاسة ان اللي حصل امبارح دة اشارة من ربنا والحمد لله عدت المرادي وربنا سترها معايا....مبقاش انا غبية بقى وارجع تاني
_ زوزو...كلامك دة مش هيعجب جمال...دة ممكن يجيلك لحد هنا...اعقلي
_ طب يبقى يعملها ويوريني..
...........................
_ الو ....
ايوا يا هند ....عاملين اية؟
_ الحمد لله يا نور عيني...فينك دلوقتي
_ انا جاي في السكة اهو ....زينب عاملة ايه دلوقتي ؟
_ نايمة طول النهار وصاحيه وشها وعنيها وارمين من العياط بتاع امبارح....بس متخافش اهي قامت وخدت دش وهتبقى زي الفل ان شاء الله
اتنهدت وانا بسمعها ..من زمان يمكن من وقت ما بقيت مسؤول عن زينب من بعد ابويا وأمي وأنا لما بمد ايدي عليها بحس بعدها وكأني جيت على حتة مني.... المفروض هي دلوقتي كمان ملهاش غيري كتير بلوم نفسي على بعدي دة واوقات تانية بحس ان المفروض عليا اكون احن حد عليها في الدنيا...بس هي طايشه وطول الوقت اخطائها كتير من ايام الدراسة اللي غلبتني فيها بالعافية وغلبتني على ما خلصت الجامعة....
_ طيب يا هند انا عموما جاي دلوقتي مش عايزة حاجة اجبهالكوا معايا وانا جاي؟
_ سلامتك يا حبيبي...هنا كل حاجه...نزلت النهاردة بقى جبتلك من السوق شوية فاكهة انما اية هيطروا على قلبك تعب اليوم
ابتسمت بحب في هند دي .... انا فعلا محتاج لعشوة وقاعدة زي دي وسطهم ...في أشد الحاجة لده
_ عاملة ايه عالأكل يا هند...انا ميت من الجوع ومكلتش من امبارح
سمعت صوت وكأنها بتغطي حلة ....عرفت انها لسة واقفة في المطبخ
_ الحلو كله يا ضنايا....انت بس يلا تعالى احسن الاكل هيبرد
_ مسافة السكة وهكون عندكوا.
قولتلها كدة وانا فعلا ريقي جري على اكل هند بالذات اللي بيوحشني فعلا
قفلت معاها وسرعت في سير المكنة ...فعلا جعان وتعبان جدا ...
قابلني صيدلية علي جنب الطريق نزلت ودخلت وفي دقايق كنت خرجت ولسة بعدل الموتوسيكل وبركب
لقيت تليفوني بيرن طلعته من جيبي وركبت المكنة ..
ببص فية لقيت اسمها عالشاشة....بصيت للرقم كويس اتأكد بعدين بصيت قدامي .....يا ترى بتكلمني ليه دلوقتي...وقبل ما استنى ثانية تانية فتحت الخط ...واستنيت اسمع صوتها
سمعت صمت شويه بعدين...
_ ألو....ميمو معايا؟!
ابتسمت اول ما سمعت صوتها بتقول اسمي
_ انا ميمو..... مين معايا؟
_ انا..انا سلمى ...مدرسة هيثم ...اللي اخدت رقمك امبارح الصبح
حطيت ايدي على وشي ...دي بتفكرني بيها!!!
_ ايوا خير يا مس ...في حاجة ولا اية؟
وسألت ورغم الابتسامه اللي بتكلم بيها وحاسس بيها في صوتي لكن فعلا عندي فضول أعرف سبب اتصالها ..
سكتت شوية حسيتها بتجمع كلامها .. لأ طولت في سكوتها فعلا...خوفت متلاقيش حاجة تقولها فتقطع الخط
_ هيثم عامل معاكي اية دلوقتي ؟
_ اه ..انا متصلة بيك عشان كدة.... عايزه أقولك ان الولد دة لو انا عملتله استدعاء تاني لحد ما يوصل للفصل من المدرسة محدش يزعل مني بقى.
سكت استوعب كلامها والنرفزة اللي في صوتها ...غصب عني ضحكت على نرفزتها من هيثم ....هيثم منرفزها!!
_ ممكن افهم انت بتضحك على اية....
لقيتها بتسأل بنفس النرفزه
_ طيب اهدي بس كدة....وفهميني هو عمل اية تاني ضايقك كدة
لقيتها بتتنهد بزهق ونفاذ صبر
_ تخيل بسأل سؤال مهم جدا والمفروض انه سؤال امتحانات كمان.... ايه اللي لو ضفنا لية مثله اوحذفنا منة نصه لا يتغير .... طبعا كان قصدي عدد ...كل الولاد تقريبا عاملين الاجابة صح ومنهم اللي مشيوا في خطوات الحل صح رغم انهم مجبوش الناتج...هو بقى.. تخيل كاتب ايه..
_ كاتب ايه؟
سألت وانا مستني كارثة ...هيثم وانا عارفه
_ الشخص الجدع مهما ربنا رزقه ولا اداه مش ممكن تلاقيه اتغير عليكي ابدا... اذا فالمتغير هو ثابت...وانا قصدي في السؤال عدد مش فلسفة من الفيلسوف هيثم
سمعته بيضحك تاني ....منكرش انه صوته في التليفون مخليني عايزة أشوفه خصوصا وهو بيضحك كدة ... بعدين سمعت صوته بيتكلم بتقطع كدة مكان صوت ضحكه
_ بصي هو للأسف انا النهاردة مكنتش فاضي ابدا....كان عندي سفر ويوم طويل ...ف مشوفتوش أصلا من امبارح ...بس انا اوعدك اني اول ما أشوفه هظبطهولك وهقوله ان استظرافة الكتير دة هيكون السبب انه يرجعه مدرستة القديمة تاني ....وانا عارف انه مش عايز يرجع ....وغصب عنه هيذاكر
_ ياريت بجد تتابع معايا كدة .....وانا يعني اسفة اذا كنت اتصلت فاجأة من غير ما استأذن ...
شيلت التليفون من على ودني .... وغمضت عيني احاول استوعب كلامها دة...تستأذني...تستأذني ازاي يعني
حطيت ايدي في جيبي ومديت رجلي وانا قاعد عالموتوسيكل
_ بصي خلينا نتفق على حاجة .... لو عايزة تكلميني في اي وقت اي وقت هتلاقيني موجود كفاية انك مهتمه بيه كدة....واسمحيلي انا كمان ابقى اكلمك اطمن عليه ....انا مش هتابع مع حد غيرك ... اتفقنا.
فكرت شوية .... انا عموما مش بكلم حد ...بس ...بس دة ولي امر طالب طبيعي يتابع معايا.... اومال هيتابع مع مين ولا هيسأل مين يعني؟!
_ ..... اتفقنا
ابتسمت اكتر .... وطلعت بالموتوسيكل والتليفون على ودني ...شوية كانت تسكت واحس انها خلاص هتقفل ...ارجع اسألها عن هيثم تاني ومن امتى وهو كدة اي حاجة اي سؤال لحد ما حسيت انها بدأت تقفش اني بطول عالفاضي ....قررت اقفل معاها وانا من جوايا مبسوط فعلا اني سمعت صوتها...
_..............................
_ يووو...حاضر يلي عالباب ...اصبر شوية
_ مسائك فل يا هند ..
_ مسائك هنا يا حبيبي... حمدالله عالسلامة
_ فين زوزو!!
_ في أوضتها جوا
_ طيب هدخلها....
_ جاي يعني ومزاجه اخر روقان .... يسعدك دايما يا بن اختي واحنا عايزين اية غير كدة
...................................
دخلت عليها الاوضة لقيتها قاعدة قدام المرايا وبتسرح شعرها الطويل....ووشها أحمر وخدودها عليها علامات صوابعي
_ ازيك يا زوزو
ردت عليا من غير ما تبصلي وهي بتحط ايديها على خدها علامة منها تبيني اللي في وشها
قعدت على حافة التسريحة قدامها .... وشها فعلا احمر بشكل مبالغ فيه ...رفعت ايدي احسس على وشها لقيتها بعدت بوشها بألم اول ما ايدي جت عليه
_ لسه وشك بيوجعك؟
بصت للفرشة في ايديها وردت بزعل
_ قوي....انت ايدك تقيلة يا ميمو....ودايما بتخوفني
بعدين رفعت وشها
_ بس أول مرة تمد ايدك عليا بالطريقة دي
ولقيتها عيطت
قومت ادور في درج التسريحة بتاعها وبعدين قربت منها...رفعت وشها بايدي ومسحت دموعها كويس بمنديل
بعدين بدأت احط على صوابعي مرهم من اللي جبتة من الصيدلية عشانها وادهنة على خدودها
_ ااه..اه
_ معلش استحملي ايديا....
فضلت ادهنلها وشها كله او كل حتة حمرا فيه
_ شويه وهتلاقي الحمار دة هدي والوجع كمان هيختفي
هزت وشها وهي بصه لتحت
اتنهدت وانا ببصلها
_ زينب....ربنا وحده عالم انا بحس باية لما بمد ايدي عليكي....بس خلينا متفقين انك انتي اللي دايما بتضطريني لكدة ....وعيشتك لواحدك مع خالتك قلقاني عليكي اكتر
بعدين رفعت وشها ليا
_ اية رأيك تفكري تاني في موضوع انك تيجي تعيشي معايا
_ انت عارف اني مش ممانعة
_ طيب يلا تعالي معايا .....اخدك وانا ماشي النهاردة
_ طيب وخالتك .... انا مش هقدر أسيبها لواحدها
_ ومين قال اني هسيب هند لواحدها ..... دي لازم تيجي معانا
_ ياريتها توافق يا ميمو...ياريت
= الأكل يا ولااااااد .....يلاااا يا ميمووو هات اختك وتعالى
_ يلا تعالي نتعشى ونكلمها واحنا بناكل
_ لأ انا مش عايزة أكل ....انا هنام
_ لا والله!!!! ...هند قالت انك طول النهار نايمه ....يلا بلاش قمص ..يلا
_ قولتلك يا ميمو مش جعانه ...روح انت كل....ااااااه
شيلتها فوق كتفي راسها لتحت ورجليها لفوق
_ يا ميمووو...نزلني....
_ بقولك ايه انا جعان ولو مكلتش دلوقتي....هتبقى مشكلة وهطلع جوعي عليكي
_ طب خلاص ..خلاص بس نزلني
_ والله ما يحصل ابدا ...الا بره عالسفرة
خرجت بيها الصالة لهند اللي اول ما شافتني شايلها زرع بصل كدة فضلت تضحك
_ يووو انت شايلها كدة لية يا ميمو....توقعها يا ابني
لقيت زينب بتتكلم ووشها مقلوب كدة وشعرها عالارض
_ عجبك كدة يا خالتي....خالية ينزلني ...خليه ينزلني دلوقتي انا دوخت
حطيت ايدي تحت ركبتها وقلبتها بالعدل وروحت قعدتها عالكرسي مكانها
_ اقعدي بقى .... واياكي يا زوزو تقومي من غير ما تاكلي
_ هو الأكل كمان بالعافيه ...اووف
_ ما خلاص بقى يا بت وكلي بقى .... متكبريهاش بقى اوماال..
_ صحيح يا هند ...جهزي نفسك انتي وزوزو عشان هتيجوا تقعدوا معايا
_ انتي عايزة تروحي مع اخوكي يا زينب؟!
لقيتها سابت الاكل وبصتلي وبصت لخالتها
_ لو انتي جيتي معايا يا خالتي هنروح
_ وانتوا الاتنين يا ولاد سهير عارفين رأيي في الموضوع دة....انا عشت هنا عمري كله ومش هخرج ولا همشي من البيت دة الا على تربتي ان شاء الله
_ يعني انتي عجبك ان كل واحد في حتة كدة يا هند .... ما تيجوا معايا بقى وسيبكوا من هنا .... انا بقلق عليكي وعلى زينب طول ما انتوا بعيد كدة عني...
لقيت خالتي فضلت تبصلي .... عرفت عايزة تقول ايه
_ طب ما تسيب انت شقتك اللي في اخر الدنيا دي وتيجي تعيش معانا هنا....
سكت وهربت بعيني منها
_ انسى زمان واللي حصل زمان يا ميمو.... هي الناس فاكرة كلت ايه امبارح ...الناس بتنسى يا أبني وكله بيتنسي مع الايام ....عقدتك من المكان هنا مش.....
_ هند!!!!!! خلاص ...قفلي عالسيره دي
...............................
بعد مرور اسابيع
كل يوم تقريبا يجيب هيثم وييجي لدرجة ان الولد مبقاش ييجي مع الباص خالص .... وبعد ما ينزله يفضل واقف بعيد باخد بالي من وقفته.... بس وانا داخله المدرسة بعد ما أخلص مع الولاد .... يا اما يقرب حاسة انه بيعمل حجتة هيثم وييجي يسأل عنه وبعدين يتكلم في اي حاجه تانيه
بقيت استغرب اي يوم ميجيش فيه واسأل هيثم عنه يقولي راح شغل مع اخويا بدري....مش عارفه ليه وقتها بحس اني متضايقه .... بس فاجأة القيه جاي في اخر اليوم الدراسي ياخده ولازم يعدي طبعا يسأل عنه
النهاردة بقى مجاش الصبح لقيت هيثم من غير ما اسأله نازل من الباص وجاي جري
_ مس سلمى ....ميمو مجاش عشان نزل مع اخويا شغل من الفجر ....بس متخافيش هييجي ياخدني
_ ولد يا هيثم..تعالى هنا....انت مين اللي قالك تيجي تقولي كدة
_ محدش...بس انا عارف انك هتسأليني
اتخضيت فعلا من كلام الولد للدرجة دي الوضع بقى باين قوي...مصيبة كمان ليكون بيقولة ان انا بسأله عنه
اول ما ييجي النهاردة اخر النهار لازم مدهوش وش خالص ...بما ان الموضوع بقى باين وسخيف كدة....عايز يسأل يسال اي مس غيري ....ايوا بس كدة....التفت ابص على نفس الطريق اللي بييجي منه...واتنهدت
هو بس ييجي النهاردة وميتأخرش وهيشوف ...هيشوف انا هعمل ايه
.................................
بقالي أسابيع قاعدة في البيت .... مبخرجش غير لو كنت هجيب حاجة وبس لا اكتر ولا اقل ...حقيقي زهقت وفوق كل دة وحشني قوي قوي المحل ...المزيكا ...رقصي هناك ..... حاسة اني افتقدت جزء من سعادتي ....من روحي ..... من أكتر لحظة كنت بحس فيها بالسعادة لاني بمارس فيها هوايتي والحاجة اللي بحبها ....صاحب المكان كلمني كتير .... وفريد عدى خلال الأسابيع دي اكتر من تلات مرات يحاول بس اقناعي ارجع ...بس انا اللي كنت خايفه قوي المرادي جوايا حاجه بتقولي ان ربنا سترها معايا فعلا لعلي اهدى بقى شويه ...كمان حاسة اني لو رجعت هيحصل حاجة ...بس هيكون اية يعني اللي هيجرا ...اووف هو في غير ميمو....اكيد لو حصل حاجه المرادي هيعرف يعني هيعرف..
قومت من السرير بزهق دخلت لخالتي المطبخ ....لقيتها مشغولة بتعمل أكل .... اوف...
دخلت أوضتي تاني ....قررت اني ابسط نفسي بنفسي ....روحت جبت تليفوني وشغلت أغنية شعبية بحبها ومارست هوايتي المفضلة وفضلت ارقص ....واندمجت أكثر وطلعت عالسرير وبقيت اروح بشعري يمين وشمال زي ما كنت بعمل في فقراتي في المحل .....واول ما الاغنية خلصت لقيت نفسي بنزل ايدي بطريقة محترفة وانتظرت تصقيف الناس المعتاد بس ولا سمعت حاجه....فتحت عيني على صمت الاوضة الكئيب ...بصيت على سريري اللي انا واقفة علية باستغراب....وشعري اللي اتفك من حركاتي وانتشر على طول ضهري وايدي الممدوده قدامي في شكل انتهاء الرقصة الاحترافي .....احباط وزهق مع اكتئاب شكلي داخلة عليه....نزلت من عالسرير ...فضلت رايحة جاية في الأوضة افكر في حيرتي وحالتي المستعصية مع الرقص لحد ما مسكت تليفوني واتصلت وانتظرت...
_ الو....ايوا يا فريد.....
#رانيا_أبو_خديجة
للانضمام لجروبنا على الفيسبوك 👇
🔥 الانضمام 🔥
او لصفحتنا 👇👇
🌹 الانضمام 🌹
لقراءة الفصل التاسع من رواية ميمو 👇👇
🔥🔥 الفصل التاسع 🔥🔥
قراءة ممتعة ♥️🥰
#ميمو
#رانيا_أبو_خديجة
إرسال تعليق