رواية ميمو الفصل الخامس بقلم رانيا أبو خديجة
رواية ميمو بقلم رانيا أبو خديجة
رواية ميمو
الفصل الخامس
#ميمو
#رانيا_أبو_خديجة
_ متزعقليش كدة ...مش من حقك أصلاً تزعقلي
_ ازعقلك واكسر دماغك كمان ...بتكذبي عليا تقولي انك رايحة فرح صاحبتك ...وتطلعي رايحة فرح في منطقه زي دي كلها اشكال ما يعلم بيها الا ربنا
تعالي هنا..انا بكلمك ..انتي يا زفته
التفت ليه اول ما دخلنا من باب الڤلة ... انا اصلا راجعة على أخري من هناك ...ومش طالبه اي خناق دلوقتي
_ قصي!!! ياريت تاخد بالك من اسلوبك وانت بتتكلم معايا عشا..
_ عشان ايه ان شاء الله...انا اخوكي الكبير ودة غصب عنك او برضاكي ومن هنا ورايح يا سلمى مفيش خروج بالليل كدة الا باذني ويوافق يا موافقش مفهوم ولا لأ
_ باباااا ..يا بابااااا
_ لو فاكرة ان بابا هيعارض كلامي تبقي غلطانة
= قصي!!!....كفاية كدة ... واطلع على اوضتك يلا انا صحيتك من النوم وقلقتك اطلع انت وسيبني انا مع اختك
بصيت لبابا اللي لسه خارج من المكتب على صوتنا انا والاستاذ
_ فهمهما يا بابا ان طريقتها واسلوبها دة مش هينفع معايا...واني متحمل منها كتير وساكت و ..
_ أطلع أوضتك يا قصي وسيبني مع أختك
بصلي شويه وبعدين سمع كلام بابا وطلع
= كنتي فين يا سلمى ؟!
_ حضرتك.. حضرتك عرفت يا بابا
= كنتي في فرح واحدة صاحبتك؟!
بعدت عيني عن عينه ...مقدرتش ابص في عينه بعد ما عرف كدبتي
_ يا بابا دي والدة طفل عندي في المدرسة عزمتني انا وغدير على فرح ابنها الكبير وانا بقالي كتير مخرجتش ...من الشغل للبيت وكنت زهقانه فقولت يعني اجرب جو جديد
= وجربتي؟!
جربت؟!!...مش عارفه ليه لما بابا سألني السؤال دة ..لقيتة نط في دماغي ...شكلة أول ما دخل ووقف عالمسرح كلماته اللي صوتها بيتردد في ودني ... شكلة المختلف ... انا تقريبا اول مرة اتعامل مع حد كدة ...واللي انا مستغرباله ازاي قدر يخطف عيني طول الوقت وكأني رايحة علشانه ...انا تقريبا متفرجتش على باقي الفرح ... كان كل ما يروح مكان الاقي عيوني بتلتفت تدور عليه ... حركاته وطريقتة رغم هدوئها المتقن كانت بتخطف عيني ... خصوصا لما...
= سلمى...سلمى!!
_ ها..نعم يا بابا..نعم
= سرحتي في ايه ...انا بسألك جربتي الجو الجديد دة؟!
_ اه...اه جربت اهو تغيير يعني ..
= واتبسطي بقى مع الناس اللي هناك
_ صراحة يعني يا بابا هو محدش هناك مركز مع حد اصلا كله بيرقص وكأنه مفيش حد في المكان غيره...بس الحقيقة الفرح فعلا كان مختلف ...مختلف قوي لدرجة الانبهار
= طيب والناس اللي كانوا بيضايقوكي
_ لا دول شوية اطفال مكنتش خايفه منهم .. خصوصا لما جة هو وعرفهم غلطهم
قولت كدة وانا برضه سرحانة في ..وبفتكر كلامة ليهم ..وقفته وهو ماسك باب عربيتي ..كل حاجة
لقيت بابا قرب مني
= هو!!! مين؟
حسيت عايزه اتكلم ..محتاجة اتكلم عنه مع أي حد
جريت على بابا اكون اقرب واتكلمت باندفاع
_ شخصية عجببة قوي يا بابا لو تشوف الناس بتعامله ازاي ..ولا ولا هو بيتكلم ازاي ..عندة ثقة في نفسة تبهرك وجاذبيه من اول دخوله المكان لازم يلفت نظرك وانتباهك وكانه هو الشو في حد ذاته بدون اي حاجة .... ولما ييجي ...
= مين دة يا سلمى!!!
_ ... معرفش اهو واحد شفته هناك
= طريقتك مع اخوكي قصي مش عجباني
_ اووف ..يا بابا هو اللي دايما طريقته كدة ومن وقت ما جة يعيش معانا هنا وهو دايما واقفلي على اي غلط عشان يوبخني وكأنه قاصد يثبتلي انه اخويا الكبير
= طريقة كلامك عنه دايما مش عجباني...وهو بيفكرك انه اخوكي لانك دايما ناسيه وقاصدة تحسييه بكدة
سكت معرفش اقوله ايه ...يمكن كلامه صح ...انا وقصي بينا مسافات صعب نقطعها بالبساطة دي
= قصي ملوش ذنب في حاجة حصلت في الماضي....ياريت تفهمي دة كويس عشان تعرفي تتعاملي معاه
_ حاضر
قولتها بيأس اكيد بابا مش هيزهق من انه يسمعني الكلام دة
= كملي بقى عملتي ايه في الفرح وشفتي مين هناك؟
….........…...…....
وقفت بالموتوسيكل بتاعي قدام الشقة...دخلت وقفلت الباب ورايا ...البيت كالعادة هوس اسكت ... بس خلاص انا اتعودت عالوحدة دي من وقت ما زينب سابتني وراحت تعيش عند هند .. خالتي
رميت المفاتيح على اقرب كنبة ورميت نفسي جنبها ...مش قادر أجمع اليوم واحداثة ...شغل الصبح ومشاوير في نص اليوم واخراليوم فرح يوسف و....
اتعدلت كدة عالكنبة احاول اجمع الدوشة اللي في دماغي دي ...
هو ايه اللي حصل في اخر اليوم ....ابتسمت وانا بقوم من عالكنبة وافتكرت ..امممم ...اليوم فعلا قفل قفله مختلفه ..حلوة
قومت اتمشيت لحد التلاجة ادور على حاجة اكلها وانا بفتكر نزولها من العربية بسرعة وكلامها المتوتر لأخوها تفهمه الوضع..اخوها اللي كان واقف وباين على وشه انه عايز يتخانق معايا...يمكن كان فاكرني خاطفهم
وبعد شوية بحلقة فيا سحبها من دراعها ودخلها عربيتها وامرها تمشي بعربيتها قدامة
من غير ولا كلمة ...فضلت واقف اشرب سيجارتي لحد ما مشيو وانا دماغي بتدور.. واحدة زي دي ..هي قالت اسمها ايه؟
مش فاكر .... ايه بس اللي جابها الفرح عندنا... مختلفة..وحلوة ...ولابسة أحمر
طلعت طبق فاكهه من التلاجة وبدأت أكل فيه ... أنا بس اللي شاغلني مع الاحمر دة عنيها اللي كانت في عيني معظم الوقت....مش جديد عليا ابدا ان عيون اللي حواليا تبقى عليا زي النهارده كدة....بس الجديد الأنبهار اللي شفتة في عيونها .. رفعة حواجبها ولمعت عنيها وهي مركزة معايا.... لأ حتى دة مش جديد...مش عارف ايه المختلف...يمكن عشان هي كلها على بعضها مختلفة...ولا يمكن عدسة عينيها اللي كانت في قلب عدسة عنيا....تركيز غريب.
اخدت قطمة من التفاحه اللي في ايدي ورفعت سماعة التليفون.. لازم أكلم هند وأطمن على الست زينب
_ ازيك يا هند ...كنتي نايمة....فين زينب طيب ...
نايمه ...من امتى؟!
_متأكدة ...بتنام من العشا ..طيب اما تصحى سلميلي عليها...وقوليلها هبقى اعدي اطمن عليكوا...هند مش هأكد عليكي خدي بالك منها ..زينب أمانة انا سايبها عندك ...
...….....................
_ .... زوزوووو
طايرة ....احساسي كأني طايرة ومش حاسه باللي حواليه...أول ما بسمع اسم زوزو دة مع المزيكا وتصقيف الناس مع اول ظهوري ..بغمض عيني وأعيش بأحساسي وودني وكل حركة في جسمي مع المزيكا وبس ...أجمل عشرين دقيقة في حياتي اللي بعيشهم في اللحظات دي ....وأسخف لحظة أول ما أسمع تصقيف شديد ...بيفوقني ان خلاص الفقرة انتهت مع انتهاء المزيكا...وقتها بفتح عيوني وانزل ايدي وابص عالناس المبسوطة من رقصي ...وقتها ابتسامتي بتبدأ تختفي ويحل مكانها تأنيب ...
دخلت بسرعة عالأوضة الخاصة بيا في المكان وغيرت هدومي بسرعة ....لازم أرجع البيت قبل ما هند تصحى .... بعدين تبلغ ميمو
اني مش في البيت
سمعت خبط على باب الأوضة
_ يادي النيلة....انا عارفه اني مش هخلص...اددددخل
= ايه يا زوزو برضه كسرتي كلام كمال وملبستيش بدلة من البدل اللي جايبها.... الراجل شايط بره وعلى أخره منك
كنت بلف في المكان الم حاجتي بسرعة لازم ارجع بسرعة حاسة الوقت اتأخر قوي ولازم اكون في سريري دلوقتي
_ فريد....قول للراجل دة زوزو مش هتلبس الهبل اللي هو جايبه دة ....انا مبسوطة باللبس اللي بعمله لنفسي كدة ..عاجبة عاجبة مش عاجبة نفضها سيره
= نفضها سيره دة ايه....انتي عارفه في ناس بتجيلك هنا مخصوص
_ طب يلا ...يلا بسرعه هتوصلني ولا لسه عندك شغل؟
....…...…...............
_ بس ...هنا ...اتكل على الله انت بقى
= طب ادخلك جوا شويه....الجو ليل والشوارع ضلمه
_ ولا لو كحل...انا مبخافش .....اتكل انت
= مااشي يا زوزو ....تماام
مشيت بسرعة لحد ما وصلت لشارعنا....كلة ضلمة ...عارفه ناسه بتنام من المغرب
وقفت قدام الباب وفكرت.... دلوقتي لو حطيت المفتاح في الباب كالعادة هيعمل صوت وهند تصحى
يبقى طريقنا زي ماهو... الشباك
لفيت من الناحية التانية وطلعت على طوبة كبيرة وفتحت شباك اوضتي ونزلت منه عالسرير عدل .... الحمد لله عدت على خير المرادي ...الشقه ساكته....تبقى هند نايمه ...وأنا في أمان.
……................
بعد مرور أسبوع
_ دوريات الخشب اللي هتيجي محملة الشغل هتتوزع نفس توزيع المرة اللي فاتت عشان ميحصلش اللغبظة اللي بتحصل كل مرة
_ يا ميمو انت لازم تيجي معايا والرجالة تشوفك ... وجودك معايا بيعرفهم انك متابع
_ انا بس مش هتكلم تاني عن حوارات الشغل اللي بيوقف دة ...وشد عالرجالة شويه واذا كان عليا ...يلا يا سيدي هعدي معاك عليهم وبعدين نطلع على الفيوم نشوف تحميل البضاعة من هناك
_ ماشي ... أوصل بس مدرسة الواد هيثم ... بعدين احصلك على هناك
_ من امتى وانت بتروح لهيثم المدرسة ..في حاجة ولا ايه ؟
_ مشاكلة كتير هناك شكلي غلطت اني نقلتله ورقه من المدرسة اللي كان فيها... وبعدين أمي راحت من كام يوم معرفتش تاخد حق ولا باطل مع الابل هناك ...وكل شوية استدعاء ووجع دماغ ...وانت عارف أبويا ملوش خلق فهروح انا بقى اشوف في ايه ومستقصدين الواد ليه؟
_ طيب تعالي وانا اوصلك في سكتي بالمكنه واهو نخلص ونطلع سوا عالرجالة في الورشة
....…..…...…..….....
_ بس أقف هنا يا ميمو
_ هي دي المدرسة...
_ اه هي دي..تعالى ندخل
_ يا أخي مدرسة دي ولا منتجع سياحي!!
_ اهو كله من شقانا وعرقنا.... يلا..
_ وكان مالها يعني مدرسته القديمة...على الاقل عندنا في المنطقة مش تحسها في بلد تانيه كدة
_أهو قولنا الواد يتعلم تعليم نضيف ...احنا ربنا كرمنا على حظه ونفسي يبقى غيرنا
_ طب تعالى نسأل بتوع الأمن دول نطلع فين بالظبط
طلعنا سلالم من الرخام بعد ما سألنا الأمن تحت ودلنا على أوضة المديرة.... المدرسة جميلة ومنظمة فعلاً
كنت ماشي معاه ببص في كل مكان حواليا... الفصول مقفوله...حتى بيبانها تحسها الوانها تفرح العين.. بس في شبابيك لبعض الفصول ..اللي بره يقدر يشوف جمال وترتيب الفصول من جوا... ويقولك التعليم باظ...ازاي يا جدع؟!
كنت طالع معاه وماشي في الطرقه ببص في كل مكان حواليا ... مبسوط بالمكان الحقيقة....وانا بلتفت يمين وشمال...لمحت وش من الشباك اللي قدامي ...أنا متأكد إني شفتة قبل كدة...وقفت أركز..
هي ولا مش هي .....ايوا هي .. ذات الرداء الأحمر ...بتاعة الليلة إياها
_ اوضة المديرة أهي ....تعالى معايا
اتكلمت وانا عيني عالشباك اللي قصادي بحاول اتحقق من الشبه
_ لأ ادخل انت وانا هستناك هنا
_ طيب مش هغيب عليك ...تلات دقايق اشوف ايه الظروف واطلع
_ مااشي
قولت كده وانا شايف واحدة زي القمر رايحة جاية قدام الشباك بتشرح ....شوية تبتسم وشوية توجة الكلام للي قدامها...انا بس عايز اتأكد انها هي ...
……...................
_ اية رأيك يا هيثم تقوم تجاوبني بدل الفرك واللعب اللي بتعمله دة وانا بشرح
_ نعم يا مس
_ 50 ÷ 10 Equal
_ !!!!
_ما ترد يا أبني ... الإجابة ايه؟!
_ ما النبي عربي يا مس...قولي بالعربي وانا ارد عليكي واعملك اللي انتي عايزاه والله
_ الصبر من عندك يااارب... هي مش مس فاطمه كانت عملالك استدعاء ولي أمر غير اللي انا كنت عملاه الاسبوع اللي فات ...ولي امرك مجاش ليه
_ بابا مش فاضي ...ممكن ماما هي اللي تيجي
_ تااني ماما....طيب هسأل تاني وبالعربي ماشي ... لأ بالحبي زي ما انت بتفهم ... دلوقتي لو عندنا ٥٠ برتقانه ومعانا ١٠ ولاد..كل..
_ خليهم بنات يا مس.. عشان اديهم البرتقان
لقيت الفصل كله تقريبا ضحك ...مش اول مرة الكائن دة يضحك الفصل كله عليا
_ الصبر من عندك يااارب .....طيب لو معاك ٥٠ برتقانه وعندنا ١٠ بنااات ها بنااات هتدي كل بنت كام برتقانه؟
_ المزة فيهم هديها البرتقان كله
المرادي مسمعتش صوت ضحك الفصل بس ....لأ كان في صوت ضحك رجولي كدة اتخلل الاصوات الطفولية دي ...خلاني التفت أدور على مين دة.... لحد ما لمحتة واقف في الشباك... بيتكلم ببتسامتة دي اللي انا فاكراها كويس قوي
= دلوقتي بس عرفت... الواد دة مش معمر هنا ليه
_ ميموووو
...جري عليه هيثم يحضنه ...حضنه هو كمان وعينه عليا زي ما عيني عليه بحاول استوعب وجوده عندي هنا في الفصل؟!!
رأيكوااا وتوقعاتكوااا معايا كدة 🙈♥️♥️
يا ترى اية حكايه زوزو واية تأثيرها معانا في الاحداث أكيد لها دور كبير كماان!
وحكاية ميمو اللي لسة هتدخل في الجد وحقيقي فيها كتير ومليانه بالخبايه اللي هنعرفها الأحداث الجاية
وحكايتة مع سلمى اللي أكيد مش هتكون عادية ولا تقليدية؟!
كل دة باذن الله في الاحداث الجاية بس محتاجة اعرف رأيكم وأشوف تفاعلكم عشاان والله بيفرق معايااا قوووي... ♥️♥️
قراءة ممتعة♥️🥰
#ميمو
#رانيا_أبو_خديجة
لقراءة الفصل السادس من رواية ميمو 👇
🔥 الفصل السادس 🔥
للانضمام لصفحتنا على الفيس بوك 👇
🔥 الانضمام 🔥
او جروبنا على الفيس بوك 👇
🔥 الانضمام 🔥
إرسال تعليق